1 «دگران اێر مجنێت و ایراز مگرێت، تانکه شما اێر جنَگ مبێت. 2 اَنچش که شما دگران اێرَ جنێت، همے پئیما شما اێر جنَگَ بێت و گۆن هر کئیل و پئیمانهێا که بدئیێت، گۆن هما کئیلا شمارا دئیگَ بیت. 3 چیا وتی براتئے چمّئے پیلّاشْکا*7‏:3 پیلّاشک، بزان بوچُّک، پریشک، باکَسئے ڈیلّئے کَسترێن چُنڈ. گندئے، بله وتی چمّئے بُنڈا نگندئے؟ 4 ترا که بُنڈے چمّا اِنت، چۆن وتی براتا گوَشتَ کنئے: ‹بِلّ که تئیی چمّئے پیلّاشْکا درَ کنان›؟ 5 او دوپۆستێن شَتَلکار! پێسرا وتی چمّئے بُنڈا در کن، رَندا تئیی چمّ پَچَ بیت و وتی براتئے چمّئے پیلّاشْکا کَشّتَ کنئے.

6 «پاک و پَلگارێن چیزّان کُچکان مدئیێت و وتی مروارِدان هوکّانی دێما مپرّێنێت. چۆ مبیت که آیان لگتمال بکننت و پِر بترّنت و شمئے جندا دِرّ و دْراش بکننت.

7 «بلۆٹێت، شمارا دئیگَ بیت. شۆهاز بکنێت، درَ گێجێت. دروازگا بٹُکّێت، پَچَ بیت. 8 چیا که هرکَس بلۆٹیت، آییا رسیت. هرکَس شۆهاز بکنت، درَ گێجیت. هرکَس دروازگا بٹُکّیت، په آییا پَچَ بیت. 9 شمئے نیاما چُشێن پتے هست که اگن آییئے چُکّ نان بلۆٹیت ڈۆکے بدنتی؟ 10 یا اگن ماهیگ بلۆٹیت مارے بدنتی؟ 11 شما که رَدکار اێت، اَنگت وتی چُکّان شَرّێن چیزّانی دئیگا زانێت. گڑا شمئے آسمانی پت چنکدر شرترَ زانت که وتی لۆٹۆکێن چُکّان وشّێن چیزّ بدنت.

12 «پمێشکا، هر کارا گۆن دگران هما ڈئولا نێکی بکنێت که لۆٹێت آ دگه هم گۆن شما بکننت. شَریَت و نبیانی گپّ و هبر همِش اِنت.

13 «چه تنکێن دروازگا بپُتریت. چیا که پْراهێن دروازگ و پْراهێن راه، گاری و بێگواهیئے نێمگا بارت و بازێنے هما راها زوریت. 14 بله تنک اِنت آ دروازگ و گران اِنت آ راه که زِندئے نێمگا بارت و اے راهئے رئوۆک هم کمّ اَنت.

15 «چه درۆگێن پئیگمبران هُژّار ببێت. آ، مێشئے پۆستا گوَرا کننت و شمئے کِرّا کاینت بله چه بُن و بێها دِرّۆکێن گُرک اَنت. 16 شما چه آیانی کِردا آیان پَجّاهَ کارێت. چه ڈَنگران†7‏:16 ڈَنگر، بزان بێبَرێن کُنٹگی درچک و دار. انگور و چه ڈۆلکا‡7‏:16 ڈۆلُک، بزان گیابانی کُنٹگی جرّے که پُلّی اِسپێت اَنت. اِنجیر چِنَگَ بیت؟ 17 شَرّێن درچک، شَرّێن بَر و نیبگَ کاریت و سِلّێن درچک سِلّێن بَر و نیبگَ کاریت. 18 شَرّێن درچک، سِلّێن بَر آورتَ نکنت و سِلّێن درچک شَرّێن بَر داتَ نکنت. 19 درچکے که شَرّێن بَرَ نئیاریت، گُڈَّگ و سۆچگَ بیت. 20 پمێشکا آیان چه بَران پَجّاهَ کارێت.

21 «هما که منا ‹هُداوند، هُداوندَ› گوَشنت، په آ سجّهێنان آسمانی بادشاهیئے دروازگ پَچَ نبیت، تهنا هما شتَ کنت که منی آسمانی پتئے واهگ و رزائے سرا کارَ کنت. 22 وهدے آ رۆچَ کئیت بازێنے منا گوَشیت: ‹هُداوند، او هُداوند! ما گۆن تئیی ناما پئیگمبری نکرتگ؟ گۆن تئیی ناما چه مردمان جِنّ نکَشّتگ‌اَنت و گۆن تئیی ناما بازێن اَجَبێن کار پێش نداشتگ؟› 23 گڑا من آیان راستێنَ گوَشان: ‹او بدکاران! من هچبر شمارا پَجّاه نئیاورتگ، چه منی دێما دور ببێت.›

24 «پمێشکا، هرکَس که منی اے هبرانَ اِشکنت و آیانی سرا کارَ کنت، هما زانتکار و هۆشمندێن مردمئے پئیما اِنت که وتی لۆگی تلارئے سرا بست. 25 هئور بوت، هار و هیرّۆپ آتک، پورّ و سْیَه‌گواتان گۆن آ لۆگا ڈیکّ وارت، بله لۆگ نکپت، چیا که آییئے بُنرِد§7‏:25 بُنرِد، بزان لۆگ یا دیوالێئے ائولی و جُهلترێن رِد. تلارئے سرا اێر کنگ بوتگ‌اَت. 26 بله کَسے که منی هبران گۆشَ داریت و آیانی سرا کارَ نکنت، هما هۆڈ و کَمزانتێن مردمئے ڈئولا اِنت که وتی لۆگی رێکانی سرا بست. 27 هئور بوت، هار و هیرّۆپ آتک، پورّ و سْیَه‌گواتان گۆن آ لۆگا ڈیکّ وارت، لۆگ کپت و پهک وئیران بوت.»

28 وهدے ایسّایا اے هبر هلاس کرتنت، مردمانی مُچّی چه آییئے درس و سَبکان هئیران بوت و بَه منتنت،*7‏:28 بَه مانگ، بزان سکّ هئیران بئیگ، بُه بئیگ. 29 چیا که آییا شَریَتئے زانۆگرانی پئیما درسَ ندات، گۆن واک و اِهتیارے درس و تالیمیَ دات.