1 I Yinni Gusunɔ siɑro.

Nɛn bwɛ̃rɑ, ɑ Yinni Gusunɔ siɑro.

2 Kon wunɛ Yinni Gusunɔ siɑrɑ nɛn wɑ̃ɑrun tɔ̃nu kpuro sɔɔ.

Kon wunɛ Gusunɔ nɛn Yinni womu kuɑ nɛn wɑ̃ɑrun tɔ̃nu kpuro sɔɔ.

3 I ku bɛɛn nɑɑnɛ doke sinɑmbu sɔɔ,

bɑ sɑ̃ɑwɑ tɔmbu,

bɑ ǹ kpɛ̃ bu bɛɛ fɑɑbɑ ko.

4 Ben wɛ̃siɑru tɑ rɑ doonɛwɑ kpɑ bu wurɑ bu ko tem.

Yen tɔ̃ɔ te, ben himbɑ kpuro yɑ kɑm kuɑwɑ mi.

5 Doo nɔɔruɡiiwɑ wìn yĩiyɔbu wɑ̃ɑ wunɛ Gusunɔ Yɑkɔbun Yinni sɔɔ.

Doo nɔɔruɡiiwɑ wi u win nɑɑnɛ doke Gusunɔ win Yinni sɔɔ.

6 Wiyɑ u wɔllu kɑ tem kuɑ kɑ nim wɔ̃ku

kɑ ye yɑ wɑ̃ɑ ye kpuro sɔɔ.

U sɑ̃ɑwɑ ɡemɡii sere kɑ bɑɑdommɑɔ.

7 U rɑ be bɑ dɑm dɔremɔ ben ɡem wɛ̃.

Kpɑ u be bɑ ɡɔ̃ɔru soore dĩɑnu wɛ̃.

Yinni Gusunɔ u rɑ yobu yɑkie.

8 U rɑ wɔ̃kobu nɔni wukie.

U rɑ be bɑ tɑɑre seeye. U rɑ ɡemɡibu kɑ̃.

9 U rɑ sɔbu kɔ̃su. U rɑ mɑɑ ɡɔminibu kɑ ɡobekubɑ nɔɔri.

Kpɑ u tɔn kɔ̃sobun himbɑ kɑm koosiɑ.

10 Yinni Gusunɔ, u ko n bɑndu diiwɑ sere kɑ bɑɑdommɑɔ.

Gusunɔ Siɔnin Yinni, u ko n wɑ̃ɑwɑ sere kɑ bɑɑdommɑɔ.

Yen sɔ̃, i Yinni Gusunɔ siɑro.