7
1 Dɑrusin bɑndun wɔ̃ɔ nnɛse sɔɔ, yen suru nɔɔbɑ nnɛse wi bɑ mɔ̀ Kisilun sɔ̃ɔ nnɛse sɔɔrɑ Yinni Gusunɔ u kɑ Sɑkɑri ɡɑri kuɑ u nɛɛ, 2 Betɛliɡibu bɑ rɑɑ Sɑrɛsɛɛ kɑ Reɡɛmu Mɛlɛki kɑ ɡɑbu ɡɔrɑ Gusunɔ wɔllu kɑ tem Yinnin sɑ̃ɑ yerɔ bu kɑ win durom kɑnɑ. 3 Kpɑ bu mɑɑ yɑ̃ku kowobu kɑ win sɔmɔbu bikiɑ bɑ̀ n ko bɑ n sumɔn nɑ, kpɑ bɑ n nɔɔ bɔkuɑ wɔ̃ɔn suru nɔɔbuse kpuro sɔɔ nɡe mɛ bɑ mɔ̀ tɛɛbun di.
4 Yerɑ Gusunɔ, wɔllu kɑ tem Yinni u Sɑkɑri sɔ̃ɔwɑ u nɛɛ, 5 ɑ yɑ̃ku kowobu kɑ tɔn be kpuro wisio ɑ nɛɛ,
sɑɑ wɔ̃ɔ wɑtɑ kɑ wɔkurun di, bɑ rɑ nɔɔ bɔke
kpɑ bɑ n wɑ̃ɑ nuku sɑnkirɑnu sɔɔ wɔ̃ɔn suru nɔɔbuse kɑ nɔɔbɑ yiruse sɔɔ.
Adɑmɑ bɑ ǹ ye mɔ̀ bu kɑ mɑn bɛɛrɛ wɛ̃.
6 Bɑ̀ n mɑɑ dimɔ, bɑ nɔrumɔ, ben tiin sɔ̃nɑ.
7 Yellu, nɛ, Yinni Gusunɔ nɑ tɔmbu kirɔ kuɑ kɑ ɡɑri yinin bweseru nɛn sɔmɔ ɡbiikobun min di. Sɑɑ ye sɔɔ, Yerusɑlɛmu kɑ wuu si su kɑ ye sikerenɛn tɔmbu bɑ wɑ̃ɑ bɔri yɛndu sɔɔ, mɑ tɔmbɑ yibɑ sɔ̃ɔ yɛ̃sɑn nɔm dwɑru ɡiɑ kɑ wɔwɑɔ.
8-9 Gusunɔ wɔllu kɑ tem Yinni u mɑɑ Sɑkɑri sɔ̃ɔwɑ u nɛɛ, ɑ tɔn be ɡɑri yini yɑɑyɑsio yi yi nɛɛ,
bu tɔmbu sirio dee dee,
kpɑ bɑ n tɔn ɡeeru kɑ wɔnwɔndu mɔɔsinɛ.
10 Bu ku ɡɔminibu kɑ ɡobekubɑ
kɑ sɔbu kɑ sɑ̃ɑrobu dɑm dɔre.
Bu ku mɑɑ ben winsim kɔ̃sɑ bwisikusi.
11 Adɑmɑ bɑ ǹ ɡɑri yi swɑɑ sue. Bɑ swɑɑ tɑɑyɑwɑ. 12 Mɑ bɑ ben ɡɔ̃rusu bɔbiɑsiɑ nɡe kpee kpikiru. Bɑ ǹ nɛ, Gusunɔ wɔllu kɑ tem Yinnin woodɑ ye swɑɑ dɑki, ye nɑ bu wɛ̃ sɑɑ nɛn sɔmɔbun min di, be nɛn Hunde u kɑ ɡɑri kuɑ. Mɑ ben swɑɑ tɑɑ bi, bu mɑn mɔru kuɑ too.
13 Sɑnɑm mɛ nɑ bu sokɑ, bɑ ǹ wisɑ.
Yen sɔ̃nɑ nɛn tii nɑ ǹ mɑɑ bu wisɑ
sɑnɑm mɛ bɑ mɑn somiru kɑnɑ.
14 Yen sɔ̃nɑ nɑ bu yɑrinɑsiɑ bwesenu kpuron suunu sɔɔ ni bɑ ǹ dɑɑ yɛ̃.
Mɑ bɑ ben tem deri dirum
ɡoo ku rɑ mɑɑ sɑre mi.
Mɑ tem ɡem mɛ, mu kuɑ bɑnsu.
Nɛ, Gusunɔ wɔllu kɑ tem Yinniwɑ nɑ yeni ɡeruɑ.
Yinni Gusunɔ u koo
Yerusɑlɛmu wesiɑ nɡe yellu