4
Hodáay kawl kortagén árámi o ásudagi
1 Hodáay kawl o wádah angat barjáh ent ke má hamá árámi o ásudagiá sar buta kanén ke áiá pa má armán kortag. Paméshká hozzhár bebén, chó mabit ke cha shomá kasé pasht bekapit o árámi o ásudagiay menzelá sar mabit. 2 Chéá ke márá ham áyáni paymá wasshén mestág*4:2 Mestág, bezán wasshén hál, bashárat. rasetag. Hamá paygám ke áyán eshkot, á paygámá áyáná hecch páedag nadát, parchá ke eshkonókáni delá imán néstat ke paygám áyáni delá benendit, 3 bale má ke imán áwortag, Hodáay kawl kortagén árámi o ásudagiá sara bén. Bell toré Hodáay kár cha jahánay jórh bayagay wahdá sarjam butant, bale padá ham gwashti:
“Gorhá man pa hezhm sawgend wárt ke
‘hamá árámi o ásudagi ke man pa eshán armán kortag,
é mardom hechbar ódá sara nabant.’ ”
4 Hodáyá yakk jágahéá haptomi róchay árámiay bárawá gwashtag:
“Haptomi róchá, mane Hodáyá cha wati sajjahén kárán árám kort.”
5 Bale Hodáyá chó ham gwashtag:
“Hamá árámi o ásudagi ke man pa eshán armán kortag, é mardom hechbar ódá sara nabant.”
6 Gorhá é habar angat barjáh ent ke lahtén mardom Hodáay kawl kortagén árámi o ásudagiá sara bit, bale hamáyán ke é wasshén mestág pésará eshkotagat, wati náparmániay sawabá sar nabutant. 7 Gorhá Hodáyá dega róché gisshént o báz wahdá rand Dáuday zobáná “maróchigén róchay” bárawá habari kort o hamá paymá ke pésará é ketábá átkag, gwashti:
“Maróchi shomá agan áiay tawárá eshkonét,
wati delá seng makanét.”
8 Chéá ke agan Yusháyá á mardománá árámi o ásudagi bedátén, gorhá Hodáyá randterá dega róchéay bárawá habar nakortagat. 9 Bale pa Hodáay kawmá angat Shabbatay paymén árámi o ásudagié ér ent. 10 Chéá ke harkas ke Hodáay kawl kortagén árámi o ásudagiá sara bit cha wati kárán áráma kant, hamá paymá ke Hodáyá cha wati kárán árám kort. 11 Gorhá wati sajjahén zórá bejanén ke hamá árámi o ásudagiá sar bebén, chó mabit ke kasé may pet o pirokáni paymá náparmáni bekant o pasht bekapit. 12 Chéá ke Hodáay habar zendag o zórmand ent o cha har dodapén zahméá tézter ent. Anchosha borrit ke nákoná cha góshtá o majgá†4:12 Majg hamá narmén chizz ent ke haddhay tahá ent. cha haddhá ham jetá kant‡4:12 Asligén Yunáni nebeshtánka gwashit: anchosha borrit ke sáhá cha arwáhá o bandá cha majgá ham jetá kant. o delay hayál o maksadán pa ensápa gisshénit. 13 Sajjahén jaháná hecch chizz cha Hodáay chammán chér o andém§4:13 Andém, bezán chér, póshidah. naent. Har chizz áiay chammáni démá záher ent o márá áiay kerrá hesáb dayagi ent.
May masterén péshwá Issá
14 Márá mazanén péshwáé hast ke cha sajjahénán master ent o ásmáná shotag, bezán Issá, Hodáay Chokk. Paméshká byáét wati imánay darshán kanagay sará mohra óshtén, 15 chéá ke márá anchén masterén péshwáé hast ke may nezóriána zánt o gón má hamdardi korta kant, anchéné ke har hesábá may paymá chakkásag butag, bale hecch gonáhi nakortag. 16 Gorhá byáét pa deléri dém pa Hodáay rahmatay tahtá kenzána bén tánke á may sará rahm bekant o zaluratay wahdá márá áiay komakkay barkat berasit.