1 Gorhá shomá ke gón Masihá zendag kanag butagét, wati del o hayálá gón ásmáni chizzán bekanét, hamódá ke Masih Hodáay rástén kashá neshtag. 2 Hayálá gón donyáyá makanét, gón arshá bekanét. 3 Shomá mortagét o shomay asligén zend Hodáay bárgáhá*3:3 Bárgáh, bezán dém, darbár, hozur. Masihay kerrá ér ent. 4 Wahdé shomay zenday sarchammag†3:4 Sarchammag, bezán sarchashmah., bezán Masih záhera bit, áiay hamráhiá shomá ham pa sháné záhera bét.

5 Gorhá wati sajjahén donyái wáhagán bekoshét, chó ke bénangi, nápáki, hawá o hawas, badén wáhag o tamáh o lálech‡3‏:5 Lálech, bezán tamáh, hers. ke botparastié. 6 Hamé káráni sawabá náparmánén mardománi sará Hodáay kahr o gazaba kapit. 7 Shomá ham yakk wahdé, bezán wati hodánáparmánén zendá hamé kár kortagant. 8 Bale nun é sajjahén chizzán, bezán zahr gerag, hezhm§3:8 Hezhm, bezán gaynz, zahr gerag. o badwáhiá yalah bedayét, bohtám majanét o sellén habar dapá mayárét. 9 Gón yakdegará dróg mabandét, chéá ke shomá wati kwahnén zend o kwahnén ádat yalah dátagant o 10 nókén zendé zortag. Hodáay bárawá ke shomay zánt géshtera bit, é zend badal bayána bit o wati jórh kanókay shekl o dróshomá zurit. 11 Nun darkawm yá Yahudi, sonnat butagén yá nabutagén, wakshi, Sakái*3:‏11 Sakái kawmé. É kawmay bárawá nebisag butag ke sakkén bédód o jangól o wakshién kawmé. , golám yá ázát, choshén habarán hecch máná nést. Masih har chizz ent o may sajjahénáni delá ent.

12 Gorhá shomá ke Hodáay gechén kortagén o palgártagén mardom ét o Hodá shomárá dósta dárit, pa rahmdeli o mehrabáni o békebri o narmdeli o sabr o ópár zend begwázénét. 13 Yakdegaray bardáshtá bekanét o agan yakkéá cha domiá gelagé hast, áiá pahell bekant. Anchosh ke Masihá shomárá pahell kortag, shomá ham anchosh pahell bekanét. 14 É káráni hamráhiá, yakdegará dóst ham bedárét, chéá ke mehr cha é sajjahénán báláter ent o sajjahén báwarmandán yakdela kant o mohrén reshtahéá bandit. 15 Masihay dátagén émeni shomay delá hákemi bekant, chéá ke shomá yakkén jánay ázá†3:15 Ázá, bezán jesmay har bahr o wandh, chó ke dast, pád, chamm o gósh. ét o Hodáyá shomárá gechén kortag ke pa sohl o émeni zend begwázénét. Shogrgozári ham bekanét. 16 Shomay báten cha Masihay tálimá sarréch bebit. Yakdomiá gón kámelén dánáiá tálim o delbaddhi bedayét. Zaburi sawt bejanét, hamd o saná bekanét, ruhi názénk bejanét o wati delá Hodáay shográ begerét. 17 Har kár o har gappé ke kanét, Hodáwandén Issáay námay hayálá bedárét o hamáiay wasilahá Hodáén Petay shográ begerét.

18 Oo janénán! Cha shomá harkas wati marday parmánbardáriá bekant ke é kár Hodáwanday mardomán zéba dant.

19 Oo mardénán! Cha shomá harkas wati janá dóst bedárit o gón áiá trond mabit.

20 Oo chokkán! Wati mát o petáni har gappá begerét ke é kár Hodáwandá razá kant.

21 Oo petán! Wati chokkán zahr mabárénét ke delprósha bant.

22 Oo golámán! Har kárá wati donyái wájaháni parmánbardáriá bekanét, tahná á wahdá na ke á shomárá cháragá ant, tahná pa mardománi razá kanagá na, pa del o setk‡3‏:22 Setk, bezán báwar, yakin. o pa hodátorsi áyáni parmánbardáriá bekanét.

23 Har káré ke kanét, pa del o setk bekanét, bezán shomá pa mardomán kanagá naét, pa Hodáwandá kanagá ét, 24 chéá ke zánét shomárá cha Hodáwanday némagá mirásé rasit, hamé shomay mozz ent. Shomá Hodáwandén Masihay hezmatá kanagá ét. 25 Harkas ke radén káré kant, áiá sezá rasit, pa kassá némagdária nabit.