16
Cha ásmáná warákay ér áyag
1 Sajjahén Esráili mahluk cha Élimá rahádag but. Cha Mesrá dar kapagá rand, domi máhay pánzdahomi róchá Sinay gyábáná sar butant. Sin, Élim o Sináay nyámá ent. 2 Gyábáná, Esráilay sajjahén mahluk Mussá o Hárunay sará norondhagá lagget. 3 Esráilián gwasht: “Drégatá*16:3 Drégatá, bezán drégatén, dréchá. Pársi o Orduá “kásh”. má Mesrá Hodáwanday dastá bemorténén. Ódá wa má góshtay dégáni kerrá neshtagatén o delay sérá nána wárt. Bale shomá márá é gyábáná áwort ke é sajjahén mahluká cha shodá bekoshét.” 4 Hodáwandá gón Mussáyá gwasht: “Bechár, man cha ásmáná pa shomá nagana gwárénán. Mahluk har róch dhanná dar byayt o wati hamá róchay kesásá nagan mocch bekant o bezurit. É paymá áyána chakkásán ke bárén mani Sharyatay ráhá rawant yá na. 5 Wati shashomi róchay naganán ke kárant o tayára kanant, báyad ent cha pésari har yakk róchéay naganán do sari†16:5 Do sari, bezán do barábar, do randá, do haminchok. bebant.”
6 Mussá o Háruná gón sajjahén Esráilián gwasht: “Maróchi bégáhá shomá zánét ke cha Mesrá shomay dar kanók Hodáwand at o 7 bándá sohbá shomá Hodáwanday shán o shawkatá gendét. Chéá ke shomá Hodáwanday sará norondhetag o áiá eshkotagant. Má ché én ke shomá may sará benorondhét?” 8 Mussáyá gwasht: “Hodáwand shomárá pa waragá bégáhá gósht o sohbá nagana dant, lápay sérá, chéá ke Hodáwandá shomay hamá norondhag eshkotagant ke shomá áiay sará kortagant. Má ché én? Shomá may sará norondhagá naét, Hodáwanday sará norondhagá ét.” 9 Mussáyá gón Háruná gwasht: “Sajjahén Esráili mahluká begwash: ‘Hodáwanday bárgáhá byáét. Chéá ke shomay norondhagi eshkotagant.’ ”
10 Chó but ke wahdé Hárun gón sajjahén Esráili mahluká habará at, áyán gyábánay némagá cháret o Hodáwanday shán o shawkatesh dist ke jambaray tahá záher at. 11 Hodáwandá gón Mussáyá gwasht: 12 “Man Esráiliáni norondhag eshkotagant. Áyán begwash: ‘Bégáhá gósht o sohbá nagana warét, lápay sérá. Gorhá shomá zánét ke man Hodáwand án, shomay Hodá.’ ”
13 Chó but ke bégáhá nekólén‡16:13 Nekól morgé ke Pársiá “belderchin” o Engréziá “quail” gwashanti. morg átkant o ordgáhesh sarpósh kort o sohbá nóday láé§16:13 Lá, bezán láyah, teh, pósh, Engréziá “layer”. sajjahén ordgáhay chapp o chágerdá ér nesht. 14 Wahdé nóday lá gár but, zeminá názorkén kochalay*16:14 Kochal, bezán sahdár yá drachk o dáray hoshk butagén póst ke thokkor thokkora bit o kapit. paymén chizzé dará but, barpay pozzhokay paymén. 15 Wahdé Esráilián dist, gón yakdegará gwashtesh: “É chéé?” Chéá ke áyán nazánt é chéé. Mussáyá gwasht: “É hamá nagan ent ke Hodáwandá shomárá pa waragá dátag. 16 Hodáwanday dátagén hokm esh ent: ‘Haminchok ke warét, haminchok bezurét. Pa wati gedánay har mardoméá yakk oméréay†16:16 Omér Ebrániáni kayl kanagay kyásé. Yakk oméré kamm o gésh do sér ent. kesásá bezurét.’ ”
17 Esráilián nagan zort, bale lahténá géshter zort o lahténá kamter. 18 Wahdé oméray hesábá kaylesh kortant,‡16:18 Kayl kanag, kesás kanag, chizzéay wazn yá kadday pakká kanag. distesh ke á kasá ke gésh zortag, warák pa áiá géshén naant o á kasá ke kamm zortag, pa áiá kamm naant. Harkasá wati lápay kesásá zortagat. 19 Mussáyá gón áyán gwasht: “Kass tán sohbá cha é warákán hecch ér makant.” 20 Bale lahténá Mussáay habar gósh nadásht. Áyán cha é warákán chizzé tán sohbá wati kerrá ér kort, bale é warák kerm kapt o bó kanagá laggetant. Gorhá Mussá áyáni sará zahr gept.
21 Har sohb mardomán wati lápay kesásá zort, róch ke tronda but, pasht kaptagén kochal ápa butant. 22 Har shashomi róchá áyán do sari waráka zort, bezán pa har mardoméá do omér. Mahlukay sajjahén sarók Mussáay kerrá átkant o Mussáesh hál dát. 23 Mussáyá gón áyán gwasht: “Hodáwandá chó gwashtag: ‘Bándá Shabbatay§16:23 Shabbat, Esráiliáni haptagay haptomi róch ent. Shabbatay máná ent dam kanag, árám kanag. róch ent, Hodáwanday gisshéntagén pákén róch ent, pa árám kanagá. Shomárá harché ke pachagi ent, maróchi bepachét o harché ke lahrh dayagi ent, maróchi lahrh dayét. Harché ke sara kayt, pa bándátigén róchá éresh kanét.’ ”
24 Hamá paymá ke Mussáyá gwashtagat, mardomán sar átkagén warák pa bándátigén róchá éra kortant. É warákán na bóa kort o na kerma kaptant. 25 Mussáyá gwasht: “Maróchi eshán bwarét chéá ke maróchigén róch pa Hodáwandá Shabbaté. Maróchi é warák zeminá ér áraga nabit. 26 Shash róchá mocch kanét o bezurét, bale haptomi róchá, bezán Shabbatay róchá hecch nést.”
27 Haptomi róchá lahtén mardom dar átk ke rawén o nagan moccha kanén, bale hecchesh nadist. 28 Hodáwandá gón Mussáyá gwasht: “Tán kadéná sará tába dayét o mani hokm o sar o sójána nazurét? 29 Bechárét, mane Hodáwandá shomárá Shabbatay róch bakshátag. Paméshká shashomi róchá shomárá do róchay naganá dayán. Haptomi róchá shomá har jágahá ét, hamódá bebét. Haptomi róchá kass cha wati jágahá dar mayayt.” 30 Gorhá mahluká haptomi róchá árám kort.
31 Esráilián é naganay nám “mann”*16:31 Ebráni zobáná “mannay” máná ent “é chéé?” Bechár band 15. kort. É gehnichay†16:31 Gehnich sabzagé ke Orduá “dhaniah” o Pársiá “geshniza” gwashanti. tohmay paymén atant, espétchak atant o támesh chó bénagi naganá at. 32 Mussáyá gwasht: “Hodáwanday hokm esh ent: ‘Yakk purahén oméré mann pa wati áyókén nasl o padréchán‡16:32 Padréch, bezán nasl, chokk o óbádag. ér kanét, ke á hamá naganá begendant ke man gyábáná shomárá wárént, hamá wahdá ke man shomárá cha Mesrá dar kort o áwort.’ ” 33 Mussáyá gón Háruná gwasht: “Darpé bezur o yakk oméré manni mán kan o Hodáwanday bárgáhá éri kan ke pa shomay áyókén nasl o padréchán ér bebit.” 34 Hamá paymá ke Hodáwandá Mussá hokm dátagat, Háruná é darp sháhediay wánekáni§16:34 Wánek, bezán mazanén patanén seng, wánag. Sháhediay wánekáni sará Hodáay dahén parmán nebeshtah atant. démá ér kort ke paházag*16:34 Paházag, bezán sambálag, pahrézag. bebit. 35 Esráilián tán chell sálá manna wárt, bezán tán hamá wahdá ke ábádén molkéá sar butant. Tán hamá wahdá ke Kanhánay simsará rasetant, mannesha wárt. 36 Yakk oméré épahay†16:36 Épah Ebrániáni kayl kanagay kyásé. Yakk épahé kamm o gésh bist sér ent. dahyakk ent.
*16:3 16:3 Drégatá, bezán drégatén, dréchá. Pársi o Orduá “kásh”.
†16:5 16:5 Do sari, bezán do barábar, do randá, do haminchok.
‡16:13 16:13 Nekól morgé ke Pársiá “belderchin” o Engréziá “quail” gwashanti.
§16:13 16:13 Lá, bezán láyah, teh, pósh, Engréziá “layer”.
*16:14 16:14 Kochal, bezán sahdár yá drachk o dáray hoshk butagén póst ke thokkor thokkora bit o kapit.
†16:16 16:16 Omér Ebrániáni kayl kanagay kyásé. Yakk oméré kamm o gésh do sér ent.
‡16:18 16:18 Kayl kanag, kesás kanag, chizzéay wazn yá kadday pakká kanag.
§16:23 16:23 Shabbat, Esráiliáni haptagay haptomi róch ent. Shabbatay máná ent dam kanag, árám kanag.
*16:31 16:31 Ebráni zobáná “mannay” máná ent “é chéé?” Bechár band 15.
†16:31 16:31 Gehnich sabzagé ke Orduá “dhaniah” o Pársiá “geshniza” gwashanti.
‡16:32 16:32 Padréch, bezán nasl, chokk o óbádag.
§16:34 16:34 Wánek, bezán mazanén patanén seng, wánag. Sháhediay wánekáni sará Hodáay dahén parmán nebeshtah atant.
*16:34 16:34 Paházag, bezán sambálag, pahrézag.
†16:36 16:36 Épah Ebrániáni kayl kanagay kyásé. Yakk épahé kamm o gésh bist sér ent.