2
Rahmat o ópár
1 Oo mani chokk! Gorhá taw hamá rahmatay barkatá ke márá cha Issá Masihay némagá rasit, watá mohr o mohkam bedár. 2 Harché ke man bázén sháhedéay démá gwashtag o taw eshkotag, é tálimán anchén porehtebárén mardománi sepordah bekan ke degarán tálim dát bekanant.
3 Issá Masihay sharrén sepáhigéay*2:3 Sepahig, bezán pawji, arteshi, lashkari. paymá, sakki o sóriáni saggagá gón bay. 4 Hamá sepáhig ke jangá rawt watá gón é dega kárán dazgattha nakant. Á lóthit ke mani apsar cha man razá bebit. 5 Hamé dhawlá, kasé ke layb o gwáziá bahra zurit, tánke rahbandáni hesábá layba nakant, áiá katthókay†2:5 Katthók, bezán bájay barók, hamá ke kámyáb o sóbmanda bit. tája narasit. 6 Kesháray awali bahr báyad ent dehkáná berasit ke hédi rétkag. 7 Harché man gwashagá án, esháni sará pegr bekan ke Hodáwand tará é sajjahén chizzáni zánt o sarpadiá dant.
8 Issá Masihá yát bekan, hamá ke Dáuday nasl o óbádagé‡2:8 Óbádag, bezán nasl o padréch, chokk o nomásag. o cha mordagán zendag but. Hamé mani paygám ent o 9 pa hameshiá sakki o sória saggán, tantaná§2:9 Tantaná, bezán hattá, tán é haddá ke. chó radkárá zamzilán bastagán. Bale Hodáay habar zamzilán nabastag. 10 Gorhá Hodáay gechén kortagénáni háterá man har chizza saggán ke áyán ham neját berasit. É neját o eshiay abadmánén shán o shawkat Issá Masihay sará imán áragay barkatá rasit.
11 É gapp rást ent ke:
Agan má gón Issáyá mortagén,
gorhá gón áiá zendag ham bén.
12 Agan má sakki o sórián besaggén,
gón áiá bádsháhi ham kanén.
Agan má áiay moridiá enkár bekanén,
á ham may pajjáh áragá enkára kant.
13 Agan má gón áiá béwapái bekanén,
á gón má angat wapá kant,
chéá ke á wati tab o sareshtay*2:13 Saresht, bezán pédáeshi tab, zát, báten, jawhar. helápá shota nakant.
Hodáwanday hezmatkár
14 Báwarmandán modám é chizzáni tránagá begéj. Hodáyá sháhed kan o áyán habardár kan ke labz o mánáyáni sará jang makanét. É chizzán hecch arzesh nést, hoshká gósh dárókáni imáná tabáha kanant. 15 Wati sajjahén johdá bekan ke watá Hodáay démá ke pésha kanay, Hodáay kabul kortagén mardomé bebay, anchén kár kanóké bebay ke sharmendag bayagay zalurati mabit o rástiay habará bé radiá bayán bekant.
16 Watá cha bé sar o pádén gappán ke gón Hodáyá hecch sar o káresh nést, dur bedár chéá ke choshén gapp o rapp, mardomá cha Hodáyá róch pa róch durtera kanant. 17 É paymén gapp o habar báwarmandáni nyámá anchó shenga bant ke shummakay†2:17 Shummak, bezán Engréziá “kaynser” o Pársiá “saratán”. nájórhi badaná shenga bit. Himenáus o Pilétus anchén mardomán ant 18 ke rástiay ráhesh yalah dátag. Á gwashant ke mordag wa chónáhá cha kabrán pád átkag o zendag butagant, o é paymá lahténay imáná tabáha kanant.
19 Bale padá ham Hodáay sará báwarmand mohra óshtant, lógéay mohkamén bonyáday paymá. Hodáyá wati báwarmandáni sará é habar naksh kortag o mohr jatagant: “Hodáwand wati mardomán pajjáha kárit” o “Harkas ke Hodáwanday námá gipt, báyad ent watá cha badkáriá dur bedárit.”
20 Sérén mardoméay lógay darp o hirán tahná teláh o nograhayga nabant, dár o gelay darp ham bit. Lahtén darp o hirán pa hásén kárán kár bandaga bit o lahtén pa adnáén‡2:20 Adná, bezán arzán, kamkimmat, kamarzesh. kárán. 21 Agan kasé watá cha badkáriá dur bedárit o watá palgár bekant, pa hásén kárán darpé bit, pák o palgár kanaga bit, wati wáhonday§2:21 Wáhond, bezán málek, hodábond. dardá wárt o pa har sharrén kárá tayára bit.
22 Watá cha warnáiay hawá o hawasán dur bedár o hamá mardom ke gón sápén delé Hodáwanday námá gerant, áyáni hamráhiá pahrézkári o imán o mehr o émeniá shóház bekan. 23 Tará gón ahmak o násarpadén gappán kár mabit, chéá ke taw zánay ke é gapp, arh o korh páda kanant. 24 Hodáwanday hezmatkár báyad ent arh o korh makant. Arh o korhay badalá gón harkasá mehrabán bebit, tálim dát bekant o sagg o bardáshti báz bebit. 25 Wati helápén mardomán pa narmi rástén ráhá sój bedant, balkén Hodá áyán móh bedant ke tawbah bekanant o rástiay zántá sar bebant, 26 hósh o sár bekanant o cha Shaytánay dámá bechotthant, hamá Shaytán ke é mardomi bandig kortagant tánke áiay wáhagá sarjam bekanant.
*2:3 2:3 Sepahig, bezán pawji, arteshi, lashkari.
†2:5 2:5 Katthók, bezán bájay barók, hamá ke kámyáb o sóbmanda bit.
‡2:8 2:8 Óbádag, bezán nasl o padréch, chokk o nomásag.
§2:9 2:9 Tantaná, bezán hattá, tán é haddá ke.
*2:13 2:13 Saresht, bezán pédáeshi tab, zát, báten, jawhar.
†2:17 2:17 Shummak, bezán Engréziá “kaynser” o Pársiá “saratán”.
‡2:20 2:20 Adná, bezán arzán, kamkimmat, kamarzesh.
§2:21 2:21 Wáhond, bezán málek, hodábond.