1 Iesu ro kitiodorai urubia, arua kimibiria urubia mutu Iudia duriomoro ato na-gorowomidiro, neio ro owera ta-girorowai-rimo ibo Iu owera karo tato urubia Godi edi owera ro neio ro ibose to ta-gimibiria-dumo.

2 Ata tau, Pita imese gidiai Ierusarema sabowa to. Arua Iu urubia Iesu na-gowasoro-rimo, neio ro Pita na-gowea-rimo, neio auna serawo goi-rimo nou aboto. 3 Taie neio ro ibo, ‘Pita oro Iu owera karo tato urubia mutu ohona na-ihotiti, nimo Iu urubia sabi idaibo oro ro iwaruriautititi!’

4 Taie Pita ro neio aboto owera mea mino to nato gemabuti, nou ro ibo, 5 ‘Mo Iopa sabowa ato nomidiro ina mo Godi aboto na-nararatoro hiwo sosoro to ata nakomu mo ro nato niauri, auna obotama toboro rido sapusapuwo rido gorobidiro-rimo ioudo gowororuwo-rimo mo aboto. Iedi obotama ro mo ro nato aupise nowea, 6 taie mo ro obotama goro na-nemetai nato a-giamo sairo to koroho namabu sirio, goto ato koromudidiro nakomu sirio, erere pawa mo ro nou niwia. 7 Taie toboro ohu rido owera kodu iato gutura-ro, “Pita! Nedi nakomu sirio ro diopiauti, ba-diho!”

8 Mo ro ibo, “Abera Naramu, nedi ohona ro mo ro abora ia se nama-iho-ri. Idaibo nakomu nimo ro kiho pua, sabi ie.”

9 Owera kodu ina toboro rido iato gutura-ro, “Imese beda mutu nakomu patu ro iamo Godi ro meana ta-giwai kiho modobo ie. Idaibo sosoro ohona sabi to iasoro mamo.”

10 Iedi tanaro ro netewa didi tau to gororosioidiro-birimo. Iato tuturu to pua iedi auna obotama ro ohona sirio mutu toboro to aise giwameai.

11 Iedi atu tau ro nato mo edi moto ato nomidiro netewa didi dubu peteibi neibi magere damo ato gotoi-birimo. Neibi Koneria ro Siseria sabowa rido gimeiriai-biro mo aboto. 12 Taie mo Tarena Urio ro nato nemowapotai-ro ibo nedi dubu peteibi ro mo neibi mutu atu se ou ri Koneria aboto, ata ubauba kimaragoidiro tato se. Nedi 6 Iu kimibiria borubi ro neibi ibose ta-garadabuai-birimo mo mutu atu se nou-birimo Koneria moto to.

13 Taie Koneria ro neibi ibo nimowapotai-bi, “Godi sowake urio nato gorowapotai-ro mo aboto. Nou ro ibo, ‘Oro ro sipu tato na peteibi ba-dimeiriai-ibi Iopa sabowa to, ata dubu masiro Saimoni Pita ba-morobai-birimo neito ba-mowou-birimo. 14 Ina oro moto urubia oro ia mutu nou ro mea owera ama-imowauti-ri, Godi ro nio beda sosoro ama-iapopo-ri ubauba aboudo.’ ”

15 Taie mo ro nedi owera ro kimowauti na-natamuai, Koneria nou urubia mutu iedi atu tau ro nato Tarena Urio neio aboto aise gateai-ro. Nimo aboto keba se beda sosoro gororuwo-ro, idaibo sosoro gororuwo-die neio aboto. 16 Ina mo kimaragoidiro nato niwameai Abera Naramu ro beda owera garo keba se. Nou ro ibo garo, “Urubia Ioane ro obo to se ta-iwarumiautiti, kaupoti nio Godi ro Tarena Urio to ama-iwarumiauti-ri.”

17 Nimo Iu urubia Iesu owera na-nimibiria-dumo Tarena Urio Godi ro nimo aboto ata wisa tato gemeiriai-ro, ina neio aboto atu sosoro wisa tato se gemeiriai-die. Ina mo aboudo modobo ra Godi woko kodiobuti? Marasio mo ro odiobuti-ri pua.’

18 Iu kimibiria urubia serawo owera dese to garo-rimo, iedi serawo ro boito hato gowou-rimo aise gararaseperai, taie Godi neio ro iato gemowabu-rimo. Neio ro ibo, ‘O! Godi ro ibose gabo ta-godobura-die Iu owera karo tato urubia ubauba aboudo erewesegere ri, womu tato womu tato keremiro komidai sapuwo to!’

19 Sitibini edi tau ato na-gopia-rimo, Ierusarema ato kimibiria urubia iato na-gorowomidiro neio ioudo gorowadaudiro-rimo erere sabowa to goroho-rimo. Arua neio Ponika duriomoro to giodori, arua neio Saiporasi ura to giabu-rimo, arua neio Entioko sabowa to gou-rimo. Nedi urubia ro neio ro mea owera Iesu sapuwo to iato Iu urubia se imowautiti-mo. 20 Arua kimibiria urubia Saiporasi ura rido giabu-rimo ina arua Sairini sabowa rido ie neio atu se gou-rimo Entioko sabowa to mea owera Abera Naramu Iesu sapuwo to neio ro gobodorouti-rimo Iu urubia aboto daro Iu owera karo tato urubia aboto. 21 Nedi owera ro urubia ro na-girorowidiro-rimo neio aise gimibiria-rimo taie iato gerewesegere-rimo Iesu kowasoro aboto. Mabu nedi kimowauti urubia ro Abera Naramu edi pupuwo korosa ro neio abato owamotiti.

22 Nedi tanaro ro na-gororosioidiro-rimo, kimibiria urubia na-gorowomidiro Ierusarema sabowa ato neio ro na-girorowai-rimo, taie neio ro Banabasi aise gemeiriai-rimo Entioko sabowa to. 23-24 Banabasi mea dubu e, nou ata auna kimibiria dubu e, Tarena Urio ro woworohutiti. Banabasi Entioko sabowa to na-gorowateai, nou ro nato giwia urubia Godi ro wisa tato nirimagare beda sosoro gaiwai neio aboto, nu auna kamade goi. Nou ro neio pupuwo iato giwaititi, idaibo sirio tau Abera Naramu owera se gi-irowidiro-ri morobise giropu mutu gi-isioidiro-ri tanaro. Ina kimibiria urubia imese sirio ta-goi-rimo, Iesu kowasoro urubia to aise gararapoi-rimo.

25 Taie Banabasi Tasasi sabowa to ito na-gou Sauro osora ri, nou ro ibo osoratiti womu tato ti-gowea. 26 Banabasi ro Sauro na-gowea nou ro nu aise gadabuai-ro imese gowou Entioko sabowa to. Neitiro Iesu urubia mutu ta-iradabutiti-do kaupoti kisimisi to, urubia sirio iato itamudirotiti-do. Iedi tau ro nato Entioko sabowa ato kowasoro urubia keba tau e urubia ro Keriso Urubia to kiapoi, ibo owamo Keriso do ie.

27 Iedi atu tau ro nato Godi ipusu owera urubia arua, neibi Ierusarema sabowa rido giodori-biro Entioko sabowa to. 28 Neibi aboudo ata dubu Agabasi nu aise gotobowa, Iesu urubia nou ro Tarena Urio pupuwo to gimowauti ibo, ‘Ata ubauba tau amadi-ereredea-ri imese duriomoro gebari ato. Iedi tau ro urubia auna ia sogoi ro ama-iwatititi-ri.’ (Nedi tanaro ro Karadiasi auna eputa dubu to na-gomidiro nato gororosioidiro-rimo.) 29 Kimibiria urubia ro na-girorowai-rimo neio owera nato giamo idaibo kimibiria borubi Iudia duriomoro ato na-orowomidiro beda sosoro amadimi-iwarebai-ri. Neio ro ubi to gomidai-rimo 30 taie mani iato gidabuti-rimo, iedi mani ro neio ro Banabasi ra Sauro ra aboto giaiwai-rimo. Ina ioudo neitiro ro giwou-rido Iudia duriomoro ato na-gorowomidiro Iesu urubia etio ro emeauri-dumo neio aboto.