1 Cha Pulosay némagá, mane Pulos ke cha Hodáay razáyá Issá Masihay kásedé án tánke hamá zenday kawl o wádahay járá bejanán ke cha Issá Masihá rasit,

2 pa mani dordánagén chokk Timutáusá.

Tará cha Hodáén Pet o may Hodáwandén Issá Masihay némagá rahmat o rahm o émeni sar bát.

3 Man shap o róch ke wati dwáyáni tahá modám tará yáta kanán, Hodáay shográ gerán, hamá Hodá ke man gón pákén zamiréá áiay parastesh o hezmatá kanán, anchó ke mani pet o pirokán kortag. 4 Tai arsáni tránagá*1:4 Tránag, bezán yát, hayál, tahtál. ke kapán, maná pa tai didárá zahira kant ke tará begendán o galá bál bebán. 5 Tai bégarazén†1:5 Bégaraz, bezán hamá ke garaz o tamáhi nést. imánay yátá kapán ke awalá tai ballok Luis o tai mát Yunikahay delá jágahi kort o man deljam án ke nun tai delá ham jágahi kortag.

6 Paméshká man tará tránagá géján ke Hodáay dátagén nyámatá dobar kármarz kan, hamá nyámat ke tará cha hamá wahdá gón ent ke man wati dast tai sará ér moshtant. 7 Chéá ke Hodáyá márá choshén ruhé nadátag ke márá bozdel bekant, márá zór o wák o mehr o dáshtay‡1:7 Dásht, bezán wati napsay dáragay twán, wati ger o dár, wati kanthról. Ruhi bakshátag. 8 Gorhá may Hodáwanday bárawá sháhedi dayagá lajj makan. Mani hálatay sará ham sharmendag mabay ke man pa Hodáwandaygi bandig án. Man pa wasshén mestágá§1:8 Mestág, bezán wasshén hál, bashárat. é sakki o sórián ke bardásht kanagá án, tawesh ham gón Hodáay bakshátagén zórá bardásht kan. 9 Hodáyá márá neját dátag o pa pákén zendéá gwánk jatag*1:9 Gwánk janag, bezán tawár kanag.. Márá may kortagén káráni sawabá gwánki najatag, wati jenday erádah o rahmatay bonyádá gwánki jatag o é rahmat márá Issá Masihay barkatá, cha azalá dayag butag o 10 nun gón may rakkénókén Issá Masihay áyagá záher butag, hamá Issá Masihá ke markay jend nést o nábud kort o cha wasshén mestágay ráhá abadmánén zend záher kort. 11 Man gechén kanag butagán ke é wasshén mestágay jár janók o kásed o tálim dayóké bebán.

12 Man paméshká sakki o sóri saggagá án, bale sharmendag naán chéá ke zánán man kai sará imán áwortag o deljam án ke áiá é wák o twán hast ke tán wati áyagay róchá hamá amánatay negahpániá bekant ke maná dátagi. 13 Harché ke taw cha man eshkotag, é rástén tálim ant. Eshán wati kerrá bedár o pa imán o mehr esháni sará kár kan, chéá ke taw Issá Masihay ráhá ay. 14 Hamá wasshén mestág ke tai amánat ent, gón Pákén Ruhay komakká, áiay negahpániá bekan, hamá Pákén Ruh ke may tahá zendag ent.

15 Taw zánay ke Ásiáay†1:15 Á wahdá, Ásiáay máná annugén Torkiahay rónendi némag at. damagay‡1:15 Damag, bezán hand, elákah, ostán, subah. sajjahén mardomán maná yalah dátag, Pigélus o Hermugénes ham á rombá§1:15 Romb, bezán gróh, thóli. gón ant.

16 Hodáwand Onésiporusay lógay mardománi sará mehrabán bát, chéá ke báz bará mani arwáhi tázah kortag o mani zamziláni sawabá sharmendag nabutag. 17 Wahdé Rumay shahrá átk, maná sakk báz shóházi kort o dari gétk. 18 Hodáwand wati áyagay róchá Onésiporusay sará mehrabán bát. Wahdé man Epésosay shahrá atán, taw sharr zánay ke áiá chinkadar mani hezmat kort.