1 Mana lóthán shomá bezánét ke man pa shomá chinchok johdá án, pa shomá o pa Lawdikiáay báwarmandán o pa hamáyán ke maná dém pa démá nadistagesh. 2 Mani maksad esh ent ke shomárá delbaddhi berasit o pa mehr tepák bebét tánke kámelén deljami o ganjén zántay wáhond bebét o Hodáay rázá, bezán Masihá bezánét, 3 hamá Masih ke hekmat o dánáiay sajjahén ganj áiay arwáh o jabiná ér ent. 4 Man paméshká chosha gwashán ke yakké gón wati charpén gappán shomárá rad madant. 5 Bell toré man cha shomá dur án, bale mani del gón shomá ent o wahdé gendán ke shomá chó shehm o rahdár*2:5 Shehm o rahdár, bezán hamá mardom ke ráh o rahbandána mannit. Ordu o Pársiá “pa nazm o tartib”, “Angréziá disciplined”. ét o Masihay sará shomay imán chó mohr ent, gala bán.

6 Gorhá anchó ke shomá Issá Masih wati Hodáwand mannetag, shomay zend ham modám hamé chizzá záher bekant. 7 Shomay bonyád Masih bebit o shomay risshag o wandhál†2:7 Wandhál, bezán hondhál, risshag o rótag. hamáiá sakk bebant. Wati imáná hamá paymá mohr o mohkam bekanét ke shomárá tálim dayag butag o shogrgozáriá sarréch bebét.

8 Bechárét kasé gón palsapah o besarén prébá shomárá wati dámá maperrénit ke esháni bonyád Masih naent, é ensáni rasm o rawáj o donyái ráh o rahband ant. 9 Chéá ke Hodáay sajjahén kámeliá jesmi suratá Issáay badanay tahá jágah kortag o 10 Masihay barkatá shomárá har chizz hast, hamá Masih ke har zór o wákay sará sardast ent. 11 Shomá ke Masihay sará imán áwort, sonnat kanag ham butét, bale é jesmi sonnaté naat o ensáni dastéá nakort. É sonnat shomay gonahkárén tab o sareshtay‡2‏:11 Saresht, bezán pédáeshi tab, zát, báten, jawhar. borrag o dawr dayag at ke Masihá kort. 12 Hamá wahdá ke shomá pákshódi§2‏:12 Pákshódiay labz, Yunáni zobáná “baptismah” gwashaga bit o eshiay máná “ápá bokk dayag” yá “gón ápá shódag” ent. kort, gón Masihá kabr kanag butét o shomá ke Hodáay hamá wák o kodratay sará imán áwort ke Masihi cha mordagán zendag kort, gón Masihá zendag kanag ham butét.

13 Pésará shomá wati gonáháni tahá mortagatét, chéá ke shomay gonahkárén tab o saresht borrag o dawr dayag nabutagat, bale Hodáyá shomárá gón Masihá zendag kort. May sajjahén gonáhi bakshetant o 14 wámáni hamá daptar ke márá mayárbár kanagá at, Hodáyá á daptar salibá méh jat o wám halás kortant. 15 Wahdé Masihá salibay sará ján dát, nadistagén jahánay hákem o wákdáráni sará báládast but, áyáni seláhi pach geptant o mahlukay démá roswái kortant.

16 Gorhá kassá é hakká madayét ke warag o nóshagi chizzáni sará, yá nókay*2‏:16 Nók, bezán máh ke nóki gendaga bit. jashn yá Shabbat yá aidéay sará shomárá mayárig bekant. 17 É rahband áyókén chizzáni násarjamén shekl butagant, bale asl Masih ent. 18 Hamá mardomán ke préshtagáni parastesh o drógén békebri†2‏:18 Békebri, bezán kebr o gorur nakanag, magrur nabayag. dósta bit, áyán maylét ke shomárá cha shomay enámá zebahr‡2:18 Zebahr, bezán bébahr. bekanant. É mardom wati elhám o shobénagáni bárawá sakk báz habara kanant o ensáni hayáláni gwátá porr ant. 19 É mardom cha sará, bezán cha Masihá sestagant, hamá sar ke sarjamén jánay band o bóg o ragána jorhénit§2:19 Jorhénag, bezán wasl kanag, gón yakdegará hór kanag. o yakka kant o hamá paymá ródénit ke Hodá lóthit.

20 Shomá ke gón Masihá mortagét o cha é donyáay ráh o rahbandán ázát ét, gorhá chéá anchó zenda gwázénét ke gwashay angat é donyáay rahbandáni páband ét? 21 “É chizzá kár madár. Á chizzá machash. É chizzá dast majan.” 22 É sajjahén rahband ensáni parmán o tálimáni pédá kortagén ant o hamá chizzáni bárawá ant ke kármarz kanaga bant o halása bant. 23 Záherá é rahbandáni bonyád dánái ent. É rahband ebádat o békebri o badanay ázár dayagay gappá kanant, bale drost békár ant o pa hawá o hawasáni ger o dárá hecch kára nadayant.