1 Nio sapuwo to owera ibo ie, nio kebase Godi ubi tato tanaro na-isioidirotiti-mo, nio urio pamo urubia sosoro irobutiti. 2 Iedi tau ro nato nio kimibiria tato urubia ro irowomidirotiti, sopu duriomoro durupi ubi tanaro nio ro nou isioidirotiti-mo. Ibose Satani, ubauba orora sirio toboro rido na-iaurititi-die, nio ro nou ubi tanaro aise isioidirotiti-mo. Etio ra Godi ubi tanaro na-ibeouti-dumo kisioidiro aboto, neio niro turi ato Satani ro ubauba woko aise isioidirotiti. 3 Nimo kebase neio sosoro ta-nirowomidirotiti ubauba tanaro aise nisioidirotiti-mo, ibose durupi ubi tanaro ubauba kimaragoidiro mutu aise nisioidirotiti-mo. Arua urubia beda sosoro irowomidirotiti nimo neio sosoro ta-nirowomidirotiti. Godi auna serawo ro owatititi nimo aboto, mabu nimo giropu imese ubauba ie, ina nou ro ta-nimowapotai-ro ibo nimo nou ro ubauba wisa anamadi-imia-ri simara ubauba tanaro sapuwo to.

Morobise ie nimo edi ubauba tanaro sirio ro na-nisioidirotiti-mo nimo urio pamo ta-irobutiti. 4 Kaupoti nimo Godi ia ro natonato nimati-ro, nou nirimagare imese auna ia ie nimo aboto. 5 Ina noudo ie nimo pamo urubia sosoro na-nirobutiti nou ro nimo imese pamo rido ta-niwagare-ro. Nimo Godi ro Iesu mutu pamo rido atu se ta-niwameai-ro keremiro to. Morobise ie, Godi edi wisa tato nirimagare ro nimo aboto na-gaiwai-ro nou ro neito niapopo-ro. 6 Nimo nou ro Iesu Keriso aboto ta-nidabuai, ina nimo Iesu mutu Adiri sabowa ato ta-niwomi, eputa urubia to ararasoro ri. 7 Godi ro idaibo tanaro gisioidiro ido paea se imowawuti ri, ibo nu edi auna wisa tato nirimagare ro imese morobise ia ie. Nimo Iesu Keriso aboto na-nidabuai, Godi edi auna natonato ro nimo aboto nato gowapotai-ro.

8 Morobise ia owera nou e, Abera Naramu Godi edi wisa tato nirimagare ro nio ubauba aboudo nou ro neito ta-giapopo-ro, nio ro na-gimibiria-rimo. Nio nakara se karapopo ata gabo tato ie, nedi kiapopo tanaro ro Godi ro wisa tato se gosioidiro nio sapuwo to. 9 Ata dubu ata ro idaibo keremowabu owera karo modobo ia pua, ‘Mo ro meamea tanaro na-nisioidirotiti, mo Godi ro nou ri napopo-ro ubauba aboudo.’ 10 Nimo kimibiria urubia Godi ia ro nisioidiro. Nedi tanaro ro Iesu Keriso ro na-gisioidiro nimo Godi ro orio neito niwaititi, nimo ro meamea tanaro kisioidiro aboto. Gabo nou ro kebase ta-nimesioidiro-ro nimo ro nedi meamea tanaro ro isioidiro ri.

11 Nio ro ma-dimaragoidiro-mo! Nio kebase daimodaimo urubia to irarasorotiti-mo. Ina Iu urubia ro nio sapuwo to ibo iarotiti-mo, ‘Iedi urubia ro neio dubu simara takamai kiasio tato urubia ie.’ Kaupoti nedi Iu urubia ro neio ro iedi tanaro ro na-isioidirotiti-mo, tu to isioidirotiti-mo, urubia dubu ohu durupi ato isioidirotiti-mo. 12 Kebase nio Keriso umoro tato ta-irowomidirotiti, ibose nio Isiraere urubia aboto karadabuai gabo tato ie. Godi ro edi hodo ro na-isaubotiti-ro, Isiraere urubia aboudo se isaubotiti-ro, nio aboudo isaubo pua. Kebase nio ta-gimaragoidiro-rimo ibo meana Godi aboudo nimo aboto ororuwo-ri pua, Iu urubia aboto se gororuwo-ro. Nio edi tau ro nato Godi umoro imese musomuso ia se ta-irowomidirotiti, ina noudo ie nio Godi aboto iwatutiti pua. 13 Kaupoti nio Iesu Keriso ro ta-gidabuai nou edi karima ro na-garawiriti nio nou ro neito giwosiomai-ro nou asesepu maumo to.

14 Mabu nou e, Iu urubia, Iu owera karo tato urubia, nedi patu teibo ro neitiro abato miro Iesu Keriso ia ro gedea, neitiro nou ro kaupoti to aise gidabuai-ma. Iu urubia, Iu owera karo tato urubia, nedi patu teibo ro neitiro kebase serawo erereaurititi-do, ina neitiro mea se iroroworohutiti pua. Urubia patu teibo edi tanaro ro giwasiai-ma, turi ato nou ro owamotiti. 15 Iesu Keriso durupi edi tau ato gaiwai, Iu urubia, Iu owera karo tato urubia, edi korohoio tanaro ro na-iwasioidirotiti-ma, nou ro aise gahuruti, taie nou ro aise gidabuai-ma kaupoti urubia to ararasoro ri. Iesu Keriso ro Mose edi sabi sirio ro idaibo mino to womu to imese giedea. Mabu Iesu ro edi tanaro ro na-gosioidiro, nu ubi ie urubia patu teibo idabuai-ma ri kaupoti urubia to ararasoro ri, nou abato aise iateidiro ri, ibose Iu urubia, Iu owera karo tato urubia abato miro edea ri. 16 Iesu Keriso na-garaburai ota kemowotowa ato, nedi urubia patu teibo ro nasanasa to na-imidirotiti-do nou ro iedi korosa ro nato gagodo neitiro kaupoti to komidiro sapuwo to. Ina ata mabu nou e, nedi urubia patu teibo ro Iesu ro idabuai-ma rie Godi aboto. 17 Nio Iu owera karo tato urubia Godi aboudo damodamo ia se na-gorowomidiro, ibose nimo Iu urubia Godi abato aupise na-norowomidiro, Keriso na-gou-ro nimo aboto atu se mea miro owera nato nimowauti-ro. 18 Iesu Keriso ota kemowotowa ato na-garaburai ina noudo ie gabo modobo ia to aidiro-die, Iu urubia, Iu owera karo tato urubia, nimo atu se Abera Godi mutu keremowauti aboto. Nimo Tarena Urio ro niwarebai-die nedi tanaro ro nou kisioidiro aboto.

19 Ina noudo ie nio etio ra Iu owera karo tato urubia to na-wararasoro-dumo, nio kebase gomo ato irohotiti-mo, nio moto goro ia to odoro pua. Iedi tau ro nato nio Godi urubia to ararasorotiti pua. Kaupoti nio abora ibo pua, nio abora Godi urubia ie. Nio idaibo kaupoti urubia ie, Godi simara ia tarena urubia mutu kaupoti to ta-gararapoi-do. Nio abora Godi moto urubia ie. 20 Nio moto sosoro ie. Iesu Keriso ro kitiodorai urubia, Godi ipusu owera urubia mutu, iedi moto ro neio nou posi sosoro ie. Iesu ia nou se ie turimida posi, 21 nedi moto ro nou pupuwo ato itoititi, ibose iedi moto ro nou ro aise emogutiti. Ina noudo ie edi moto ro Abera Naramu edi tarena moto ro neito ararapoi-die. 22 Nio Iu owera karo tato urubia, Iu urubia mutu, nio moto kididi namabu sosoro ie Iesu ro na-idabutiti, nedi moto ro Godi edi Tarena Urio ro nou komidiro moro to ararapoi rie.