145
1 Womu ɡe Dɑfidi u kuɑ u kɑ Gusunɔ siɑrɑ. Ge wee.
Gusunɔ nɛn sinɑ boko, kon nun wɔlle suɑ.
Kon wunɛn yĩsiru tɔmɑ sere kɑ bɑɑdommɑɔ.
2 Tɔ̃ɔ bɑɑtere kon nun siɑrɑ.
Mɛyɑ kon wunɛn yĩsiru tɔmɑ sere kɑ bɑɑdommɑɔ.
3 Yinni Gusunɔ, ɑ kpɑ̃. Wunɑ n weenɛ bu siɑrɑ.
Wunɛn kpɑ̃ɑru tɑ ǹ nɔru mɔ.
4 Sɑɑ bɑɑyeren tɔmbu bu wunɛn sɔmɑ siɑro.
5 Kon wunɛn yiikon ɡirimɑn kpɑ̃ɑru ɡere.
Kpɑ n wunɛn sɔm mɑɑmɑɑkiɡinun ɡɑri kpɑrɑ kɑ womu.
6 Bɑ koo wunɛn dɑm bɑkɑm ɡɑri ɡere,
kpɑ nɛ, n mɑɑ wunɛn kpɑ̃ɑrun ɡɑri kpɑrɑ.
7 Bɑ koo wunɛn tɔn ɡeerun kpɑ̃ɑru yɑɑyɑ
kpɑ bu tɑki ko wunɛn ɡem sɔ̃.
8 Yinni Gusunɔ, ɑ wɔnwɔndu mɔ, ɑ rɑ mɑɑ tɔmbu durom kue.
A ku rɑ mɔru se fuuku. Wunɛn tɔn ɡeerɑ kpɑ̃.
9 Yinni Gusunɔ, ɑ tɔmbu kpuro kĩ.
Wunɛn wɔnwɔndu tɑ rɑ sɔ̃ɔsirewɑ wunɛn tɑkɑ koorɑ kpuro sɔɔ.
10 Yinni Gusunɔ, wunɛn tɑkɑ koorɑ kpuro yɑ koo nun bɛɛrɛ wɛ̃,
kpɑ be bɑ sɑ̃ɑ wunɛɡibu bu nun siɑrɑ.
11 Bɑ koo wunɛn bɑndun bɛɛrɛn ɡɑri ɡere,
kpɑ bu wunɛn dɑm ɡɑri kpɑrɑ
12 bu kɑ wunɛn sɔm mɑɑmɑɑkiɡinu tɔmbu sɔ̃ɔsi
kɑ sere wunɛn bɑndun yiikon ɡirimɑ.
13 Wunɛn bɑndu tɑ ko n wɑ̃ɑwɑ sere kɑ bɑɑdommɑɔ.
Mɛyɑ kɑɑ n tu dii sere kɑ bɑɑdommɑɔ.
Yinni Gusunɔ u rɑ win nɔɔ mwɛɛnu yibie.
Ye u mɔ̀ kpuro sɔɔ, u rɑ win tɔn ɡeeru sɔ̃ɔsi * - Nɑɑ sinin bɔnu yɑ ǹ wɑ̃ɑ yellun tirenu kpuro sɔɔ. Adɑmɑ yɑ wɑ̃ɑ Heberum tireru ɡɑru sɔɔ te bɑ wɑ dɑ̃ku te..
14 Yinni Gusunɔ, ɑ rɑ tɔn be bɑ wɔrumɑɑ dɔɔ ɡɑbe,
kpɑ ɑ be bɑ dɑm dwiiyɑ tɑ̃sisiɑ.
15 Tɔmbu kpurowɑ bɑ mɛɛrɑ wunɛn mi ɡiɑ kɑ yĩiyɔbu,
domi wunɑ ɑ rɑ bu dĩɑnu wɛ̃ nin sɑɑ sɔɔ.
16 A rɑ wunɛn nɔmɑ dɛmiɛ
kpɑ ɑ hunde koni bɑɑyere wɛ̃ yèn bukɑtɑ yɑ mɔ.
17 Yinni Gusunɔ, ɑ sɑ̃ɑwɑ ɡemɡii wunɛn swɛɛ kpuro sɔɔ.
Mɛyɑ ɑ rɑ mɑɑ wunɛn wɔnwɔndu sɔ̃ɔsi sɔmɑ ye ɑ mɔ̀ kpuro sɔɔ.
18 Yinni Gusunɔ, be bɑ nun sokumɔ kɑ ɡɔ̃ru dɛɛrɔ,
ben bɔkuɔrɑ ɑ rɑ n wɑ̃ɑ.
19 A rɑ be bɑ nun nɑsie kĩru yibie
kpɑ ɑ ben wuri nɔ ɑ bu fɑɑbɑ ko.
20 A rɑ be bɑ nun kĩ kɔ̃su
kpɑ ɑ tɔn kɔ̃sobu kɑm koosiɑ.
21 Kon wunɛ Yinni Gusunɔ tɔmɑ
kpɑ tɔmbu kpuro bu wunɛn yĩsi dɛɛrɑru bɛɛrɛ wɛ̃ sere kɑ bɑɑdommɑɔ.
*145:13 - Nɑɑ sinin bɔnu yɑ ǹ wɑ̃ɑ yellun tirenu kpuro sɔɔ. Adɑmɑ yɑ wɑ̃ɑ Heberum tireru ɡɑru sɔɔ te bɑ wɑ dɑ̃ku te.