83
او هُداوند! بێتئوار مبئے
اَساپئے زَبور. سئوتے.
1 او هُدا! بێتئوار مبئے،
هامۆش مبئے و هُشکا مَنِند، او هُدا!
2 بچار که تئیی دژمن چه پئیما گُرّنت و
چه تئو نپرت کنۆکانی سر چۆن بُرز اِنت.
3 تئیی کئومئے هلاپا په چالاکی پندلَ سازنت و
تئیی گران‌کَدرێنانی هلاپا شئور و سلاهَ کننت.
4 گوَشنت: «بیاێت گار و گُمسارِشَ کنێن که کئومے مماننت و
اِسراییلئے نام په یاتێا هم پَشت مکپیت.»
5 په همدلی شئورِش کرتگ و
تئیی هلاپا اَهدے بستگِش.
6 اِدومی و اِسماییلی،
موآبی و هاگاری،
7 گێبالی، اَمّونی و اَمالیکی،
پیلیستی و سورئے نندۆک،
8 آشوری هم گۆن آیان همراه اَنت و
په لوتئے چُکّان باسکے بوتگ‌اَنت. اۆشت...
9 گۆن آیان هما پئیما بکن که تئو گۆن میدیانا کرت،
گۆن سیسِرا و یابینا، کیشونئے کئورئے کرّا،
10 که اِندۆرا تباه بوتنت و
زمینئے کَد و سَمات*83:10 کَد و سَمات، سَکَن و اۆلێم اِنت که اردوا «کهاد» و پارسیا «کود» گوَشگَ بیت. بوتنت.
11 اِشانی سرداران اُرێب و زِهێبئے پئیما کن،
شهزادگانِش زِبَه و زَلمونّائے ڈئولا،
12 که گوَشتگ‌اَتِش: «بیاێت هُدائے چراگاهان په زۆرَ گِرێن.»
13 او منی هُدا! اِشان دَنزێئے پئیما بال دئے،
چۆ که پَلارے، گواتئے دێما.
14 اَنچش که آس جنگلا سۆچیت و
کۆهان مانَ داریت،
15 گۆن وتی توپّانان رَندااِش کپ و
گۆن سیَه‌گواتان بتُرسێنِش،
16 دێمااِش چه شرما سیاه کن
تانکه تئیی نامئے شۆهازا ببنت، او هُداوند!
17 شرمسار بات و اَبدی تُرسێا کپاتنت،
رُسوا بات و بمِراتنت.
18 بِلّ بزاننت که تئیی نام هُداوند اِنت و
تهنا تئو، او بُرزێن اَرشئے هُدا،
سجّهێن زمینئے سرا هاکمیَ کنئے.