1 Namuturubi nirimagare babio, mo ro kebase peba titi nio aboto ta-nisioidiro, ina abora ata peba titi nisioidiro nio aboto. Nedi peba titi teibo ro nio aboto nou ri nisioidiro-ma, mo ubi ie nio mo ro umoro ina iwai ri ibo, nio ro kebase beda owera gimibiria-rimo, nou sapuwo to se mea kimaragoidiro ba-diworohuti-mo. 2 Ibose mo ubi ie nio kimaragoidiro Godi tarena ipusu owera urubia ro beda owera garo-rimo, nio ro nou se ba-dimaragoidiro-mo. Ibose nio ro kimaragoidiro modobo ie nio aboto Iesu ro iedi urubia ro na-gitiodorai, neio ro beda owera garo-rimo. Nimo Abera Naramu Iesu nou nimo kiapopo dubu e, nou ro neio aboto nedi kitamudiro owera ro ta-gaiwai-ro nimo beda mino to korowomidiro ra.

3 Ina auna ia tanaro nou e nio umoro kiwai sapuwo to, womu tau ato keremasosowado urubia nio aboto paea se amadimo-orowapotaidiro-ri. Neio ro simara ia ubauba ubi tanaro aise amadimi-isioidiro-ri. Nio neio ro amadimi-imasosowado-ri gaga amadimi-imororouti-ri. 4 Neio ro urubia ibo amadimi-imowauti-ri, ‘Iesu korowameai owera na-garo abora boira, a-gorowameai-die ra? Etou owati nu? Nimo nasa naminami ta-gorowaburo-rimo, kaupoti nu nato orowameai pua. Kebase beda sosoro owamotiti, abora ibose to ama-owamo-ri. Godi ro duriomoro edi tau ato gosioidiro womu tato abora, ata tanaro ata ororosioidiro pua.’

5-6 Keba ia tau ato toboro simara sogosogo mutu Godi ro owera to gisioidiro. Nou ro duriomoro obo to gosioidiro, ina obo maumo rido aise gowioro-ro. Ina nedi duriomoro gebari ro edi obo rido gosioidiro, keba urubia imese namabu sirio mutu nedi obo ro nou ro giarumo. Nedi keremasosowado urubia ro neio ro idaibo owera amadima-aro-ri, mabu Abera Naramu ro beda tanaro keba ia se na-gisioidiro, neio umoro sekere kaupoti neio ro nu huru gemowou-rimo, neio ubi tato ie nou kemaragoidiro. 7 Abora nedi tau ro nato nedi duriomoro gebari ro toboro mutu, ibose beda mutu sogosogo namabu sirio ro iamo nato, Godi ro nedi atu owera ro neito irasogoro era ro iporeai ri. Kaupoti etio ra Godi huru na-emoworoho-dumo, neio womu tau sapuwo to irasogoro, neio ubauba kiwai sapuwo to era ro ama-ipisiamuti-ri.

8 Ina nedi owera ro nou se ba-demaragoidiro-mo, woki kemati modobo pua. Namuturubi nirimagare babio, 1,000 kisimisi, kaupoti saiki mutu neitiro Abera Naramu Godi aboudo atu sosoro ie. 9 Nou ro beda tanaro giwauti ororosioidiro ri, urubia ro nou sapuwo to aro-dumo ibo, Abera Naramu umodi ia ie nedi korowameai tanaro ro kosioidiro aboto. Sianu Abera Naramu umodi dubu pua, nou ro beda owera garo isioidiro ri. Kaupoti nou serawo nio aboto samo to oi-ri pua, imese urubia imotoititi-die ubauba aboudo erewesegere ri nou aboto. Mabu nu ubi tato ie ata dubu ata urio pamo kowea.

10 Kaupoti iedi tau ro namadi-orowateai-ri, urubia Abera Naramu ro piro se amadi-imuhia-ri, piro dubu beda sosoro kou ra, idaibo mino to amadi-ou-ri. Iedi tau ro nato obo kadoro diamo beda sosoro ra, toboro idaibo diamo mutu aise ama-araraseperai-ri. Saiki, sagana, kiboni, ibose duriomoro nu simara sogosogo namabu mutu, era ro aise ama-ipisiamuti-ri. Ata nakomu ata nedi sopu duriomoro gebari ro nato, masiro ararasoro-ri pua.

11-12 Morobise ie, imese namabu sirio, era ro ama-ipisiamuti-ri. Ina noudo ie nio ro nou sapuwo to na-imaragoidiro-dumo, ina nio beda mino to ama-orowomidiro-ri? Abera Naramu edi korowameai saiki ro nio namadime-emasebidiro-ri, nio tarena mino to ba-dirowomidiro, Godi ubi beda sosoro owamo. Nio ro idaibo tanaro namadimi-isioidiro-ri, nou edi korowameai tau ro nio ro aupise amadime-emowaititi-ri. Iedi saiki ro nato toboro nou simara sogosogo mutu era ro nato aise ama-ipisiamuti-ri. Saiki, sagana, kiboni neio aise ama-ihoriouti-ri, ata nakomu ata masiro ararasoro-ri pua. 13 Kaupoti Godi ro kebase owera ta-garo ibo, orio toboro, orio duriomoro, nu ia ro ama-isioidiro-mari. Ina urubia iato nama-irowomidiro-ri, neio ro meamea tuputupu tanaro se amadimi-isioidiro-ri. Iedi tanaro sirio ro kororosioidiro aboto, nimo ro nou nimasebidiro-dumo.

14 Namuturubi nirimagare babio, nedi tanaro ro kororosioidiro aboto nio ro nou emasebidiro-dumo. Ina noudo ie pupuwo auna ia se ba-diasibawado-mo duriomoro ato marea tato, ubauba tato korowomidiro aboto, ibose sirio tau nio Godi sosoro gabo ato miro to korowomidiro modobo ie.

15 Ina abora nedi owera ro ma-demaragoidiro-mo ibo, nimo Abera Naramu samo to orowameai pua, mabu nou serawo samo to koi tato dubu e, urubia nou ro timaragoidiro-die. Nou auna ubi ie imese urubia nou ro kiapopo. Ina atu sosoro owera nimo ata neama aboudo ie Pauro, nou edi muro kimaragoidiro ro Godi ro na-gomia-ro peba titi neito gisioidiro, ina nio aboto nato gimeiriai-ro. 16 Nou ro sirio peba titi owera erere urubia aboto na-isioidirotiti, nou sapuwo to atu sosoro owera ta-gisioidiro. Arua owera nou ro na-imeiriotiti maumo imese koko ia ie. Nedi owera maumo ro umoro tato urubia ro ibose pupuwo tato kimibiria urubia ro, morobise maumo neio ro karasaubuti mino to imabutiti-dumo. Neio ro ibose arua maumo owera Tarena Buka ato na-iamo karasaubuti mino to imabutiti-dumo. Neio ro idaibo tanaro na-isioidirotiti-dumo, Godi aboudo imese moro to amadima-aragareawado-ri.

17 Kaupoti, namuturubi nirimagare babio owera nio aboto ibo ie. Abora mo edi owera ro karasaubuti kitamudiro sapuwo to, nio ro umoro ta-goi-dumo. Nio nakara se keremowotoi modobo ie, ina noudo ie Godi edi morobise gabo ro neido ubauba tanaro kisioidiro urubia ro neio edi karasaubuti kitamudiro owera ro neito nio neio ro iaubo-ri pua. 18 Kaupoti namuturubi, mo ubi ie nimo kiapopo dubu Abera Naramu Iesu Keriso, nou edi wisa tato nirimagare maumo ro nio nato kiroromai, ibose nou edi umoro maumo ro nato kiroromai.

Abora imese urubia ro Iesu memowabu-mo, imese imese tau. Ibose ba-mororosioidiro-mo!