3
Issá o Mussá
1 Gorhá, oo pák o palgár butagén brátán*3:1 “Brátay” máná har báwarmand ent, mardén o janén.! Shomá ke borzén arshay Hodáay tawár kortagénáni tahá gón ét, wati pegr o hayálán gón Issáyá bekanét, gón hamá kásed o mazanén péshwáyá ke má áiá mannén. 2 Á gón wati gechén kanóká wapádár at, hamá paymá ke Mussá Hodáay sarjamén lógay wapádár at. 3 Anchó ke lógay addh kanókay sharap cha lógay sharapá géshter ent, Issá cha Mussáyá géshter shán o sharapa karzit, 4 chéá ke har lógéárá addh kanóké hast, bale Hodá sajjahén chizzáni addh kanók ent. 5 Mussá, hezmatkáréay hesábá Hodáay sarjamén lógay wapádár at ke hamá chizzáni gwáhiá bedant ke démterá gwashag o záher kanaga bant, 6 bale Masih Chokkay hesábá, Hodáay lógay wapádárén sarmaster ent o Hodáay lóg má én, bale hamá shartá ke delér bemánén o pa pahré wati ométay sará mohr bóshtén.
Sarkasshi makanét
7 Paméshká Pákén Ruha gwashit:
“Maróchi shomá agan Hodáay tawárá eshkonét,
8 wati delá á paymá seng makanét
ke shomay pet o pirokán sarkasshiay róchán kort,
hamá wahdá ke áyán gyábáná maná chakkáset†3:8 Chakkásag, bezán ázmáesh kanag, emtehán gerag. o ázmáesh kort.
9 Bell toré shomay pet o pirokán tán chell sálá mani kortagén kár distagatant,
bale angat ódá áyán maná chakkáset.
10 Paméshká man á naslay sará zahr atán o gwashton:
‘Delesh gomráh ent o
mani ráhána nazánant,’
11 Gorhá man pa hezhm‡3:11 Hezhm, bezán gaynz, zahr gerag. sawgend wárt ke
‘hamá árámi o ásudagi ke man pa eshán armán kortag,
é mardom hechbar ódá sara nabant.’ ”
12 Oo mani brátán! Hozzhár bét ke cha shomá hechkasay del bad o béimán mabit o cha namiránén§3:12 Namirán, bezán hamá ke hechbara namerit. Hodáyá posht makant. 13 Hodáyá posht janagay badalá, tán hamá wahdá ke “maróchigén róch” hastent, har róch yakdegará delbaddhi*3:13 Delbaddhi, bezán shábásh, sekén, tashwik. bedayét ke cha shomá hechkasay del cha gonáhay prébá seng mabit. 14 Chéá ke máshomá Masihay har chizzá bahramand én, bale pa é shartá ke wati deljamiá tán áherá mohr o mohkam bedárén, hamá deljami ke bendátá†3:14 Bendát, bezán bongéj, shoru. máshomárá butag. 15 Anchó ke gwashag butag:
“Maróchi shomá agan áiay tawárá eshkonét,
wati delá á paymá seng makanét
ke shomay pet o pirokán sarkasshiay róchán kort.”
16 Hamáyán ke eshkot o angat sarkasshi kort, á kay atant? Á sajjahén hamá mardom naatant ke Mussáay sarókiá cha Mesrá dar átkant? 17 Tán chell sálá Hodá kai sará zahr at? Hamáyáni sará zahr naat ke gonáhesh kort o jónesh gyábáná kaptant? 18 Kojám mardománi bárawá sawgendi wárt: “Hechbar hamá árámi o ásudagiá ke man pa áyán armán kortag, sara nabant”? Hamáyáni bárawá sawgendi nawárt ke náparmániesh kort? 19 Gorhá má gendén ke áyán cha wati nábáwariá natwánt hamá árámi o ásudagiá sar bebant ke Hodáyá pa áyán armán kortagat.
*3:1 3:1 “Brátay” máná har báwarmand ent, mardén o janén.
†3:8 3:8 Chakkásag, bezán ázmáesh kanag, emtehán gerag.
‡3:11 3:11 Hezhm, bezán gaynz, zahr gerag.
§3:12 3:12 Namirán, bezán hamá ke hechbara namerit.
*3:13 3:13 Delbaddhi, bezán shábásh, sekén, tashwik.
†3:14 3:14 Bendát, bezán bongéj, shoru.