1 Keba ia tau ato keremiro owera ta-gowamo, iedi keremiro owera ro urubia dubu e, ina nou sapuwo to nimowauti nio umoro oi ri. Nedi owera ro Iesu e. Mo borubi kitiodorai urubia mutu nimo ro simara gare to ta-nemewidiro-rimo, simara idomari to ta-nowea-rimo, ibose simara tu to ta-nowaseidiro-rimo. 2 Keremiro kimio dubu nou sosoro nato gorowapotai-ro paea dubu to gararapoi. Nedi keremiro ro nou aboudo gorowapotai-ro nimo ro ta-nowea-rimo, ina abora urubia nou sapuwo to nimowauti-dumo. Iedi keremiro kimio dubu ro keba se Abera mutu gomidiro-rido, ina nimo aboto nou ro gorowapotai-ro. 3 Mo borubi kitiodorai urubia mutu nimo ro beda tanaro niauri-rimo ibose na-nirowidiro-rimo, abora nio mo ro nou nimowapotai mabu nimo ubi ie nio mutu mea mino to atu se karadabu korowarebai. Ibose nimo mea mino to niradabutiti-dumo Abera Godi nou mere Iesu Keriso mutu. 4 Nou mabu rido nisioidiro nedi owera ro nimo atu se auna ia kamade ro iwati rie.

5 Iesu aboudo owera ia ta-nirowai-rimo ina abora nio mo ro a-nimowauti ibo Godi nou auna ia woroworo ie, nou abato ata duwoduwo ata owamo pua. 6 Nimo ro karo ato idaibo owera, ‘Nimo mea mino to niradabutiti-dumo Abera Godi mutu,’ ina duwoduwo maumo ato koroho ato, nimo karasaubuti urubia ie, nimo morobise gabo ato orowotoi pua. 7 Nimo woroworo ato korowomidiro ato Godi nou beda sosoro woroworo ato imidirotiti, nimo atu se mea mino to karadabu e ina korowarebai ie. Ibose nimo woroworo ato korowomidiro ato, nou mere Iesu Keriso edi karima ro nouto nimo ubauba sirio kimatopeamuti ie.

8 Nimo ro karo ato idaibo owera, ‘Nimo abato ubauba ata iamo pua, nimo imese meana ia ie,’ nimo nakara se narasaubuti-dumo ina iedi morobise owera ro nimo abato iamo pua. 9 Kaupoti nimo ro simara ubauba kiwapotaidiro ato, Godi umoro ie nimo ubauba sirio kimatopeamuti Iesu Keriso edi karima ro neito, mabu nou mea tuputupu tanaro dubu e, nou keba se beda owera garo nou ro aise kisioidiro ie.

10 Nimo ro karo ato idaibo owera, ‘Nimo ubauba kisioidiro pua,’ ina ibo ie Godi nimo ro karasaubuti dubu to nasorotiti-dumo, ina nou edi owera ro nimo niro turi ato iamo pua.