83
Oo Hodáwand! Bétawár mabay
Asápay Zabur. Sawté.
1 Oo Hodá! Bétawár mabay,
hámósh mabay o hoshká manend, oo Hodá!
2 Bechár ke tai dozhmen che paymá gorrant o
cha taw naprat kanókáni sar chón borz ent.
3 Tai kawmay helápá pa cháláki pandala sázant o
tai gránkadrénáni helápá shawr o saláha kanant.
4 Gwashant: “Byáét gár o gomsáresha kanén ke kawmé mamánant o
Esráilay nám pa yátéá ham pasht makapit.”
5 Pa hamdeli shawresh kortag o
tai helápá ahdé bastagesh.
6 Edumi o Esmáili,
Muábi o Hágári,
7 Gébáli, Ammuni o Amáliki,
Pilisti o Suray nendók,
8 Áshuri ham gón áyán hamráh ant o
pa Lutay chokkán báské butagant. Ósht...
9 Gón áyán hamá paymá bekan ke taw gón Midyáná kort,
gón Siserá o Yábiná, Kishunay kawray kerrá,
10 ke Endórá tabáh butant o
zeminay kad o samát*83:10 Kad o samát, sakan o ólém ent ke Orduá “khád” o Pársiá “kud” gwashaga bit. butant.
11 Esháni sardárán Óréb o Zehébay paymá kan,
shahzádagánesh Zebah o Zalmunnáay dhawlá,
12 ke gwashtagatesh: “Byáét Hodáay charágáhán pa zóra gerén.”
13 Oo mani Hodá! Eshán danzéay paymá bál day,
chó ke paláré, gwátay démá.
14 Anchosh ke ás jangalá sóchit o
kóhán mána dárit,
15 gón wati tuppánán randáesh kap o
gón syahgwátán betorsénesh,
16 démáesh cha sharmá syáh kan
tánke tai námay shóházá bebant, oo Hodáwand!
17 Sharmsár bát o abadi torséá kapátant,
roswá bát o bemerátant.
18 Bell bezánant ke tai nám Hodáwand ent o
tahná taw, oo borzén arshay Hodá,
sajjahén zeminay sará hákemia kanay.