8
1 Gusunɔ wɔllu kɑ tem Yinni u ɡeruɑ u nɛɛ,
2 nɛn nisinu kpɑ̃ Yerusɑlɛmun sɔ̃.
Domi nɑ ye kĩ ɡem ɡem.
3 Yen sɔ̃nɑ nɑ nɛɛ, kon wurɑ Yerusɑlɛmu ye sɔɔ
kpɑ nɑ n wɑ̃ɑ mi.
Bɑ koo ye soku wuu ɡemɡuu.
Kpɑ bu mɑɑ nɛ, Gusunɔ wɔllu kɑ tem Yinnin ɡuu te soku ɡuu dɛɛrɑru.
4 Durɔ tɔkɔnu kɑ kurɔ tɔkɔnu
nu koo kɑ dɛki sĩimɑ
kpɑ nu nɑ nu sinɑ yen bɑtumɑbɑ sɔɔ.
5 Bii ɑluwɑɑsibɑ kɑ bii wɔndiɑbɑ
bɑ koo yibu yen bɑtumɑ be sɔɔ
bɑ n dweebu mɔ̀.
6 Isireli be bɑ tien nɔni sɔɔ,
yɑ ko n sɑ̃ɑ nɡe ye yɑ kun kpɛ̃ yu koorɑ.
Adɑmɑ nɛ, Gusunɔ wɔllu kɑ tem Yinni,
kon kpĩ n mɑɑmɑɑki ye ko.
Nɛnɑ nɑ yeni ɡeruɑ.
7 Wee nɑ nɛn tɔmbu fɑɑbɑ mɔ̀
be bɑ wɑ̃ɑ sɔ̃ɔ yɑri yerɔ kɑ sɔ̃ɔ duu yerɔ.
8 Kon kɑ bu wurɑmɑ kpɑ bu sinɑ Yerusɑlɛmuɔ
bɑ n sɑ̃ɑ nɛn tɔmbu
kpɑ nɑ n mɑɑ sɑ̃ɑ ben Yinni ɡemɡii
wi u nɑɑnɛ mɔ.
9 Wee ye nɛ, Gusunɔ wɔllu kɑ tem Yinni nɑ ɡeruɑ.
Nɑ nɛɛ, i wɔruɡɔru koowo
bɛɛ be i nuɑ ɡisɔ ye nɛn sɔmɔbu bɑ ɡeruɑ
sɑnɑm mɛ bɑ nɛn sɑ̃ɑ yee ten kpɛɛkpɛɛku swĩi.
10 Domi yellu, ɡoo ku rɑ win sɔmburun kɔsiɑru wɑ.
Goo ku rɑ mɑɑ yɑɑ sɑbe ni nu nùn sɔmburu kuɑn kɔsiɑru wɛ̃.
Sɑɑ ye sɔɔ, ɡoo ku rɑ yɑri.
Goo ku rɑ mɑɑ du kɑ bɔri yɛndu yibɛrɛbɑn sɔ̃.
Domi nɑ tɔmbu yɔ̃suwɑ bu kɑ wɔrinɑ.
11 Adɑmɑ tɛ̃, nɑ ǹ mɑɑ Isireli be bɑ tie kuɑmmɛ nɡe mɛ nɑ kuɑ yellu.
Nɛ, Gusunɔ wɔllu kɑ tem Yinniwɑ nɑ yeni ɡeruɑ.
12 Kon de bɔri yɛndu tu duwɑ tem sɔɔ kpuro.
Resɛm yɑ koo mɑ.
Gurɑ yɑ koo nɛ
kpɑ tem mu dĩɑnu ko.
Domɑ nini kpurowɑ kon Isireli be bɑ tie kuɑ.
13 Bɛɛ Yudɑbɑ kɑ Isirelibɑ,
wee i kuɑ bwese te nɑ bɔ̃rusi bwesenun suunu sɔɔ.
Adɑmɑ tɛ̃, kon bɛɛ fɑɑbɑ ko
kpɑ i n sɑ̃ɑ domɑruɡibu tɔmbun suunu sɔɔ.
Yen sɔ̃, i ku bɛrum ko.
I de i n wɔruɡɔru mɔ.
14 Amɛniwɑ nɛ, Gusunɔ wɔllu kɑ tem Yinni nɑ ɡeruɑ.
Nɑ nɛɛ, nɑ rɑɑ ɡɔ̃ru doke n bɛɛ kɔ̃sɑ kuɑ
yèn sɔ̃ bɛɛn bɑɑbɑbɑ bɑ nɛn mɔru seeyɑ.
Nɑ ǹ dɑɑ ɡɔ̃ru ɡɔsie n ye kɔbiɑ.
15 Adɑmɑ tɛ̃, nɑ ɡɔ̃ru doke
n Yerusɑlɛmu kɑ Yudɑn tem kpuro ɡeɑ kuɑ.
Yen sɔ̃, i ku bɛrum ko.
16 I kɑ ɡɑri yini sɔmburu koowo.
Yiyɑ, bɑɑwure u n dɑ win winsim ɡem sɔ̃.
Kpɑ i n dɑ bɑɑwure siri ɡem sɔɔ
i n kɑ wɑ̃ɑ bɔri yɛndu sɔɔ.
17 I ku ɡoo kɔ̃sɑ kuɑ.
I ku bɔ̃ri weesuɡii ko.
Domi yenibɑ kpurowɑ nɑ tusɑ.
Nɛ, Yinni Gusunɔwɑ nɑ yeni ɡeruɑ.
Nɔɔ bɔkurun tɔ̃ru tɑ koo
ɡɔsirɑ nuku dobun tɔ̃ru
18 Gusunɔ wɔllu kɑ tem Yinni u nɛɛ, 19 nɔɔ bɔku ni i rɑ ko suru nnɛse sɔɔ kɑ suru nɔɔbuse sɔɔ kɑ suru nɔɔbɑ yiruse sɔɔ kɑ suru wɔkuruse sɔɔ, nu koo ɡɔsirɑ nuku dobun tɔ̃nu Yudɑɔ. Ni sɔɔrɑ bɑ ko n dɑ tɔ̃ɔ bɑkɑnu di.
Adɑmɑ yebɑ kpuro sɔɔ, i de i ɡem kɑ bɔri yɛndu kĩɑ.
20 Nɑ mɑɑ wure nɑ nɛɛ,
tɔmbu bɑ koo nɑ Yerusɑlɛmuɔ
sɑɑ wusu dɑbinun di.
21 Wusu ɡɑsun tɔmbu bɑ koo ɡɑsun tɔmbu sɔ̃ bu nɛɛ,
bu dɑ bu nɛ, Gusunɔ wɔllu kɑ tem Yinnin durom kɑsu Yerusɑlɛmuɔ
kpɑ bu mɑn sɑ̃.
22 Geemɑ, bwese dɑbinu kɑ mɑɑ bwese ni nu dɑm mɔ
nu koo nɑ nu nɛn durom mɛ kɑsu
kpɑ nu mɑn sɑ̃.
23 Nɛ, Gusunɔ wɔllu kɑ tem Yinni nɑ nɛɛ,
yen tɔ̃ɔ te, bweseru bɑɑtere sɔɔ,
tɔmbu wɔku wɔkubu bɑ ko n Yuu turon yɑbe soo nɛni
bɑ n mɔ̀, bɑ koo kɑ nùn dɑ.
Domi bɑ nuɑ mɑ nɛ, Gusunɔ nɑ wɑ̃ɑ kɑ wi.
ISIRELIBA KA BWESE TUKUNU
Yinni Gusunɔ
u koo bwese ni nu tie siri