1 پنچمی پرێشتگا وتی کَرنا جَت و من دیست که اِستارے چه آسمانا سِستگ و زمینا کپتگ‌اَت. آییا جُهلێن تَهتَرونئے* 9‏:1 تَهتَرون، بزان جهنّم، دۆزه. چاتئے دپئے کلیت دئیگ بوت. 2 اِستارا جُهلێن تَهتَرونئے چاتئے دپ پَچ کرت. نون چه چاتا دوتّ چست بوت، گوَشئیگا چه مزنێن کورهێا دوتّ در آیگا اَت. چه چاتا در آیۆکێن دوتّان رۆچ و آسمانئے دێم تهار کرتنت. 3 نون چه دوتّان زمینئے سرا مَدَگ در آتک و اے مَدَگان زمینئے زومّانی پئیمێن زۆرے دئیگ بوت. 4 گۆن اِشان گوَشگ بوت که تهنا هما مردم که هُدائے مُهرِش پێشانیگا پِر نه‌اِنت، آیان و اَبێد زمینئے سرئے هچ کاه و سبزگ یا دگه کِشار و دْرچکے تاوان مدئینت. 5 مَدَگان اے هکّ دئیگ نبوت که اِشان بکُشنت بله تهنا تان پنچ ماها اَزابِش بکننت، اَنچێن اَزاب که چه زومّئے تِجا† 9‏:5 تِج، بزان نێش. مردمێا رسیت. 6 آ رۆچان مردم مرکَ لۆٹنت بله مرکِشَ نرسیت. مرکئے لۆٹۆکَ بنت و مرک چه آیانَ تچیت.

7 مَدَگ پوره اسپانی پئیما اتنت که په جنْگا تئیار کنگ بوتگ‌اتنت و آیانی سرگئے سرا تلاهێن تاجئے ڈئولێن چیزّ اتنت و چِهرگِش انسانئے پئیما اتنت. 8 آیانی مود جنێنی مودانی ڈئولا اتنت و دنتان شێرئے دنتانانی پئیما. 9 آیانی سێنَگا آسنی سێنَگ‌پۆش بستگ‌اَت و بانزُلانی تئوارِش پوره هما بازێن اَرّابهانی تئوارئے ڈئولا اتنت که اسپِش بستگ و په جنْگا مانَ رِچنت. 10 زومّانی ڈئولێن لِٹّک و تِجِش پِر اَت و لِٹّکان اے زۆر مان اَت که مردمان تان پنچ ماها ٹَپّیگ بکننت. 11 بادشاهے هست‌اَتِش که جُهلێن تَهتَرونئے پرێشتگ اَت، اِبرانی زبانا نامی اَبَدّۆن اَت و یونانیا، اپۆلیۆن.‡ 9‏:11 اَبَدّۆنئے مانا تباه کنگ و اپۆلیۆنئے مانا تباه کنۆک اِنت.

12 ائولی «اَپسۆز» گوَستگ، بچار، چه اے چیزّان و رند دگه دو «اَپسۆز» آیَگی اِنت.

13 ششمی پرێشتگا وتی کَرنا جت و هما تلاهێن کُربانجاه که هُدائے دێما اِنت، من چه آییئے چارێن کانٹان تئوارے اِشکت. 14 گۆن ششمی پرێشتگا، هماییا که کَرنایی گۆن اَت، گوَشگا اَت: «هما چارێن پرێشتگان آزات کن که مزنێن کئور پَراتئے کَشا بستگ‌اَنت.» 15 نون چارێن پرێشتگ آزات کنگ بوتنت که په هما ساهت، رۆچ، ماه و سالا تئیار کنگ بوتگ‌اتنت که بنی آدمانی سئےیکّا بکُشنت. 16 من اِشکت، اسپ‌سوارێن لشکر دو هزار لکّ§ 9‏:16 اَسلیگێن نبشتانکَ گوَشیت: «دو ده هزار بران ده هزار.» اَت. 17 هما اسپ و اسپ‌سوار که من اِلهامئے تها دیستنت، چُش اتنت: اسپ‌سوارانی سێنَگا آس‌رنگێن، سیه‌سبزێن و زردێن گۆکُرت‌رنگێن سێنَگ‌پۆش بستگ‌اَت؛ اسپانی سر، شێری سرگئے ڈئولا اتنت و چه آیانی دپا آس، دوتّ و گۆکُرت در آیگا اَت. 18 بنی آدمانی سئےیک، سئے اَزابا کُشت، بزان هما آس، دوتّ و گۆکُرتئے اَزابا که چه اسپانی دپا در آیگا اَت، 19 چیا که اسپانی زۆر آیانی دپ و لِٹّکانی تۆکا اَت و آیانی لِٹّک مارئے ڈئولا اتنت که سرِش پِر اَت و گۆن اِشان مردمِش ٹَپّیگَ کرتنت.

20 پَشت کپتگێن مردم که اے اَزابان نکُشتگ‌اتنت، اَنگت چه وتی دستانی کاران پشۆمان نبوتنت و تئوبهِش نکرت و تلاه، نُگره، بْرنج، سنگ و دارئے هما پلیتێن اَرواه و بُتانی سُجده کنگِش یله نکرت که نه دیستَ کننت، نه اِشکتَ کننت و نه راه شتَ کننت. 21 اے مردم نه چه وتی کُشت و کۆشان پشۆمان بوتنت، نه چه وتی سِهر و جادوگریا، نه چه وتی زِنهکاریا و نه چه وتی دُزّیان.