1 پولُس و بارنابا وتی هێل و آدتئے پدا، اِکُنیَهئے شهرا هم یَهودیانی کَنیسَها شتنت. اۆدا آیان اَنچێن دابێا هبر کرت که بازێن یَهودی و یونانی باورمند بوتنت. 2 بله هما یَهودی که باور کنگا تئیار نه‌اتنت، آ دگه درکئومێن مردمِش شۆرێنتنت، آیانی پِگرِش پولُس و بارنابائے هلاپا تَرّێنت و زهررێچ کرتنت. 3 پولُس و بارنابایا تان بازێن وهدے همۆدا داشت و په نَتُرسی هُداوندئے بارئوا شاهدی‌اِشَ دات. هُداوندا آ، په مۆجزه و اَجَبَّتێن نشانی پێش دارگا واک و توانَ داتنت و اے ڈئولا پَدّریَ کرت که آییئے مِهر و رهمتئے کُلئو و پئیگام راست اِنت. 4 شهرئے مردمانی نیاما جێڑه و ناتِپاکیا سر کَشّت. بهرے یَهودیانی نێمگا بوت و آ دگه بهر گۆن ایسّائے کاسِدان همراه بوت. 5 یَهودی و درکئوم هۆر بوتنت و گۆن وتی هاکمانی همراهیا، کاسِدانی آزار دئیگ و سِنگسار کنگئے شئورِش کرت. 6 کاسِد سهیگ بوتنت و چه اۆدا جِست و لیکاوونیَهئے دَمگئے شهر، لِسْتْرَه و دِرْبِه و اے دگه کِرّ و گوَرانی هلک و هنکێنان شتنت. 7 همۆدا ایسّائے وشّێن مستاگِش تالان کرت.

8 لِسْتْرَها، یک مردے هست‌اَت که پێدایشی لَنگے اَت و هچبر گامی جت نکرتگ‌اَت. 9 آ پولُسئے هبران اِشکنگا اَت، پولُسا تچکاتچک آییئے نێمگا چارِت و زانتی که آییا په دْرهبکشیا ایمان و باور هست. 10 گڑا پولُسا په بُرزتئواری گوَشت: «پاد آ، وتی پادانی سرا بۆشت.» آ مرد جاه سِرّت و رئوگا لگّت. 11 وهدے مردمان پولُسئے اے کار دیست، لیکاوونیَهئے گالوارا گوَشتِش: «اے هُدا اَنت که بنی آدمئے شِکل و دْرۆشما په ما اێر آتکگ‌اَنت.» 12 آیان، بارنابا «زِووس» نامێنت و پولُس «هِرْمِس»،*14‏:12 یونانیانی باور اَت که زِووس و هِرمِس دو هُدا اَنت، زِووس مسترێن هُدا و هِرمِس هُدایانی ترجمان و سُهُنگۆ اِنت. چیا که مسترێن هبر کنۆک پولُس اَت. 13 زِووسئے پرستشگاه شهرئے ڈنّا اَت. پرستشگاهئے مسترا، په پولُس و بارنابایا کاییگرێن†14‏:13 کاییگر، بزان مزنێن نَرێن گۆک. گۆک و پُلّ و شۆشِنگ شهرئے دروازگا آورتنت. پرستشگاهئے مستر و مردمانی رُمب همے شئورا اتنت که په آیان کُربانیگ بکننت.

14 وهدے کاسِد، بزان پولُس و بارنابا چه آیانی اے واهگا سهیگ بوتنت، وتی پُچّ و پۆشاکان دِرّان و چاک دئیانا، گۆن کوکّارے مردمانی مُچّیئے نیاما آتکنت. 15 گوَشتِش: «او مردمان! شما چے کنگا اێت؟ ما شمئے ڈئولێن بنی آدم اێن و بسّ. آتکگێن شمارا اے مستاگا بدئیێن که اے هراب و ناهودگێن کاران یله بکنێت و بَرهَکّ و نمیرانێن هُدائے کِشکا بگرێت. آییا آسمان، زمین، دریا و هرچے که آیانی تها هست‌اِنت، اڈّ کرتگ‌اَنت. 16 پێسریگێن زمانگا، هُدایا سجّهێن کئوم مۆکل داتگ‌اَنت که وتی راها وت گچێن بکننت. 17 اَنگت هم آییا وتا چه گواهی دئیگا دور نداشتگ. په وتی مِهرئے درشان کنگا، چه آسمانا هئورَ گوارێنیت و پُربرێن کِشاران په مۆسمَ رۆدێنیت، شمارا په الکاپی وَرد و وراکَ دنت و شمئے دلان چه وشّیان سررێچَ کنت.» 18 گۆن اے هبران، کاسِدان په هیلّتے مردم چه هئیرات و کُربانیگ کنگا داشتنت.

19 بله لهتێن رۆچا و رَند، بازێن یَهودی چه اَنْتاکیَه و اِکُنیَها آتک و شهرئے مردمِش وتی نێمگا تَرّێنتنت. پولُسِش سِنگسار کرت و گۆن اے هئیالا که مُرتگ، کَشّان کنان چه شهرا ڈنّ دئور دات، 20 بله وهدے مرید پولُسئے چپّ و چاگردا آتک و مُچّ بوتنت، آ پاد آتک و شهرا پِر ترّت. دومی رۆچا، بارنابائے همراهیا، دِرْبِهئے شهرا شت.

21 مان دِرْبِهئے شهرا هم، ایسّائے وشّێن مستاگِش تالان کرت و بازێن مردمے مریدِش کرت. پدا لِسْتْرَه، اِکُنیَه و اَنْتاکیَها پِر ترّتنت. 22 مریدِش سر و سۆج کرت و دِلبڈّی داتنت که وتی باورا مُهر بدارنت. گوَشتِش: «ما، گۆن بازێن سکّی و سۆریانی سَگّگا هُدائے بادشاهیا شتَ کنێن.» 23 آیان په هر کِلیسایا کماش گچێن کرت و گۆن رۆچگ و دْوایا، آ کماشِش هما هُداوندئے باهۆٹ کرتنت، که آییئے سرا باورِش کرتگ‌اَت. 24 چه پیسیدیَهئے دَمگا گوَزان بوت و پَمْپیلیَها آتکنت. 25 پدا پِرْگَها، هُدائے مستاگِش رسێنت و دێم په اَتّالیَهئے شهرا‡14‏:25 اَتّالیَه، بزان انّوگێن اَنْتالیَه. جهلاد بوتنت.

26 چه اَتّالیَها، بۆجیگا سوار بوت و اَنْتاکیَها پِر ترّتنت. چه همۆدا په هما کار و مُهیمّا§14‏:26 مُهیمّ، بزان هاسێن کارے. هُدائے مِهر و رهمتانی سپرده کنگ بوتگ‌اتنت، که نون آیان سَرجم کرتگ‌اَت. 27 وهدے پولُس و بارنابا اَنْتاکیَها رَستنت، آیان کِلیسائے مردم مُچّ و یکجاه کرتنت. هر کارے که هُدایا چه آیانی دستا کناێنتگ‌اَت، گۆن آیان گوَشتِش و هالِش دات که هُدایا په درکئومان هم ایمان و باورمندیئے دروازگ پَچ کرتگ. 28 پولُس و بارنابا تان دێرا گۆن اَنْتاکیَهئے مریدان منتنت.