1 Oo brátán! Shomá wata zánét ke shomay kerrá, may áyag bépáedag naat. 2 Anchó ke shomá zánét, má shomay kerrá áyagá pésar Pilipiay shahrá chón azáb o béezzat kanag butén, bale má cha wati Hodáay komakká tahm*2:2 Tahm, bezán hemmat, tawkal, jorat. o jorat kort o inchok dozhmeniay tahá ham má Hodáay wasshén mestág pa shomá sar kort. 3 É dazbandiá ke má kanén, eshiá radi yá badniyati mán nést o má shomárá rad dayag ham nalóthén, 4 Wasshén mestágay járá paméshká janagá én ke Hodáyá márá chakkásetag†2:4 Chakkásag, bezán ázmáesh kanag, emtehán gerag. o distagi ke má é káray láhek én. Má mardománi wassh kanagay johdá naén, Hodáay wassh kanagay johdá én, hamá Hodá ke may delána chakkásit. 5 Shomá zánét ke má hechbar cháplusi nakortag o na márá chérén tamáh o láleché‡2:5 Lálech, bezán tamáh, hers. butag. Hodá sháhed ent. 6 Cha mardomán tawsipay lóthók ham nabutagén, na cha shomá o na cha degarán, bell toré Masihaykásediay námá má wati ehtiár pésh dásht kortagat. 7 Bale má chó nakort o gón shomá anchó mehrabán atén ke máté gón wati chokkána bit. 8 Má pa shomá sakk wáhagdár§2:8 Wáhagdár, bezán lóthók, delmánag, hodónák. atén o pa galé gón shomá tahná Hodáay wasshén mestág bahr nakort, wati jenday zendagi ham bahr kort, chéá ke shomá márá sakk dóst atét. 9 Brátán! Shomárá may johd o zahmat allam yát ant. Wahdé má shomay kerrá Hodáay wasshén mestágay járá janagá atén, má shap o róch kár ham kort tánke cha shomá kaséay sará báré mabén. 10 Shomá sháhed ét o Hodá ham sháhed ent ke má báwarmandáni nyámá*2:10 Nyámá, bezán myáná, darnyámá, tahá, tóká., bezán shomay nyámá chónén pahrézkár o pák o béaybén zendé gwázént. 11 Shomá zánét ke má gón shomá har yakkéá anchosh atén ke mehrabánén peté gón wati jenday chokkána bit. 12 Má shomárá delbaddhi†2:12 Delbaddhi, bezán shábásh, sekén, tashwik. o deljami dát o dazbandi kort ke anchén zendé begwázénét ke Hodáay láhek bebit, hamá Hodá ke shomárá tawára kant ke dém pa mani bádsháhi o shán o shawkatá byáét.

13 Má modám Hodáay shográ gerén ke wahdé Hodáay habar shomárá sar but, hamá habar ke shomá cha má eshkot, shomá mannet ke ensáni habaré naent, Hodái habaré o anchosh ent ham. É Hodáay habar ent ke shomay bezán báwarmandáni delán asar kanagá ent. 14 Oo brátán! Shomá Hodáén Pet o Issá Masihay hamá kelisáyáni paymá kort ke Yahudiahá ant. Chéá ke shomárá shomay jenday mardomán hamá paymá ázár dát ke Yahudián á kelisá ázár dátant, 15 hamá Yahudián ke Hodáwandén Issá o paygambar koshtant o márá ham ázár dát. Á, Hodáyá nárazá kanant o harkasay dozhmen ant. 16 Á mardoma naylant ke má gón darkawmán wasshén mestágay bárawá habar bekanén, hamá mestág ke darkawmána rakkénit. É paymá á modám wati gonáhán tán goddhi‡2:16 Goddhi, bezán áheri. haddá rasénant o godhsará Hodáay kahr áyáni sará kapit.

17 Brátán! Má ke pa kammén wahdéá cha shomá jetá butén, bell ke dém pa dém naatén bale del wa hawár atant, delborrén zahirán márá har paymén johd parmát ke padá gón shomá dém pa dém bebén. 18 Mane Pulosá báz randá johd kort o má lóthet ke shomay gwará byáén, bale Shaytáná may ráh o dar band kortant. 19 Chéá ke may omét o may shádmáni shomá ét. Shomá may hamá táj ét ke má áiay sará pahra bandén, wati Hodáwandén Issáay bárgáhá§2:19 Bárgáh, bezán dém, darbár, hozur., hamá wahdá ke Hodáwanda kayt. 20 Haw, shomá may shán ét o shomá may shádmáni ét.