Yinni Gusunɔ, ɑ mɑn wɛ̃ɛrɑ, ɑ mɑɑ mɑn ɡiɑ.

2 A nɛn sindu kɑ nɛn seebu yɛ̃.

A nɛn bwisikunu tubɑ sɑrun di.

3 A nɛn sɑnum kɑ nɛn kpindu yɛ̃.

A mɑɑ nɛn swɛɛ kpuro yɛ̃.

4 N sere nɔɔ wukiɑ, ɑ nɛn ɡere kpuro yɛ̃ kɔ Yinni Gusunɔ.

5 A kɑ mɑn wɑ̃ɑ biru kɑ wuswɑɑ,

mɑ ɑ mɑn wunɛn nɔmu sɔndi.

6 Yɛ̃ɛ ten bweseru tɑ mɑn sɑ̃ɑwɛ mɑɑmɑɑki bɑkɑ.

Tɑ kpɑ̃, nɑ ǹ kpɛ̃ n tu tubu.

7 Mɑ ɡiɑ kon wunɛn Hunde kisirɑri n dɑ.

Nɡe mɑ ɡiɑ kon dukɑ we ɑ kun kɑ mɑn wɑ.

8 Nɑ̀ n yɔɔwɑ sere wɔllɔ, ɑ wɑ̃ɑ mi.

Nɑ̀ n dɑ ɡɔriɔ, ɑ mɑɑ wɑ̃ɑ mi.

9 Nɑ̀ n dɑ sɔ̃ɔ yɑri yerɔ ǹ kun mɛ sɔ̃ɔ duu yerɔ nim wɔ̃kun ɡoorɔ,

10 min tii, wunɛn nɔmuwɑ ɡɑ koo mɑn kpɑrɑ,

kpɑ wunɛn nɔm ɡeu ɡu mɑn nɛnɛ.

11 Nɑ̀ n nɛɛ, yɑm wɔ̃kurɑ koo mɑn bere,

yɑm dɑ bururewɑ mi nɑ wɑ̃ɑ.

12 Bɑɑ yɑm wɔ̃kuru tɑ ǹ tĩri wunɛn mi.

Wɔ̃kuru tɑ buririwɑ nɡe sɔ̃ɔ sɔɔ.

Yɑm wɔ̃kuru tɑ bɑllimɔwɑ nɡe yɑm bururɑm.

13 Wunɑ ɑ nɛn wɑsin doo dookɑ mɔmɑ.

Wunɑ ɑ mɑn swɛɛnɑ nɛn mɛron nukurɔ.

14 Nɑ nun siɑrɑ yèn sɔ̃ ɑ mɑn tɑkɑ kuɑ

kɑ wunɛn dɑm mɑɑmɑɑkiɡim.

Wunɛn nɔmɑn sɔmɑ kun ɡere mɔ.

Yeniwɑ nɑ yɛ̃ sɑ̃ɑ sɑ̃ɑ nɛn ɡɔ̃ruɔ.

15 Sɑnɑm mɛ bɑ mɑn mɔmɑ ɑsiri sɔɔ,

mɑ bɑ mɑn swɛɛnɑ nɛn mɛron nukurɔ,

nɛn wɑsi kun nun berue.

16 A mɑn wɑ sɑɑ bɑ nɛn nukuru dumɔn di.

Wunɛn tireru sɔɔrɑ bɑ nɛn wɑ̃ɑrun tɔ̃nun ɡeeru yoruɑ nɑ sere nu dibu toruɑ.

17 Gusunɔ, wunɛn bwisikunu nu duku.

Nin dɑbirɑ bɑndɑ.

18 Nɑ̀ n nu ɡɑrimɔ, nu yɑni sɛɛri dɑbiru kere.

Nɑ̀ n mɑɑ dom seewɑ, nɑ rɑ n wɑ̃ɑ kɑ wunɛ.

19 Gusunɔ, ɑ de tɔn kɔ̃sobu bu ɡbi,

kpɑ tɔn ɡowobu bɑ n kɑ mɑn tonde.

20 Be, be bɑ sɑ̃ɑ wunɛn yibɛrɛbɑ,

bɑ nun ɡɑri kɔ̃si mɑnimɔ.

Wunɛn yĩsirɑ bɑ kɑ weesu mɔ̀.

21 Yinni Gusunɔ, be bɑ nun tusɑ kɑ be bɑ rɑ nun seesi,

nɑ ǹ kon bu tusi?

22 Nɑ bu tusɑ too too, nɑ bu ɡɑrisi nɛn yibɛrɛbɑ.

23 Gusunɔ, ɑ mɑn wɛ̃ɛrio kpɑ ɑ nɛn ɡɔ̃ru ɡiɑ.

A nɛn lɑɑkɑri mɛɛrio kpɑ ɑ nɛn bwisikunu tubu.

24 A mɛɛrio ɑ wɑ nɑ̀ n wɑ̃ɑ swɑɑ kɔ̃sɑ sɔɔ,

kpɑ ɑ kɑ mɑn dɑ wɑ̃ɑru te tɑ ku rɑ kpen swɑɑ sɔɔ.