1 Iesu patu urubia Entioko sabowa ato na-gorowomidiro, ina neio abato Godi ipusu owera urubia ibose to gomidiro-birimo kitamudiro urubia mutu. Nedi na peteibi ro neibi ie, Banabasi, Simioni nu garegare dubu e, Rukiasi nou Sairini sabowa dubu e, eputa dubu Herodi nu kororomai boinana Manaini, ina ibose Sauro iato ta-gomidiro. 2 Iedi tau ro nato neio ohona aise giraia-rimo, kiho tato gorowomidiro Abera Naramu se gemowabu-rimo. Iedi tau ro nato neio Tarena Urio ro nato gimowapotai-ro ibo, ‘Banabasi ra Sauro ra ba-dihodowa-mamo, neitiro se ba-dimeiriai-mamo mo ro edi auna woko ro na-nimapoi-ma neitiro ro nou osioidiro rie.’

3 Nedi tanaro teibo ro na-gororoporeai-rido ohona karaia daro Godi kemowabu nou saro gabo ato, Godi iato garatoro-rimo. Neio tu neitiro eputa ato iato gitomo-rimo neitiro mea korosa kimia-ma sapuwo to. Taie neitiro ioudo imese gimeiriai-marimo Godi woko emesioidiro ri.

4 Banabasi ra Sauro ra Tarena Urio ro gitiodorai-ma Entioko sabowa rido imese giodori-ma Serusia sabowa to, taie ioudo neitiro sawa pe to se giora-rido imese giabu-rido Saiporasi ura to, 5 Ioane nou ata masiro Mareko nou mutu, neitiro nou ro iwarebidirotiti-ma. Neitiro Saramisi sabowa to gou-rido keba se. Iu urubia edi karadabu moto sirio ro neitiro ro Godi edi mea owera ro urubia iato gimowauti-rido.

6-8 Ina edi ura ro neitiro ro nato goroho-rido womu tato ata auna sabowa masiro Peposi neito imese gorowateai-rido. Taie Peposi sabowa ato neitiro ro ata Iu pakani dubu iato gowea-rido, nou masiro Baiesu. Nou ata masiro Giriki owera to owamo ibo Erimasi, nou maumo owamo ibo Pakani Dubu. Nou ata karasaubuti dubu e. Nou a-iratigititi Godi ipusu owera dubu to. Nedi pakani dubu ro gabamani dubu gomo ato ateidirotiti. Nedi gabamani dubu ro masiro Seregio-Pauro, nu ata mea kimaragoidiro dubu e.

Iedi tau ro nato gabamani dubu ro owera nato gemeiriai Banabasi ra Sauro ra nou aboto ou ri, mabu nu ubi ie Godi edi mea owera ro irowidiro ri neitiro aboudo. Kaupoti edi pakani dubu ro Erimasi ubi tato ie gabamani dubu ro mea owera Iesu sapuwo to kimibiria, neitiro nou ro aise idiobutiti-ma.

9 Kaupoti Sauro, nu ata masiro Pauro, edi tau ro nato nou Tarena Urio ro goworohuti, ina nu idomari teibo Erimasi ato se giwotobowa-ma nou se giauri. Nou ro ibo, 10 ‘Oro imese Satani mere dubu ia ie. Mea tanaro kisioidiro aboudo oro imese neio boso dubu e. Oro abato ubauba tanaro, karasaubuti tanaro imese sirio ia se iamo. Abera Naramu edi morobise owera ro oro ro iwesegerewadotiti bagea owera to. 11 Abora oro idomari teibo Abera Naramu ro tema to ama-iatimai-mari, nedi tau ro neido egea mere se oro pogo ama-omidiro-ri, saiki pina woroworo oro ro iauri-ri pua!’

Nedi atu tau ro nato nou idomari teibo duwoduwo ro aise giatimai-ma, ito modobo pua mea se kirarowo. Taie nou ito na-giaubai modobo pua, nou ro urubia giosora owarebai ri. 12 Ina nedi tanaro ro gororosioidiro-rimo gabamani dubu ro na-giauri, nou ro mea owera Iesu sapuwo to nato aise gimibiria. Mabu neitiro ro edi owera ro na-gorowauti-rido Abera Naramu sapuwo to, nou imese auna ia kimaragoidiro ro gopia.

13 Pauro edi na urubia mutu goroho misinare aimara, neibi Peposi sabowa na-gemeserai-birimo, imese giabu-birimo Pega sabowa to. Pega sabowa Pampiria duriomoro ato owamo. Taie neibi edi tau ato gorowateai-birimo, Ioane-Mareko ro neitiro iato aise gimeserai-ma, nou ioudo aise gorowameai-ro Ierusarema sabowa to.

14 Ina Pauro Banabasi mutu neitiro ioudo gidiai-rido womu tato Pisidia duriomoro to ti-gorowateai-rido, iato neitiro aise gimobodiai-ma Entioko sabowa to. Iedi Entioko ro Pisidia duriomoro ato owamo. Neitiro iato na-gomidiro-rido Iu urubia komidiro saiki ro iato girobai-ma. Taie neitiro edio saiki ro nato aise godoro-rido Iu urubia karadabu moto to. 15 Taie Iu dubu teibo ro Tarena Buka owera urubia neitiro ro nato gimoputi-rido. Neitiro ata ro Mose edi sabi owera ro neido gimoputi, ina ibose ata ro Godi ipusu owera urubia ro edi na owera gisioidiro-rimo, nou ro neido gimoputi. Kioputi na-goroporeai karadabu moto edi urubia ro na-iaurititi-mo neio umoro owera iato gemeiriai-rimo Pauro ra Banabasi ra aboto ibo, ‘Namutuna teibo, nitiro abato ata owera kowamo ato, modobo ie nitiro ro urubia nato na-orowomidiro kimowauti neio pupuwo kimowaititi sapuwo to.’

16 Pauro na-geribua tu to urubia nou ro iato gimadohodai owera eremasiai ri, nou ro ibo, ‘Isiraere urubia idaro Iu owera karo tato urubia nio ro Godi na-emowabutiti-dumo, owera neito ma-dirorowidiro-rimo!

17 Isiraere urubia edi na emowabutiti-dumo nimo nasa naminami nou ro keba se ta-girapoi. Neio edi tau ato gorowomidiro Isipi duriomoro ato neio ro auna ia sipu nou giwia-rimo. Godi edi pupuwo korosa ro Isiraere urubia nou ro neito giwosuruwo-ro Isipi duriomoro rido. 18 Neio Godi ro edi mino to na-iwaboititi-ro goto se duriomoro ato 40 kisimisi to, Godi serawo samo to oititi pua neio aboto. 19 Keineni duriomoro ato neio sapuwo to Godi ro 7 erere owera urubia patu neio giwai ubauba, ina nedi duriomoro gebari ro Isiraere urubia aboto gapoi. 20 Nedi tanaro ro na-gororosioidiro-rimo 450 kisimisi ta-giporeai-rimo Isipi duriomoro ato na-irowomidirotiti ina ibose na-outiti-rimo ipi ato, womu tato Keineni duriomoro ti-girobuti-rimo.

Ina nou saro gabo ato Godi ro neio kiauri urubia nato gimio, womu tato Semuere iana dubu e Isiraere urubia nou ro kiauri. Ibose nou Godi ipusu owera dubu e. 21 Ina neio Godi aboto nato gararatoro-rimo eputa dubu imia ri neio kiauri sapuwo to. Keba se neio Godi ro Sauro gimohodowa. Sauro Kisi, nou Beniamini gu dubu e. Isiraere urubia nou ro 40 kisimisi to giwaboi. 22 Sauro Godi ro aise gowagare ina iato nou ro Deibidi gohodowa eputa dubu to Isiraere urubia iwaboi na. Godi ro Deibidi sapuwo to idaibo owera gutura, “Iesi edi mere ro Deibidi nou abato ta-nowea mea tanaro, neitiro kaupoti kimaragoidiro ie nou mutu, mo ubi tanaro imese nou ro ama-isioidirotiti-ri.”

23 Godi ro keba se owera ta-garo-ro ibo Deibidi edi nasa ro Isiraere urubia nou ro amadi-apopo-ri ubauba aboudo, Godi ro hodo ibo gasaubiai-ro keba se, ina Deibidi edi nasa ro Iesu nou se ie.

24 Iesu saro to gou-ro keba se Ioane ro Isiraere urubia ibo imowautititi, “Nio ubauba aboudo derewesegerai-mo ina nio obo to nato anama-iwarumiauti-ri!” 25 Ioane woko na-goporeai nou ro ibo gimowauti, “Mo nio ro etu to nasoro-dumo? Mo Godi ro kohodowa dubu to asoro mamo, mo nou pua. Nu saro rido tou-die, mo aboudo modobo pua nou sairo sigibere kemowiouti aboto, nu imese auna ia dubu e.”

26 Mo borubi Iu urubia, nio Aberaham urubia ie, neito ma-dirowidiro-rimo! Ina ibose arua Iu owera karo tato urubia nato na-orowomidiro nio ro Godi na-emowabu-dumo, nio imese owera atu se neito ma-dirowidiro-rimo! Nimo aboto mea owera neito ta-gorowateai-die nimo Godi ro ubauba aboudo kiwatateai aboto. 27 Ierusarema sabowa ato edi urubia ro na-irowomidirotiti neio eputa urubia mutu, nedi urubia ro neio ro Iesu mea se eibimai pua. Ibose Godi ipusu owera urubia ro edi owera ro gisioidiro-rimo, komidiro saiki gabogabo ato ta-imoputiti-mo. Kaupoti Ierusarema urubia ro maumo mea se imadetiti pua, ina noudo ie Godi ipusu owera morobise to noti gororosioidiro-rimo neio ro Iesu na-gapoi-rimo opia ri. 28 Iesu kopia sapuwo to neio ro ata ubauba ata emowea pua. Kaupoti nou neio ro Paireti aboto aise gowou-rimo nou ro neio gabo imapoi ri kopia aboto.

29 Beda owera iatititi-mo keba ia se Godi ipusu owera urubia ro nou pamo kowea sapuwo to, Ierusarema urubia ro ibose to gisioidiro-rimo nou aboto. Namuturubi ro ota kemowotowa rido nou pamo durupi na-gebedai-rimo, bobo to aise gibiria-rimo. 30 Kaupoti nu Godi ro pamo rido aise gowameai-ro. 31 Nou ro Gariri duriomoro rido beda urubia giwaboi-ro Ierusarema sabowa to, nou neio aboto se irowapotaidirotiti. Nou abato beda tanaro ro gororosioidiro-rimo nedi urubia ro neio ro owautiti-dumo Iu urubia aboto.

32 Keba ia se Godi ro beda owera ra na-garo-ro nimo nasa naminami aboto, abora nedi mea owera ro nou sapuwo to nio neitiro ro neito nimowauti-do. 33 Nimo gu ioudo irobu-die, ina nimo sapuwo to Godi ro beda owera garo keba se morobise to ti-gororosioidiro-rimo, Iesu nou ro na-gowameai-ro pamo rido. Tarena Ohare Buka 2 ato nedi owera ro nato iamo Godi ro na-garo, Oro mo mere ie. Abora mo oro Abera to nararapoi.

34 Iesu Godi ro bobo rido ta-gowameai-ro ina nou orowameai-ri pua bobo to durupi iato epuse ri. Ina nou sapuwo to ie Godi ro keba se ta-gutura ibo, Deibidi mo ro ta-nemowapotai ibo nu mo ro anama-owarebidiro-ri, ina nio morobise to ibose to anama-iwarebidiro-ri. 35 Ina nou mabu ato iamo Tarena Ohare Buka ata ipi ato Deibidi ro ibo ta-garo Godi aboto, Oro ro emauriai-ri pua oro Tarena Dubu durupi epuse ri bobo ato.

36 Deibidi komidiro keremiro maumo ato nou ro Godi ubi tanaro ta-isioidirotiti. Deibidi na-garaburai nou pamo durupi aramio negenege beda moro ato gimobuti-rimo nou neio gomo ato gemoba-rimo, ina nou durupi aise gepuse. 37 Kaupoti Godi ro edi dubu ro gowameai-ro bobo rido nou ia sapuwo to Godi owera morobise to ti-gororosioidiro-rimo, nou pamo durupi epuse pua.

38 Mo borubi Iu urubia, nio modobo ie umoro aise koi neitiro ro nio beda owera to nimowauti-do. Owera ibo ie Iesu aboudo modobo ie nio edi ubauba ro nou ro kimatopeamuti aboto. 39 Mose edi sabi kibodoro gabo ro nio nou ro mea tuputupu urubia to iapoi-ri pua. Kaupoti Iesu sapuwo to etio ro imibiria-dumo neio nou ro mea tuputupu urubia to nato ama-iapoi-ri.

40 Ina noudo ie mea se deremowotoi-mo, Godi ipusu owera urubia edi owera to garo-rimo, modobo pua nio aboto atu sosoro tanaro ro kororosioidiro. Mabu Godi ro ibo ta-garo, 41 Nio etio ra mo na-nemasesewado-dumo mea se ma-dowea-mo! Nio kimaragoidiro ro nama-iopia-ri iato nio amadimo-orowaburo-ri. Mabu nio komidiro keremiro maumo ato mo ro ata sosoro tanaro anama-osioidiro-ri, kaupoti nio ata dubu ro nedi tanaro ro nou sapuwo to kimowauti rasiri ie, nio ro imibiria-ri pua.’

42 Pauro ra Banabasi ra Iu urubia karadabu moto na-gemeserai-rido, taie Iu urubia ro neitiro nato gimagege-marimo ibo, ‘Nitiro ina ata komidiro saiki ato ba-dorowameai-rido nimo nedi owera ro imowauti ri.’

43 Taie iedi karadabuai tanaro ro na-gororoporeai, Iu urubia sirio, ina Iu owera karo tato urubia mutu etio ro godoro-rimo Iu urubia tanaro kisioidiro aboto, neio ro ibose Godi na-emowabutiti-mo, nedi urubia ro Pauro ra Banabasi ra beda moro to gou-rido neio ro saro rido aise gibodoro-marimo. Taie neio neitiro ro aise gimediawado-rido ibo, ‘Godi edi wisa tato nirimagare ro na-gaiwai-ro nimo aboto, modobo ie edi gabo ro nio nato aise korowotoi.’

44 Taie iato ata komidiro saiki na-gorobai, sabowa urubia imese sirio se aise gemaubai-ro Abera Naramu edi owera ro nou irowidiro rie. 45 Ina Iu urubia ro na-giwia-rimo Iu owera karo tato urubia sirio, neio masawe aise goi-rimo. Pauro neio ro ubauba owera imese iato gomio-rimo, ina nou owera aise gemasio-rimo.

46 Kaupoti Pauro ra Banabasi ra neitiro ro owera pupuwo to iato garo-rido neio aboto ibo, ‘Keba se Godi edi mea owera ro neitiro ro nio Iu urubia aboto ta-norowauti-rido, io modobo ie. Kaupoti nedi owera ro nio ro ebeiouti-dumo. Pua buro! Nio ro ibo imaragoidiro-dumo, “Nimo ro modobo pua womu tato keremiro kowea aboto!” Ina noudo ie neitiro Iu owera karo tato urubia aboto namado-oroho-ri, neio anamadi-imowauti-ri. 47 Mabu neitiro Abera Naramu ro ibo nimowapotai-maro, Oro mo ro narapoi oro pina ie Iu owera karo tato urubia sapuwo to ama-imewiautiti-ri, imese duriomoro urubia umoro oititi ri ibo mo ro urubia ubauba aboudo idaibo mino to kiapopo ie.’

48 Iu owera karo tato urubia ro na-gimororowai-marimo neitiro edi owera ro na-garo-rido neio kamade ro giwati, ina neio ro inaina aise garowado-rimo ibo, ‘Abera Naramu edi mea owera ro imese meana ia ie!’ Ibose Godi ro keba se etio girapoi womu tato womu tato keremiro kowea aboto, neio ro nedi owera ro aise gimibiria-rimo. 49 Taie iedi tau ro noudo Abera Naramu edi owera ro Pisidia duriomoro ato imese aise gorobodorouti.

50 Kaupoti awawo mamio Godi etio ro emowabutiti-mo, sabowa eputa urubia mutu, neio Iu urubia ro niro korosa gimio-rimo Pauro ra Banabasi ra sapuwo to. Ina neitiro urubia sirio ro ubauba mino to giworohuti-marimo, taie neio simara duriomoro rido neitiro ioudo aise giwagare-marimo. 51 Iedi tau ro nato Pauro ra Banabasi ra poro panese se geremahuduti-rido, ina neitiro imese gou-rido Ikoniam sabowa to. 52 Kaupoti kimibiria urubia Entioko sabowa Pisidia duriomoro ato na-owamo, neitiro ro na-gimeserai-rido neio auna kamade ro iwatititi neio Tarena Urio ro wiworohutititi.