1 Iedi tau ro nato Herodi boso urubia ro arua kimibiria urubia aise irobotiti-mo iado ri. 2 Keba se Ioane edi naramu ro Iemisi nou aboto gosioidiro-rimo nedi tanaro ro. Neio ro nu na-gorobai-rimo iato garia-rimo. 3 Herodi umoro na-goi ibo Iu urubia kamade ta-goi-dumo nou ro nedi tanaro ro na-gisioidiro, ina Pita nou ro iato gedea dibura to. (Nedi tanaro ro Patapata Beredi Kiaupai Tato nou soriomu kisioidiro tau ato gororosioidiro.) 4 Pita dibura to na-gedea-rimo nou netewa netewa boso dubu patu ro gemotoi-rimo. Herodi gabo ibo giworohuti, Pita sapuwo to Kimasaudai Soriomu iamo ri, nou saro gabo ato Pita nato owosuruo rie koto owai ri urubia sosoro gabo ato. 5 Pita dibura abato ibo gomidiro, isana Iesu urubia Ierusarema sabowa ato na-gorowomidiro nou sapuwo to Godi auna ia se gararatoro-rimo.

6 Pita ata kowaroho ato Herodi ro owosuruo rie koto aboto dibura moto rido, iedi duwo ro nato nu boso dubu teibo turituri ato gorobu. Tu sapusapuwo anikapo to ta-gemotohiti-rimo, anikapo womu teibo boso dubu teibo aboudo girobu-maro. Arua boso urubia ro magere gemotoi-rimo. 7 Iedi tau ro nato Godi sowake urio aise gorowapotai-ro, iedi dibura moto ro pina aise gimewia. Pita nou ro gomo ato aise gopipimai, nou ro ibo, ‘Pita! samo to deribua.’ Nou ro edi owera ro na-girorowai anikapo tu rido egenabo gararapopodorai-rimo.

8 Ina sowake urio ro ibo, ‘Oro bereito daratahirai, tamaka dirori-ma, dou-ro, mo saro rido dobodoro-ro.’

Taie Pita bereito karatahirai, 9 Godi sowake urio keba se ioudo gosuruo-ro Pita ro nou saro rido aise gobodoro-ro. Kaupoti Godi sowake urio edio tanaro ro gisioidiro, Pita umoro iamo pua ibo morobise to ororosioidiro-dumo. Nu a-gimaragoidiro ibo, ‘Mo ro hiwo to niauri.’ 10 Neitiro ioudo na-gosuruwo-rido keba boso dubu na-gorohodorai-rido ina ata boso dubu iato gorohodorai-rido, womu tato auna magere damo to ti-gorowateai-rido. Iedi auri magere gebari ro nakara se egenabo gorodobura. Taie neitiro imese gosuruwo-rido, auna gabo to na-gereredea-rido Pita ipi gabo ato sowake urio ro aise gemeserai, nou nakara se imese gou.

11 Pita iato a-geremasibai beda tanaro ro gororosioidiro. Nou ro ibo, ‘Mo abora morobise to umoro noti noi Abera Naramu ro emeiriai-die sowake urio mo aboto, ubauba aboudo nowagare-die. Iu urubia ubi ie mo Herodi woko urubia ro opia ri, kaupoti mo Godi sowake urio ro nowagare-die ioudo.’

12 Nou umoro na-goi, taie nu ioudo aise gemobodiai-ro Maria moto to, Maria mere ie Ioane, nou ata masiro Mareko. Kimibiria urubia sirio Maria moto ato ta-garadabuai-rimo, auna se iato gararatoro-rimo Pita sapuwo to. 13 Pita edi moto ro neito aise gemobodiai, magere ato iato gipoguti. Nou na-gipoguti iato ata sowake besere ro gemororowai, nu aise gosuruo-ro magere emodobura ri, iedi besere ro masiro Rouda. 14 Pua ie Rouda ro Pita kodu ato se geibimai nou auna kamade ro gorobai, kaupoti Pita magere nou ro emodobura pua. Rouda ina ioudo aise gororoupiriai-ro kowasoro urubia aboto, taie nou ro nato gimowapotai ibo, ‘Pita totoi-die magere damo ato!’

15 Ina neio ro ibo, ‘Ese, oro kawakawa ro ta-worobai!’

Kaupoti Rouda ro ibo, ‘A a nou se ie, Pita ie, nou ro ipoguti-die, nou owera kodu mo ro ta-nemororowai.’

Ina neio ro ibo, ‘Etu umoro ra io Pita edi sowake urio ro iaurititi, nou ro ipoguti-die.’

16 Pita kipoguti eremasio pua, inaina aise gipoguti-ro. Taie neio atu se iato gosuruwo-rimo nato Pita se gowea-rimo neio imese a-giwagogorai-rimo Pita sosoro na-gowea-rimo. 17 Pita ro neio tu to gimadohodai. Nou ro neio iato gimowauti nou Abera Naramu ro beda sosoro owosuruo-die dibura moto rido. Nou ro ibo, ‘Iesu edi neama ro Iemisi arua kimibiria naminiramio mutu neibi se ba-dimowapotai-ibimo ibo beda tanaro ro ororosioidiro mo aboto.’

Taie nedi owera ro na-garo, Pita ata moro to aise gaimai.

18 Ata saiki ato Pita edi boso urubia ro na-gemotoi-rimo neio ro nu potoro se gowea-rimo dibura moto goro ato, neio iato a-garageguti-rimo. 19 Herodi ro na-girorowai nedi owera ro, sowake urubia iato gimeirio Pita neio ro iato gosora-rimo, owea pua. Herodi ro iato gimodoruti Pita edi boso urubia ro gemotoi-rimo. Taie Herodi ro ibo, ‘Edi boso urubia ro neio nato orowomidiro-ri pua, ba-diopiauti-mo Pita kodau sapuwo to.’

Nedi tanaro ro na-gororoporeai-rimo, eputa dubu Herodi-Agiripa Iudia duriomoro na-gemeserai, imese godori-ro Siseria sabowa to nou iato gomidiro. 20 Taie ata owera nou ro nato girorowai Taia ra Sidoni ra sapuwo to, nou auna serawo ro gorobai edi sabowa teibo ro neitiro urubia aboto. Kaupoti Taia ra Sidoni ra sabowa teibo rido urubia ta-gimeiriai-rimo Herodi aboto, neio atu ubi ato Herodi ro miro neio abato edea ri. Nedi urubia ro neido na-gou-rimo Herodi saro edi dubu ro emeaurititi masiro Barasitasi neio keba se nou aboto gorowateai-rimo, neio ro nu a-wageawadotiti-mo neio iwarebai ri. Barasitasi ubi ta-goi neio kiwairiai aboto. Neio ubi ie miro ro kereredea mabu neio ohona Herodi duriomoro rido imadetiti-mo.

21 Taie Herodi ro beda saiki gapoi karadabuai aboto owera eremowauti ri, eputa dubu edi obotama iroidirotiti-dumo nou ro na-giroiti eputa dubu sea to aise gomi. Taie urubia sirio na-garadabuti-rimo Herodi owera karo nato gatamuai, 22 urubia sirio imese kamade ro giwati nou owera gare na-gemedea-rimo. Neio ro ibo giaiauti-rimo, ‘Nedi dubu ro owera urubia dubu sosoro aro pua, Godi sosoro aro-die!’

23 Ina Godi masiro auna owai pua Herodi ro, nu auna nakara se aise gorowai. Nu nakara se ohu to gorowiourio, ina noudo ie iedi atu tau ro nato Godi ro sowake urio iato gemeiriai-ro, Herodi nou ro temeteme aise gomia. Taie nu niro turi poporo ro aise gowaroho-rimo, iato nu pamo aise gowea.

24 Kaupoti Godi edi mea owera ro urubia ro aise obodoroutititi-mo erere duriomoro to.

25 Taie Banabasi tiro Sauro mutu neitiro edi woko aboto gimeiriai-marimo na-goporeai-rido, Ioane, ata masiro Mareko neitiro ro nou se gadabuai-rido, neibi atu se imese gorowameai-birimo Ierusarema sabowa rido Entioko sabowa to.