2
Nejátay némagá delgósh kanag
1 Paméshká má báyad ent hamá paygámay sará géshter delgósh bedayén ke má eshkotag, chó mabit ke gomráh bebén. 2 Á paygám ke cha préshtagáni dap o zobáná gwashag butagat mohr o mohkam at o áiay har paymén náparmáni o helápwarziay barhakkén sezá raset, 3 gorhá agan má é mazanén nejátay némagá delgósh madayén, che paymá rakketa*2:3 Rakkag, bezán neját rasag, bacchag. kanén? É nejátay habar awalá Hodáwandén Issáyá kort o padá hamá mardomán pa má hamá paymá sar kort ke wat cha Issáyá eshkotagatesh. 4 Hodáyá bázén ajabbatén neshánié ham pésh dásht, ajabén kár o warh warhén mójezah kort o Pákén Ruhay nyámat wati delay tabá bahr kortant. Hamé paymá Hodáyá é paygámay rástiay gwáhi dát.
Baniádamén Issá
5 Hamá jahán ke áyagi ent o má áiay habará én, Hodáyá préshtagáni érdast nakort, 6 parchá ke yakkéá yakk jáhé gwáhi dátag o gwashtag:
“Ensán chéé ke taw áiay gamwár ay,
baniádam kay ent ke áiay delgóshá dáray?
7 Taw pa kammén wahdéá á cha préshtagán jahlter kort o
padá shán o sharapay táj sará dát o
8 har chizz áiay pádáni chérá ér kort.”
Nun wahdé Hodáyá har chizz áiay pádáni chérá ér kortag, dega hecch pasht nakaptag ke áiay pádáni chérá mabit. Albat má angata nagendén ke har chizz áiay pádáni chérá ent. 9 Bale Issáyá gendén ke pa kammén wahdéá cha préshtagán jahlter kanag but o nun shán o sharapay tájé sará enti, chéá ke áiá markay sakki sagget†2:9 Saggag, bezán bardásht kanag.. Haw, cha Hodáay rahmatán áiá sajjahénáni háterá markay tám chasht.
10 Hodá, ke har chizz cha hamáiá ent o pa hamáiá, wahdé áiá bázén chokké wati shán o shawkatá sharikdár kanag lóthet, cháreti sharter ent ke man esháni nejátay rahshón‡2:10 Rahshón, bezán rahbar, sarók, rahdarbar., bezán Issáay kámeliá cha sakki o sóriay§2:10 Sakki o sóri, bezán mosibat, taklip. ráhá záhér bekanán. 11 Chéá ke pák o palgár*2:11 Palgár, bezán sáp o sallah, bepóleng. kanók o pák o palgár bayók, é sajjahén yakkén Petay chokk ant, paméshká Issá eshán wati brát gwashagá sharmendaga nabit. 12 Gwashit:
“Wati brátáni kerrá tai námay járá janán,
mocchiay démá tará názénán.”
13 Padá gwashit:
“Man Hodáay sará tawkala kanán.”
O padá gwashit:
“É man án o é hamá chokk ant ke Hodáyá maná dátagant.”
14 Chokk cha hón o góshtá addh butagant, paméshká Issá ham hón o góshtay mardomé but o átk ke gón wati marká, hamáiay zór o wáká†2:14 Wák, bezán zór, tákat. bepróshit ke markay zóri dasta ent, bezán Shaytánayg o 15 é dhawlá hamáyán ázát bekant ke wati sajjahén omrá markay torsay golám butagant. 16 É gapp záher ent ke Issá préshtagáni komakk kanagá nayátk, Ebráhémay chokk o óbádagáni‡2:16 Óbádag, bezán nasl o padréch, chokk o nomásag. komakk kanagá átk. 17 Gorhá paméshká allami at ke á har hesábá wati brátáni paymá bebit, tánke Hodáay bárgáhá§2:17 Bárgáh, bezán dém, darbár, hozur. rahmdel o wapádárén mazanén péshwáé bebit ke kawmay gonáhán beshódit o kapárat*2:17 Kapáratay máná sarpósh ent. Edá pa gonáháni shódagá kármarz butag. bekant. 18 Áiay jendá sakki o sóri saggetag o cha chakkásá†2:18 Chakkás, bezán ázmáesh, emtehán. gwastag, paméshká hamáyán komakk korta kant ke chakkásay tahá ant.
*2:3 2:3 Rakkag, bezán neját rasag, bacchag.
†2:9 2:9 Saggag, bezán bardásht kanag.
‡2:10 2:10 Rahshón, bezán rahbar, sarók, rahdarbar.
§2:10 2:10 Sakki o sóri, bezán mosibat, taklip.
*2:11 2:11 Palgár, bezán sáp o sallah, bepóleng.
†2:14 2:14 Wák, bezán zór, tákat.
‡2:16 2:16 Óbádag, bezán nasl o padréch, chokk o nomásag.
§2:17 2:17 Bárgáh, bezán dém, darbár, hozur.
*2:17 2:17 Kapáratay máná sarpósh ent. Edá pa gonáháni shódagá kármarz butag.
†2:18 2:18 Chakkás, bezán ázmáesh, emtehán.