Pa Korentián
Pulosay Kágad
Pa Korentián Pulosay kágaday bárawá
1
Salám o drót
1 Cha Pulosay némagá, mane Pulos ke Hodáay razáay sará gwánk janag*1:1 Gwánk janag, bezán tawár kanag, lótháénag. butagán ke Issá Masihay kásedé bebán, o cha may brát Sustinesay némagá,
2 pa Hodáay kelisáyá ke Korentay shahrá ent, bezán pa hamáyán ke Issá Masihay barkatá pák o palgár kanag butagant o gwánk janag butagant ke áiay palgártagén†1:2 “Palgártagén” hamá mardom ant ke gón Issá Masihay hóná cha wati gonáhán shódag o pák kanag butagant o é dhawlá pa Hodáyá dar chenag butagant. mardom bebant, hamá sajjahén mardománi hamráhiá ke har jágah may Hodáwandén Issá Masihay námá gerant ke áyáni ham Hodáwand ent o may ham.
3 Cha may Hodáén Pet o Hodáwandén Issá Masihay némagá shomárá rahmat o émeni sar bát.
Shogrgozári
4 Man modám pa shomá wati Hodáay shográ gerán ke Issá Masihay barkatá áiay rahmat shomárá bakshag butagant. 5 Shomá Masihay barkatá har hesábá hastómand ét, har gapp o har paymén zántá. 6 Cha eshiá zánaga bit ke Masihay bárawá may sháhedi rást ent. 7 Paméshká nun ke shomá pa hodónáki may Hodáwandén Issá Masihay záher bayagay rahchár ét, shomárá hecch paymén ruhi nyámatay kammi nést. 8 Hodá wat shomárá tán áherá mohr o mohkama dárit tánke may Hodáwandén Issá Masihay róchá shomá béayb bebét. 9 Hodá wati kawlay sará óshtátag, hamá Hodá ke shomárá gwánki jatag ke shomay zend gón áiay Chokká, bezán gón may Hodáwandén Issá Masihá sharikdár bebit.
Báwarmandáni nátepáki
10 Oo brátán!‡1:10“Brátay” máná har báwarmand ent, mardén o janén. Nun may Hodáwandén Issá Masihay námá cha shomá dazbandia kanán ke shomay gapp yakk bebant tánke báwarmandáni nyámá nátepáki makapit o shomay pegr o maksad yakk bebit. 11 Mani brátán! Gapp esh ent ke Kalwiay lógay mardomán shomay bárawá maná hál dátag ke shomay nyámá arh o korh hast. 12 Bezán, cha shomá yakké gwashit: “Man Pulosayg án”, degaré gwashit: “Man Apulosayg án”, dega yakké gwashit: “Man Képáayg§1:12 Képá, Issá Masihay kásed Shamun-Petrosay Aramái nám ent. án” o degaré gwashit: “Man Masihayg án”. 13 Masih záná bahr kanag butag? Záná é Pulos at ke pa shomaygi salibá dranjag but? Yá ke shomá Pulosay námá pákshódi*1:13 Pákshódiay labz, Yunáni zobáná “baptismah” gwashaga bit o eshiay máná “ápá bokk dayag” yá “gón ápá shódag” ent. dayag butét? 14 Hodáay shográ gerán ke Krispus o Gayusá abéd†1:14 Abéd (cha), bezán gayr cha. man cha shomá dega kass pákshódi nadátag 15 ke kass gwasht makant ke man Pulosay námá pákshódi dayag butagán. 16 Haw, man Estipánásay lógay mardom ham pákshódi dátagant, bale nazánán man dega kasé pákshódi dátag yá na. 17 Chéá ke Masihá maná pa pákshódi dayagá ráh nadátag, maná ráhi dátag ke wasshén mestágay járá bejanán, bale man é kárá pa habarzánti o dánáia nakanán ke Masihay salibay zór gár mabit.
Masih Hodáay dánái ent
18 Hamá mardom ke gári o gomsáriay ráhá ant, salibay kolaw áyáni hayálá ahmakié, bale má ke nejátay ráhá én, é kolaw pa má Hodáay zór o twán ent. 19 Chéá ke nebeshtah ent: “Man dánáyáni dánáia nést o nábuda kanán o aglmandáni aglá halás o nákára kanán.” ‡1:19 Eshayá Nabiay Ketáb 29:14.
20 Kojám dáná? Sharyatay kojám zánóger§1:20 Sharyatay zánóger, bezán dini álem o Mussáay Sharyatay zántkár.? É donyáay kojám habarzánt? Hodáyá wa záher kortag ke é donyáay dánái nádánié. 21 Hodáyá cha wati dánáiá dist ke mardom gón wati dánáiá maná pajjáha nayárant, gorhá paysalahi kort ke hamá mardom ke imána kárant, áyán hamé jár jatagén paygámay “ahmakiay” barkatá nejáta dayán. 22 Yahudi ásmáni neshánia lóthant, Yunáni dánáiay shóházá ant, 23 bale má Masihay járá janén, hamá Masih ke salib kasshag but, hamá Masih ke pa Yahudián mán gisshénókén sengé o pa darkawmán ahmakié, 24 bale pa gwánk jatagén mardomán, toré Yahudi bebant yá Yunáni, Masih Hodáay zór o Hodáay dánái ent. 25 Chéá ke Hodáay “nádáni” cha ensánay dánáiá dánáter ent o Hodáay “nezóri” cha ensánay zórá zórmandter ent.
26 Brátán! Watá bechárét, á wahdi ke Hodáyá shomárá gwánk jat, shomá ché atét? Ensáni hesábá becháray cha shomá bázéné dáná naat, bázéné zórmand naat, bázéné sardárzádag naat. 27 Bale Hodáyá pa dánáyáni sharmendag kanagá donyáay nádáni gechén kortant o pa zórmandáni sharmendag kanagá donyáay nezórii gechén kortant. 28 Hodáyá hamá chizz gechén kortant ke donyáay chammán hakir o béarzesh ant, néstén chizzi gechén kortant ke hastén chizzán nést o nákár bekant, 29 ke kass áiay démá pahr bast makant. 30 Shomá Hodáay barkatá Issá Masihayg ét, hamá Masih ke pa má Hodáay dánái jórh but, hamá Masih ke may rástáwari o páki o palgári jórh but o márá móketi*1:30 Mókagay máná edá esh ent ke pa kaséay jánay rakkénagá gránén kimaté dayag bebit, Pársiá “bázkharid”.. 31 Gorhá anchó ke nebeshtah ent: “Harkas ke pahra bandit, Hodáwanday sará pahr bebandit.”†1:31 Eremyá Nabiay Ketáb 9:24.
*1:1 1:1 Gwánk janag, bezán tawár kanag, lótháénag.
†1:2 1:2 “Palgártagén” hamá mardom ant ke gón Issá Masihay hóná cha wati gonáhán shódag o pák kanag butagant o é dhawlá pa Hodáyá dar chenag butagant.
‡1:10 1:10“Brátay” máná har báwarmand ent, mardén o janén.
§1:12 1:12 Képá, Issá Masihay kásed Shamun-Petrosay Aramái nám ent.
*1:13 1:13 Pákshódiay labz, Yunáni zobáná “baptismah” gwashaga bit o eshiay máná “ápá bokk dayag” yá “gón ápá shódag” ent.
†1:14 1:14 Abéd (cha), bezán gayr cha.
‡1:19 1:19 Eshayá Nabiay Ketáb 29:14.
§1:20 1:20 Sharyatay zánóger, bezán dini álem o Mussáay Sharyatay zántkár.
*1:30 1:30 Mókagay máná edá esh ent ke pa kaséay jánay rakkénagá gránén kimaté dayag bebit, Pársiá “bázkharid”.
†1:31 1:31 Eremyá Nabiay Ketáb 9:24.