15
Mussá o Esráiliáni názénk
1 Gorhá Mussá o Esráilián pa Hodáwandá é názénk jat:
“Man Hodáwandá názénán,
chéá ke Hodáwand
pa shán o shawkat sóbén*15:1 Sóbén, bezán péróz, kámyáb. but.
Áiá asp o aspswár daryáyá chagal dátant.
2 Hodáwand mani zór o wák o mani názénk ent.
Hodáwand pa man nejáté but.
Mani Hodá ent,
mana názénáni.
Mani petay Hodá ent o
man áiá satá o saná kanán.
3 Hodáwand jang kanóké,
4 Perawnay arrábah o lashkari daryáyá chagal dátant,
Perawnay sharterén apsar Sohrzerá bokketant.
5 Johlén ápán andém kortant,
á chó sengá johlánkiá ér bokketant.
6 Oo Hodáwand! Tai rástén dast ajab zórmand at.
Oo Hodáwand! Tai rástén dastá dozhmen shengént.
7 Taw cha wati mazanshániá dozhmen sarshakun kortant.
Taw wati hezhm ráh dát o
tai hezhmay ásá dozhmen chó palárá wártant.
8 Cha tai pónzay damá
áp sar pa sar but,
tachókén áp chó diwálá mohr óshtátant.
Johlén áp daryáay gobbá‡15:8 Daryáay gobb, bezán daryáay johlterén jágah. badetant.
9 Dozhmená gwasht:
‘Man esháni randá kapán o rasénánesh,
máláni áwárá§15:9 Áwár, bezán jangay tahá lotth o pol kortagén mál o mardom. bahra kanán o
wati arwáhá sérápa kanán.
Zahmá kasshán o
mani dastesh tabáha kant.’
10 Bale taw hopp kort o
daryáyá á póshetant.
Á chó sropá*15:10 Srop mádené ke wazni sakk báz ent. Pársiá “sorb” o Engréziá “lead” ent. johlén ápán ér bokketant.
11 Oo Hodáwand!
Hodáyáni nyámá kay tai paymá ent?
Kay tai paymá pákiá mazanshán ent?
Tai porshánén kár satá karzant o
taw hayrán kanókén kára kanay.
12 Taw wati rástén dast shahár dát o
zeminá dozhmen ér bortant.
13 Taw pa mehr
wati móketagén mahlukay rahbari kort o
gón wati zór o wáká
dém pa wati pákén bárgáhá
áyáni rahshóni kort.
14 Kawma eshkonant o larzant.
Bimmé Pilestiáay jahmenendáni delá kapit.
15 Edumay sardára torsant.
Muábay zóráwaráni jáná drahagé kapit o
Kanhánay sajjahén jahmenend deltrakka bant.
16 Bimm o dahshaté delá kapitesh.
Cha tai báskay zórmandiá
á seng o syáha bant,
tán hamá wahdá ke
tai mahluk begwazit, oo Hodáwand,
tán hamá wahdá ke
tai móketagén mahluk begwazit.
17 Oo Hodáwand, Taw wati mahluká molká káray o
wati mirásay kóhay sará nádénay,
hamá jágahá ke taw pa wati nendagá addh kortag,
hamá pákén jágah ke tai dastán tayár kortag, oo Hodáwand!
18 Hodáwand abad tán abad hákemia kant.”
19 Wahdé Perawnay asp o arrábah o aspswárán daryáyá mán dát, Hodáwandá daryáay áp áyáni sará per gardént, bale Esráili daryáay tahá, cha hoshk butagén ráhá gwastant.
Maryamay názénk
20 Paygambarén Maryam ke Hárunay gohár at, áiá kanjarié†15:20 Kanjari tablahay paymén sázé. zort o pád átk. Sajjahén janén kanjari janán o nách kanáná pád átkant gón. 21 Maryamá pa áyán názénk jat:
“Hodáwandá benázénét,
chéá ke Hodáwand
pa shán o shawkat sóbén but.
Áiá asp o aspswár daryáyá chagal dátant.”
Sórén ápay wassh kanag
22 Gorhá Mussáyá Esráiliáni rahshóni kort. Á cha Sohrzeray tayábá pád átk o Shuray gyábáná shotant. Tán say róchá gyábáná saparesh kort bale hecch ápesh nadist. 23 Wahdé Márahá sar butant, Márahay ápesh wárt nakort ke sór at. Paméshká á jágahay nám Márah‡15:23 Márah, bezán tahl, zahr, chizzé ke cha sóriá tahl bebit. but. 24 Mahluká Mussáay sará norondhet o gwasht: “Ché bwarén?” 25 Mussáyá Hodáwanday kerrá peryát kort o Hodáwandá Mussá dári thokkoré pésh dásht. Mussáyá dár ápá dawr dát o áp shirken but.
Ódá Hodáwandá pa mahluká hokm o parmáné gisshént o mahluki chakkáset.§15:25 Chakkásag, bezán ázmáesh kanag, emtehán gerag. 26 Hodáwandá gwasht: “Agan taw pa delgósh wati Hodáwandén Hodáay tawárá gósh bedáray o hamá kárán bekanay ke áiay chammán sharr ant, agan áiay hokmán delgósh bekanay o áiay sajjahén parmánán bemannay, hecch choshén nádráhié tai sará nayárán ke man Mesriáni sará áwort, chéá ke mane Hodáwand tai dráh kanók án.”
27 Á Élimá átkant. Élimá ápay dwázdah chammag o haptád bon macch hastat. Ódá ápay kerrá ordesh kort.
*15:1 15:1 Sóbén, bezán péróz, kámyáb.
†15:3 15:3 Yahweh, Ebráni zobáná Hodáwanday nám ent. É labz cha “bayagay” labzá jórh butag. Pákén Ketábay géshter tarjomahán é labz “Hodáwand” kortag.
‡15:8 15:8 Daryáay gobb, bezán daryáay johlterén jágah.
§15:9 15:9 Áwár, bezán jangay tahá lotth o pol kortagén mál o mardom.
*15:10 15:10 Srop mádené ke wazni sakk báz ent. Pársiá “sorb” o Engréziá “lead” ent.
†15:20 15:20 Kanjari tablahay paymén sázé.
‡15:23 15:23 Márah, bezán tahl, zahr, chizzé ke cha sóriá tahl bebit.
§15:25 15:25 Chakkásag, bezán ázmáesh kanag, emtehán gerag.