1 Hamá mardom ke golámiay jogay*6:1 Jog dáré ke pa zeminay nangár kanagá do gókay gardená bandanti. chérá ant, báyad ent bezánant ke áyáni wájah sarjamén sharapay láhek ant. É paymá Hodáay nám o imánay tálim bohtám janaga nabant. 2 Hamá golám ke áyáni wájah báwarmand ant, nabáyad wati wájahán é háterá kamter ezzat bedayant ke imánay bonyádá brát ant. É golám báyad ent angat géshter wati wájaháni hezmatá bekanant, chéá ke esháni hezmat dóstigén báwarmandéá páedaga dant. É chizzáni tálimá beday o gón mardomán dazbandi kan ke anchosh bekanant.

3 Agan kasé radén tálim bedant o cha may Hodáwandén Issá Masihay rástén habarán o Hodátorsiay tálimá dur bebit, 4 á gorunák ent o hecch sarpada nabit. Áiá nathahag o labz o mánáyáni sará arh o korh kanag wassha bit o é nádráhié. Eshiay ásar hamá mardománi nyámá hasadd, sest o séd, bohtámjani, badgománi o 5 dáemi jérhah o janjál ent ke áyáni pegr o hayál sell tarretagant o á cha rástiá dur barag butagant. Esháni gomán hamesh ent ke Hodátorsi páedagmandén kár o báré.

6 Bale rástén gapp esh ent ke Hodátorsi gón razámandiá mazanén páedagé. 7 Chéá ke má donyáyá hecch nayáwortag o wati hamráhiá cha donyáyá hecch bort ham nakanén. 8 Nun, agan márá warák o póshák hast, bass ent, rázig bebén.

9 Hamá ke sér bayaga lóthant, watá chakkásán†6:9 Chakkás, bezán ázmáesh, emtehán. dawra dayant o anchén ahmak o táwán dayókén wáhagáni dámá kapant ke mardomá tabáhi o barbádiá dawra dayant. 10 Chéá ke zardósti har warhén badén káráni risshag o wandhál‡6:10 Wandhál, bezán hondhál, risshag o rótag. ent. Lahtén ke pa zarrá hodónák§6:10 Hodónák, bezán wáhagdár, armáni, lóthók, delmánag. ent, imánay ráhesh yalah dátag o gam o ranján kaptagant.

11 Bale taw, oo Timutáus, Hodái mardomé ay. Cha é chizzán watá dur bedár o pahrézkári, hodátorsi, imán, mehr, sabr o ópár o narmtabiay randá bekap. 12 Imánay nékén johdá bekan. Abadmánén zendá dastá byár, hamá zendá ke pa áiá gwánk janag butagay o bázén sháhedéay démá hamé nékén ekráret kortag ke taw Issá Masihay báwarmandé ay.

13 Hodáay bárgáhá*6:13 Bárgáh, bezán dém, darbár, hozur., hamá Hodá ke har chizzá zenda bakshit o Issá Masihay bárgáhá, hamá Masih ke Pontius Pilátusay démá wati sháhediay tahá nékén ekrári kort, man tará hokma dayán ke 14 tán may Hodáwandén Issá Masihay áyagá, Hodáay bépóleng†6:14 Bépóleng, bezán sáp o sallah, palgár. o béaybén hokmán bemann. 15 Hodáwandén Issá Masihay áyagay wahdá Hodá wata gisshénit, hamá yakkén mazanshánén Hákem ke bádsháháni Bádsháh o hodáwandáni Hodáwand ent, 16 hamá ke yakk o tahná namirán ent o áiay dargáh anchén rozhné ke kass ódá raseta nakant o kassá nadistag o disti ham nakant. Áiay sharap o ezzat o zór o wák tán abad barjáh bát. Anchosh bát. Ámin.

17 Hamá mardom ke é donyáyá hastómand ant, áyán hokm beday ke gorunák mabét o wati ométá gón wati mál o hastiá mabandét ke mál o hastia kayt o rawt. Wati ométá Hodáay sará bebandét ke gón daspachi márá alkáp o peráwánén zendé dant. 18 É mardomán sój beday ke sharrén kár bekanant, nékiá sarréch o málá daspach bebant. 19 É dhawlá, á pa wat ganjé moccha kanant ke pa áyáni áyókén zendá mohkamén bonyádé bit o hamá zendá dastá kárant ke hakk o delén zendé.

20 Oo Timutáus! Harché ke tai amánat kanag butag, áiay negahpániá bekan. Watá cha bé sar o pádén gappán ke gón Hodáyá hecch sar o káresh nést dur bedár o watá cha hamá drógén tálimán ham dur bedár ke pa radi zántay nám dayag butagant. 21 Lahténá é tálimáni randgiri kort o imánay ráhesh yalah dát.

Hodáay rahmat shomay sajjahénáni sará sáhél‡6:21 Sáhél, bezán sáheg kanag. bát.