2 Yinni Gusunɔ, ɑ mɑn wɔro tɔn kɔ̃sobun nɔmɑn di.

A mɑn ɡbɑro ɡbɑnɑɡibun nɔmɑn di.

3 Domi kɔ̃sɑ bɑ rɑ n bwisikumɔ ben ɡɔ̃ruɔ.

Kpɑ bɑ n sɔɔru kpeere bɑɑdommɑ bu kɑ tɑbu ko.

4 Bɑ rɑ ben yɑrɑ derewɑ nɡe wɑɑ.

Kpɑ ben nɔɔ ɡɑ n dɛ̃ɛ mɔ nɡe surɔkɔru.

5 Yinni Gusunɔ, ɑ mɑn tɔn kɔ̃so ɡbɑro.

A mɑn ɡbɑnɑɡibu ɡiro be bɑ kɑsu bu mɑn surɑ.

6 Wee tii suobu bɑ mɑn yinɑ bɛriɑmmɛ.

Bɑ mɑn tɑɑ yinuɑmmɛ swɑɑ sɔɔ.

Mɑ bɑ mɑn yɔɔru bwɛ̃ɛyɛ.

7 Adɑmɑ nɑ nɛɛ, Gusunɔ, wunɑ ɑ sɑ̃ɑ nɛn Yinni.

A swɑɑ tem kpĩiyɔ ɑ nɛn kɑnɑru nɔ.

8 Yinni Gusunɔ, ɑ sɑ̃ɑwɑ ɡbɑ̃rɑru tèn mi nɑ rɑ kuke n kɑ fɑɑbɑ wɑ.

A rɑ nɛn wiru bere tɑbun sɑɑ sɔɔ.

9 A ku de tɔn kɔ̃son kĩru tu koorɑ.

A ku de ye u niɑ sɑ̃ɑ yu koorɑ, kpɑ u ku rɑɑ tii suɑ.

10 Be bɑ mɑn kooro buremɔ

ɑ de ben torɑnu nu wɔri ben wiru wɔllɔ.

11 A bu dɔ̃ɔ wisio kpɑ ɑ de bu wɔri wɔru bɔkɔ sɔɔ

ɡèn min di bɑ ǹ mɑɑ kpɛ̃ bu yɑri.

12 Wi u weesu mɔ̀ u ǹ tɑ̃simɔ tem mɛ sɔɔ.

Kɔ̃sɑ yɑ ko n mɑɑ ɡbɑnɑɡii swĩiwɑ sere u kɑ kɑm ko.

13 Nɑ yɛ̃ mɑ Yinni Gusunɔ u rɑ wɔnwɔndo siriewɑ dee dee.

Kpɑ u mɑɑ sɑ̃ɑro nùn win ɡem wɛ̃.

14 Geemɑ, ɡemɡibu bɑ koo nun tɔmɑ kpɑ bɑ n wɑ̃ɑ wunɛn wuswɑɑɔ.