3
Kamáshay láheki
1 É gapp rást ent ke á kas ke kelisáay kamáshé bayaga lóthit, á pa sharrén káréá wáhagdár ent. 2 Báyad ent kelisáay kamásh anchéné bebit ke áiá mardománi malámat per mabit. Gón wati janá wapádár bebit, grán o sanginén mardomé bebit o watá dásht bekant, marháhdár*3:2 Marháhdár, bezán sharapdár, ezzatmand. o mehmánnawáz bebit o sharriá tálim dát bekant, 3 sharábié mabit, sheddatién mardomé mabit, narmtabé bebit, jangólé mabit, zardósté mabit. 4 Á báyad ent wati lógay mardománi rahshóniá†3:4 Rahshóni, bezán rahbari, saróki, rahdarbari. sharriay sará bekant o pa ezzat wati chokkán anchó beródénit ke á parmánbardár bebant. 5 Kasé ke wati jenday lógay mardománi rahshóniá sharriay sará kort makant, Hodáay kelisáay hayáldáriá chón korta kant? 6 Kelisáay sarparast báyad ent nókbáwaré mabit, chó mabit ke gorunák‡3:6 Gorunák, bezán magrur, porkebr. bebit o hamá paymá mayárbár bebit ke Shaytán but. 7 Á báyad ent nábáwaráni kerrá ham washnám bebit ke shegánig mabit o Shaytánay dámá makapit.
Hezmatkáray láheki
8 Hamé paymá báyad ent kelisáay hezmatkár ham ezzatmandén mardom bebant, tachk o rást bebant, sharábi mabant o pa zarr o málá lálech§3:8 Lálech, bezán tamáh, hers. o tamáh makanant. 9 Á báyad ent gón pákén zamiré imánay ráz o ramzáni sará wati báwará mohr bedárant. 10 Pésará báyad ent áyáni kár chárag bebant. Agan áyáni helápá hecch dast nakapt, gorhá pa hezmatkáriá zurag bebant.
11 Hamé paymá áyáni jan ham ezzatmand bebant, mardománi báposhtá habar makanant, grán o sangin bebant o har hesábá imándár bebant.
12 Hezmatkár ham gón wati janá wapádár bebit o wati lógay mardománi rahshóniá sharriay sará bekant. 13 Á ke sharriá hezmata kanant, áyán mazanén ezzaté bit o pa deléri gwashta kanant ke má Issá Masihay báwarmand én.
Hodádóstiay ráz
14 Bell toré maná é omét hastent ke zutt tai kerrá byáyán, bale angat é sar o sóján pa taw nebeshtah kanagá án ke 15 agan man dér kort, taw bezánay ke Hodáay lógay mardom báyad gón yakdomiá che paymá pésh byáyant, hamá ke namiránén Hodáay kelisáay mardom ant o rástiay menok*3:15 Menok, bezán menag, sotun. o bonyád ant.
16 Béshakk Hodádóstiá mazanén rázé mán:
Á, ensánéay shekl o dróshomá†3:16 Dróshom, bezán shekl, surat. záher but,
Pákén Ruhá áiay rásti sábet kort,
préshtagán á dist,
kawmáni nyámá áiay jár janag but,
donyáay tahá áiay sará imánesh áwort,
á, porshawkatén arshá barag but.