1 Ata dubu masiro Koneria, Siseria sabowa ato imidirotiti. Nu Roma gabamani maumo ato ata boso eputa dubu e, ina Itari boso urubia 100 nou ro iaurititi. 2 Nou ro meamea tanaro ta-isioidirotiti, namabu tato urubia nou ro namabu to ta-iwarebidirotiti. Koneria Iu dubu pua, kaupoti nou simara moto urubia mutu morobise Godi neio ro emowabutiti-mo. Ibose sirio tau nou ro Godi aboto aise iraratorotiti.

3 Ata adimo 3 koroko ato Godi edi sowake urio ro hiwo sosoro to Koneria aboto nato gorowapotai-ro. Nou ro ibo, ‘Koneria!’

4 Koneria tere ri idomari keakea girarowea sowake urio aboto. Nou ro ibo, ‘Ei auna dubu, oro etou owera amadi-utura-ri mo aboto?’

Sowake urio ro ibo ‘Oro kararatoro owera Godi ro ta-emewidirotiti-ro, oro ro edi meamea tanaro na-isioidirotiti namabu tato urubia oro ro na-iwarebidirotiti, Godi ro ta-iaurititi-ro. Godi oro ro kamade neito emowaitititi. Oro nou ro woki emati pua, temaragoidirotiti-die. 5-6 Urubia Iopa sabowa to ba-dimeiriai, ata dubu masiro Saimoni nou burumukau takamai woko dubu e, nou moto oromo bara ato otoi. Ata dubu nou abato tomidiro masiro Saimoni Pita, neibi ro nedi dubu ro aise ba-madabuai-birimo.’

7 Taie iato sowake urio edi owera ro karo na-goporeai nou iato aise garaseperai. Koneria ro sowake dubu teibo iato girumai-ma, ibose nou durupi gomo ato na-wateidirotiti ata boso dubu nou ro iato gorumai. Iedi boso dubu ro Godi nou ro emowabutiti, ibose Koneria woko nou ro emesioidirotiti. 8 Koneria ro beda tanaro giauri sowake urio aboudo neibi nou ro iato gimowauti-bi. Taie iedi owera ro neibi nou mutu gimeiriai-bi Iopa sabowa to.

9 Ata saiki ato saiki turi korobai aupiaupi ro gowamo, Koneria ro edi dubu peteibi ro na-gimeiriai-bi Iopa sabowa aupiaupi gemowaititi-birimo. Isana Pita nato gioro moto ohu to Godi aboto araratoro ri. 10 Pita iato sogoi ro aise gorobai nou moto urubia ro ohona samo to ito pua, neio ohona gimododiwado-rimo. Taie nou ro hiwo sosoro to 11 giauri toboro magere na-gorodobura-ro. Taie ioudo auna obotama sapusapuwo rido gorobidiro-rimo nato gowororuwo-rimo sopu to. 12 Nato a-giamo sirio sairo to koroho namabu, goto ato koromudidiro namabu, pawa, neio ro giamo. Iedi namabu sirio ro sabi ie Iu urubia ro kiho aboto. 13 Taie owera kodu ioudo gutura-ro Pita aboto, ‘Pita oro etou emasebidiro? Nedi nakomu sirio ro diopiauti, ba-diho!’

14 Kaupoti Pita ro owera kodu ibo gemowameai, ‘Abera Naramu, modobo ia pua mo egea se nimidirotiti mo ro idaibo sosoro ohona ata ouho pua, sabi ia ie mo ro kiho!’

15 Owera kodu ina iato gutura-ro nou aboto, ‘Imese beda mutu nakomu patu ro iamo Godi ro meana ta-giwai, kiho modobo ie. Idaibo sosoro ohona ubauba to iasoro mamo!’

16 Nedi tanaro ro netewa didi tau to gororosioidiro-birimo Pita aboto. Taie iato tuturu to pua edi auna obotama ro ohona sirio mutu toboro to aise giwameai.

17 Pita imese gomidiro, woki ro gopia nedi tanaro ro na-gororosioidiro, nou sapuwo to auna se gimaragoidiro. Koneria ro edi dubu peteibi ro na-gimeiriai-bi neibi ro Saimoni moto ta-gowea-birimo magere gomo ato gotoi-birimo. 18 Neibi ro ibo, ‘Urubia dubu masiro Saimoni Pita nedi moto ro nato a-womidiro ra?’

19 Pita wisa hiwo owera gemaragoidiro, iato Tarena Urio ro ibo Pita aboto, ‘Pita neito ma-dirorowai-ro, netewa didi dubu peteibi totoi-diebimo oro osora-diebimo. 20 Dororuwo ito, neibi Iu urubia pua, kaupoti mo ro nimeiriai-bidie oro aboto. Oro ata ubauba kimaragoidiro iwia ate, neibi mutu aise ba-dou.’

21 Taie iato Pita aise gororuwo-ro nedi dubu peteibi ro neibi aboto. Nou ro ibo, ‘Mo nou se ie nibi ro na-nosora-diebimo. Etou buro ri ou-diebimo neito?’

22 Neibi ro ibo, ‘Neibi boso eputa dubu Roma gabamani maumo ato isioidirotiti woko, nou masiro Koneria. Nu mea dubu e Godi nou ro emowabutiti, Iu urubia nou aboto auna ubi ie. Nou dutu ata sowake urio ro gemowapotai ibo oro ou ri nou moto to, oro abato beda sosoro owera ro owamo oro ro nou emowauti rie.’

23 Taie Pita ro ibo, ‘Io modobo ie dodoro-birimo, nibi tauo nato duwo kaupoti ama-irobu-biri ou-ri pua, kowaroho tinamabimo-ou-ri.’

Ata saiki Pita namabu na-gimododiai edi dubu peteibi ro neibi mutu atu se imese gaimai-birimo Siseria sabowa to. Ina Iopa sabowa rido amia kimibiria urubia ioudo ta-garadabuai-birimo neio atu se ibo gou-rimo. 24 Siseria sabowa to neio ata saiki ato gorowateai-rimo. Koneria isana urubia mutu Pita gemasebidiro-rimo. Nou urubia namuturubi mutu ta-gidabuti-ro, neio a-gorowomidiro moto goro ato Pita gemasebidiro-rimo. 25 Taie Pita edi tau ato na-gorowateai moto to nou Koneria ro na-gowea, nou ro ibo a-gimaragoidiro Pita ata auna dubu e. Nou iato kauhio to aise girimusubua Pita nou ro iato gemowabu. 26 Kaupoti nou Pita ro tu rido aise gorobai-ro imese gowotobowa. Pita ro ibo, ‘Deribua! Mo Godi pua! Oro beda sosoro ra urubia dubu mo ibo ie.’

27 Taie neitiro moto goro to atu se godoro-rido owera keremowauti keremowauti. Pita na-gorowateai ito moto goro to, nou ro urubia dubu patu se giwia neio a-gorowomidiro.

28 Taie Pita ro ibo neio aboto, ‘Nio imese sirio se umoro ie ibo Iu urubia, Iu owera karo tato urubia, neio atu moro to karadabu pua, ibose neio kararaturio pua, nimo Iu urubia sabi ro aro idaibo. Kaupoti mo Godi ro dese to nowai-die umoro ibo mo ro modobo pua arua urubia ubauba to kiasoro, ibo neio modobo pua Godi mutu karadabu. 29 Oro urubia ito na-gimeiriai mo aboto, mo ro ata owera ata utura pua mo muhoio tato ioudo aise naimai-die. Nirimagare, abora mo ma-demowapotai-ro urubia dubu peteibi mo aboto etou mabu ato gimeiriai-bi?’

30 Ina Koneria ro Pita ibo gemowameai, ‘Dutu ata idaibo tau nato 3 koroko adimo ato mo karatoro owera naro moto ato, mo sosoro gabo ato urubia dubu iato aise gorowapotai-ro keakea obotama se giroidiro. 31 Nou ro ibo, “Koneria, oro edi karatoro owera ro na-iarotiti Godi ro ta-emewidirotiti-ro. Ibose oro ro edi tanaro ro na-isioidirotiti namabu tato urubia aboto, oro ro na-iwarebidirotiti, Godi ro timaragoidirotiti, woki imati pua. 32 Oro ro urubia Iopa sabowa to ba-dimeiriai, ata dubu tomidiro iato masiro Saimoni Pita nou neito ba-mou-ro. Nu burumukau takamai woko dubu Saimoni, nou moto ato omidiro. Nedi dubu ro nu moto oromo bara ato otoi.”

33 Taie mo ro nedi dubu peteibi ro samo to nou ri nimeiriai-bi oro orobai ri. Nimo auna kamade ie oro beda sosoro ou-die neito, abora nou e nimo Godi sosoro gabo ato noti norowomidiro, oro Abera Naramu ro beda sosoro gemowapotai nimo oro ro nouto imowauti rie.’

34 Pita ro neio aboto owera karo iato gatamuai, nou ro ibo ‘Mo abora umoro ta-noi Godi nou auna se imaragoidirotiti pua kaupoti owera urubia aboto. 35 Erere duriomoro ato urubia na-irowomidirotiti nou etio ro emowabutiti-dumo, ibose tuputupu tanaro na-isioidirotiti-dumo nedi urubia ro Godi ro simara urubia to neio kiapoi ie.

36 Nio umoro ie Isiraere urubia aboto Godi ro owera keba se ta-gemeiriai-ro, nedi mea owera ro nou e, miro Iesu Keriso aboudo ta-gou-ro. Iesu Keriso Abera Naramu e imese sirio owera urubia nou ro iaurititi-die. 37 Iedi tanaro ro gororosioidiro-rimo Iudia duriomoro ato nio umoro ta-goi-rimo, keba se Gariri duriomoro ato garatamuai-rimo iedi tanaro ro. Obo to edi dubu ro na-iwarumiautiti Ioane, nou ro urubia keba se ta-imowautiti obo to kiwarumiauti sapuwo to. 38 Nio umoro ie Nasareta dubu Iesu Godi ro ta-gohodowa ina nu Godi ro ta-gemapoi Tarena Urio ibose pupuwo korosa mutu. Nio umoro ta-iamotiti Iesu duriomoro gabogabo na-irohotiti meamea tanaro nou ro ta-isioidirotiti, idaibo urubia Satani pupuwo maumo ato na-irowomidirotiti neio nou ro meana ta-iwaititi. Mabu Godi Iesu mutu idabutititi.

39 Nimo nou kitiodorai urubia, Iesu ro edi tanaro sirio na-isioidirotiti Iudia ra Ierusarema ra ato, nimo ro nou simara idomari to ta-niaurititi-mo. Kaupoti Iu urubia Ierusarema sabowa ato na-gorowomidiro Iesu neio ro gopia-rimo ota kemowotowa ato na-gemopoguti-rimo. 40 Ina netewa didi saiki na-gorobai Godi ro nou pamo rido nato gowameai-ro urubia ro owea ri. 41 Nou Godi ro edi kowameai ro na-gowameai-ro ibo pua nou urubia sirio aboto korowapotaidiro, nou nimo aboto se gorowapotaidiro-ro. Godi ro edi urubia ro keba se na-giapoi nou sosoro owea ri nimo nou e, nou nimo aboto se gorowapotaidiro-ro. Nou Godi ro pamo rido na-gowameai-ro, nimo nou mutu ohona atu moro ato nato niho-rimo ibose simara idomari to nato niauri-rimo. 42 Nimo nou ro ibo nimowapotai-ro urubia imowauti ri ibo Iesu Godi ro keba se ta-gohodowa-ro, korowaburo urubia ina korowomidiro urubia nimo atu se koto nou ro anama-iwai-ri. 43 Imese sirio Godi ipusu owera urubia ro neio ro keba se ta-iarotiti-mo ibo, Godi ro kohodowa dubu owera etio ro imibiria-dumo neio edi ubauba ro Iesu Keriso edi pupuwo ro neito Godi ro ama-imatopeamuti-ri.’

44 Pita ro edi tanaro sirio ro na-giauri nou ro urubia nou gimowauti. Iedi atu tau ro nato nou owera etio ro gemewidiro-rimo Godi ro Tarena Urio aise gemeiriai-ro neio aboto. 45-46 Koneria urubia ro neio umoro tato owera to Godi neito gemowabu-rimo, ina iedi Iu kimibiria urubia ro Pita mutu na-gou-rimo neio ro nato gimewidiro-rimo. Ina iedi Iu urubia ro neio ro na-gowea-rimo edi tanaro ro na-gororosioidiro, neio kimaragoidiro ro giopia mabu Tarena Urio ata wisa tato se gemeiriai-ro Godi ro Iu owera karo tato urubia aboto.

Ina Pita ro ibo simara Iu urubia aboto, 47 ‘Nio ata ro ama-iwotowa-ri ra nedi urubia ro obo to kiwarumiauti aboto? Godi ro Tarena Urio neio aboto ta-emeiriai-ro, nimo aboto keba se beda sosoro gemeiriai-ro, neio aboto atu sosoro emeiriai-die. 48 Neio nio ro obo to ba-diwarumiauti-mo, neio Iesu Keriso urubia to orowomidiro rie.’

Taie obo to aise giwarumiauti-rimo. Ina Pita neio ro iato gemodowa-rimo ibo, ‘Oro nimo mutu komidiro modobo ra arua saiki to?’