1 هما رۆچان که مرید گێشا چه گێشتر بئیان اتنت، یونانی یَهودی*6‏:1 یونانی یَهودی، هما یَهودی اتنت که یونانی دۆد و رَبێدگئے رَندگیر اتنت و آیانی زبان یونانی اَت. چه اِبرانی یَهودیان گِلگدار اتنت که هر رۆچیگێن وَرد و وراکئے بهر کنگا، آیانی جنۆزامان چیزّے نرسیت. 2 دوازدهێن کاسِدان، سجّهێن مرید لۆٹتنت و گوَشتِش: «اے هبر شَرّ نه‌اِنت که ما وَرد و وراکئے وَنڈ و بهر کنگئے کارانی سئوَبا، چه هُدائے پاکێن هبرئے هِزمتکاریا نادلگۆش ببێن. 3 پمێشکا، او براتان! چه وت هپت اَنچێن نێکنامێن مردم گچێن بکنێت که چه پاکێن روه و هُدایی زانت و زانگا سررێچ ببنت تان اے زِمّه و ڈُبَّها†6‏:3 ڈُبَّه، بزان اُگده، زِمّه، اربی و پارسیا «وظیفه». همایانی کۆپگا بلَڈّێن و 4 وت په دْوا و هُدائے پاکێن هبرئے هِزمتکاریا دَزگٹّ ببێن.» 5 اے شئور، سجّهێنان دۆست بوت و اے مردمِش گچێن کرتنت: اِسْتیپان که چه ایمان و پاکێن روها پُرّ اَت، پیلیپُس، پْروکورُس، نیکانور، تیمون، پارمیناس و اَنْتاکیَهئے یَهودی بوتگێن باورمند نیکولاس. 6 اے مردمِش کاسِدانی دێما آورت و پێش کرتنت. کاسِدان په آیان دْوا کرت و دست بڈّا جتنت. 7 اے ڈئولا هُدائے پاکێن هبر مردمانی نیاما تالان بوت و اورْشَلیما مرید سکّ زوتّ گێشا چه گێشتر بئیانَ بوتنت. بازێن دینی پێشواے هم اے باورئے مَنّۆگر بوت.

8 اِسْتیپان چه هُدائے رهمت و زۆرا پُرّ اَت و آییا مردمانی نیاما مزنێن مۆجزه و اَجَبَّتێن نشانی دێما آورت، 9 بله چه یَهودیانی یک کَنیسَهێا که نامی «آزات بوتگێن گُلامانی کَنیسَه»‡6‏:9 یَهودیانی پرستشگاهانی نام «کَنیسَه» اِنت. اَت، لهتێن مردم چه آییا نارَزا اَت. آ چه کِرینی و اِسْکَنْدَریَهئے شهر و کیلیکیَه و آسیائے دَمگان اتنت و گۆن اِسْتیپانا دَپجاکا لگّتنت. 10 بله اِسْتیپان گۆن اَنچێن روه و زانتێا هبر کنگا اَت که آییئے دێما اۆشتاتِش نکرت. 11 گڑا لهتێن مردمِش رَد دات تان بگوَشنت: «ما اِشکتگ اِسْتیپانا موسّا و هُدائے بارئوا کپر کرتگ.» 12 آیان، مردم و کئومئے کماش و شَریَتئے زانۆگر شۆرێنتنت و اِسْتیپانش گپت و کَشّکان، سرۆکانی دیوانا پێش کرت. 13 درۆگێن گواه و شاهدِش آورت، آیان شاهدی دات و گوَشت: «اے مرد هُدائے پاکێن لۆگ و شَریَتئے هلاپا، چه بد و ناراهێن هبر کنگا هچبر دستَ نکَشّیت. 14 ما وت اِشکت، گوَشتی: ‹ایسّا ناسِری اے جاگها کرۆجیت و آ رسم و رئواجان بدلَ کنت که موسّایا په ما اِشتگ‌اَنت.›»

15 دیوانئے سجّهێن نندۆکان چمّ په اِسْتیپانا سکّ داتگ‌اتنت و دیستِش آییئے دێم، پرێشتگێئے دێمئے ڈئولا اِنت.