1 Pákén Ruh tachká tachka gwashit ke áheri zamánagán lahtén mardom imáná yalaha kant o rad dayókén ruháni randá kapit o hamá tálimáni némagá rawt ke palitén ruhesha dayant. 2 É tálim cha drógbandáni dotal o dopóstiá*4:2 Dotal o dopóst, bezán hamá mardom ke démá degar ant o poshtá degar, thagg, doru, dodém. pédá bant. É drógbandáni zamir gón taptagén ásenéá dág dayag o koshag butag. 3 É drógband, mardomán cha sur o árósá manah o makana kanant o lahtén warákay nawaragay hokmá dayant, hamá warák ke Hodáyá jórh kortagant ke báwarmand, bezán rástiay zánókesh pa shogrgozári bwarant. 4 Hodáay jórh kortagén har chizz sharr ent o chizzé ke yakkéá rasit, báyad ent pa shogrgozári bezuriti o dawri madant, 5 chéá ke gón Hodáay habará o gón báwarmanday dwáyá pák o palgár kanag butag.

6 Agan taw hamé chizzán báwarmandán†4:6 Asligén Yunáni nebeshtánka gwashit “brátán”. sój bedayay, gorhá bezán Issá Masihay sharrén hezmatkáré ay o imánay rástiáni tahá o sharrén tálimay tahá rostagay, hamá tálim ke taw cha pésará áiay randgiriá kanagá ay. 7 Watá cha watgarhén o bé sar o pádén kessahán ke gón Hodáyá hecch sar o káresh nést, dur bedár. Gón eshán sar o chér bayagay badalá watá Hodátorsiay tamriná beday. 8 Chéá ke jesmi tamrin bépáedag naent, bale Hodátorsiay páedag har hesábá báz ent ke pa annugén zendá ham Hodáay kawl o karári gón ant o pa áyókén zendá ham. 9 É gapp rást ent o karzit ke sarjamiá mannag bebit. 10 Paméshká má wati wasá kár o johda kanén, chéá ke má wati omét namiránén Hodáay sará bastag. Sajjahén mardománi rakkénók hamá ent, hás hamáyáni rakkénók ent ke imána kárant. 11 É habaráni hokm o tálimá beday.

12 Tai kasánomriay sawabá kass tará kamarzesh sarpad mabit o tai goptár o kerdár o mehr o imán o páki pa báwarmandán mesálé bebant. 13 Tán mani áyagá watá gón é kárán dazgatth kan: pa mardomán Pákén Ketábá borztawáriá bwán o áyán delbaddhi‡4:13 Delbaddhi, bezán shábásh, sekén, tashwik. o tálim beday.

14 Cha wati hamá ruhánién nyámatá nádelgósh mabay ke tará hamá wahdá raset ke kamásháni rombá§4:14 Romb, bezán gróh, thóli. tai sará dast ér mosht o yakkéá tará gón Pákén Ruhay elhámá é nyámatay hál dát. 15 Pa hobb o hodónáki é kárán bekan o watá sarjamá pa eshán wapk*4:15 Wapk, bezán chizzé ke pa Hodáyá gisshénag butag. Arabi o Pársiá “waqf”. kan ke harkas tai démrawiá begendit. 16 Wati zend o tálim dayagay némagá sharriay sará delgósh bekan o démá baránesh kan. Agan é kárán bekanay, watá ham rakkénay o wati gósh dárókán ham.