98
نۆکێن سئوتے بجنێت
زَبورے.
1 په هُداوندا نۆکێن سئوتے بجنێت،
که اَجَبێن کاری کرتگ،
آییئے راستێن دست و پاکێن باسکا
سۆب و پیرۆزی کَٹّتگ.
2 هُداوندا هما نجات پێش داشتگ که چه آییئے نێمگا اِنت،
وتی اَدلی کئومانی چمّان پدّر کرتگ.
3 آییا په اِسراییلئے اۆبادگان وتی مِهر و وَپا یاتا آورتگ،
زمینئے سجّهێن گُڈّی هَدّ و سیمسران، مئے هُدائے داتگێن نجات دیستگ.
4 او سجّهێن زمین! په هُداوندا شادمانیئے کوکّارا بُرز کن.
کوکّار کنێت، په شادهی سئوت بجنێت، بنازێنێت.
5 په هُداوندا چنگ و ساز بجنێت،
گۆن سازا سئوت بجنێت.
6 گۆن سُرنا و گوَرانڈئے کانٹا*98:6 گوَرانڈئے کانٹ اِسراییلیانی کرّا سازے.
بادشاهێن هُداوندئے بارگاها،
شادهیئے کوکّارا چست کنێت.
7 دریا و دریائے تهئے سجّهێن چیزّ گرَنداتنت،
جهان و آییئے سجّهێن جهمنند.
8 کئور چاپ بجناتنت و
کۆه په شادمانی سئوت،
9 هُداوندئے بارگاها سئوت بجناتنت،
که آ په زمینئے دادرسیا کئیت.
آ جهانا په اَدل دادرسیَ کنت و
کئومان په اِنساپ.