1 Ina noudo ie, mo, Pauro ie, Godi a-nararatorotiti nio sapuwo to. Mo dibura to nedea-rimo, mabu mea owera Iesu Keriso sapuwo to nio Iu owera karo tato urubia nimowautiti. 2 Morobise ie nio umoro ta-goi-rimo ibo mo aboto Godi ro edi wisa tato nirimagare ro gaiwai-ro nou woko emesioidiro ri. Nedi woko ro ibo ie nio Iu owera karo tato urubia aboto mea owera Iesu sapuwo to imowauti ri. 3 Urubia ro umoro koi tato owera piro se na-owamotiti, mo aboto Godi ro nou gowapotai-ro. Nedi owera ro nou sapuwo to dese to egea mere se niatiti. 4 Nio ro nedi peba titi ro neido namadime-eremoputi-ri, nio umoro nato oi rie ibo, Pauro nedi tanaro ro nou sapuwo to auna umoro mutu imidirotiti. Nedi umoro tato tanaro ro Iesu Keriso sapuwo to ie. 5 Urubia erere tau ato kebase na-irowomidirotiti, Godi ro neio aboto owapotai pua, piro se owamotiti. Godi edi Tarena Urio ro tanaro nou ro gewererio-ro, Godi edi tarena kitiodorai urubia ro neio aboto, ibose nou ipusu owera urubia mutu.

6 Nedi owera ro piro se na-owamotiti nou e, mea owera Iesu Keriso sapuwo to Iu urubia, Iu owera karo tato urubia ro na-girorowai-rimo, iedi soirio teibo ro Iesu ro kaupoti durupi aise gosioidiro. Meana Godi aboudo na-woutiti-die neitiro ro atu se amadimi-imade-ri. Iedi owera ro Godi ro kebase na-gowapotai-ro Iesu Keriso ro neio kiwarebai sapuwo to, nedi soirio teibo ro neitiro aboto atu se iedi owera ro morobise to ama-ororosioidiro-ri. 7 Godi edi wisa tato nirimagare ro mo neito nohodowa-ro nou sowake dubu to ararasoro ri, nu edi mea owera ro Iesu Keriso sapuwo to urubia imowauti ri. Nedi woko ro mo ro na-nemesioidiro, mo aboto Godi ro simara pupuwo to gaiwai-ro.

8 Godi edi tarena urubia ro neio dubu patu maumo ato, mo sopu ia to noroho-die. Mo ro ata tanaro kosioidiro modobo pua nedi woko ro korobai aboto. Kaupoti Godi ro gowapotai-ro nedi wisa tato nirimagare ro ina noudo ie nedi woko ro mo aboto kowapotai Iu owera karo tato urubia imowauti ri. Iedi meana ro Keriso abato na-iamotiti-die maumo imese awawo ia ie, urubia ro simara umoro to kiwia modobo pua.

9 Godi edi gabo ro tuturu tau to nou abato piro se ta-owamotiti, ina Godi ro woko mo aboto gaiwai-ro nedi gabo ro paeapaea owaititi ri imese urubia aboto. Nou ro gisioidiro imese sirio nakomu. 10 Godi ro auna woko nu simara urubia aboto nato gaiwai-ro. Godi ro nedi gabo ro nou ri gosioidiro, pupuwo urio sirio toboro ato na-irowomidirotiti neio umoro iwai rie ibo Godi imese muro ia ie. Nou simara urubia kosioidiro ie nedi tanaro ro.

11 Godi abato edi gabo ro piro se na-owamotiti-ro nimo Abera Naramu Iesu Keriso ro edi woko ro gosioidiro paeapaea neito gowai. 12 Nimo abora kimibiria ti-niworohuti-dumo Iesu sapuwo to, nimo nou ro ta-nidabuai nou abato norowomidiro. Ina noudo ie abora nimo Godi sosoro gabo ato tere tato korowotoi. 13 Ina noudo ie nio mo ro a-nimagege, mo dibura ato na-noroho nou mabu ato, nio Iesu kowasoro aboudo ubi tato koi modobo pua. Modobo ie nio kamade ro kiwati nou sapuwo to, mabu nedi koko tau ro mo ro na-niaurititi, nio kiwarebai aboto.

14 Nedi mabu ro noudo ie mo kauhio to a-nomi mo ro Abera Godi a-nararatoro, 15 Adiri ato ibose sopu duriomoro ato erere gu urubia etio ro orowomidiro, neio edi keremiro ro Godi ro gimio-ro. 16 Mo ro nio sapuwo to Godi aise nararatorotiti, mabu imese meana nou abato iamotiti, modobo ie nedi meana ro nou aboudo nio nou ro maumo pupuwo kiwaititi, Tarena Urio edi pupuwo ro neito. 17 Mo ro Godi nou ri nararatorotiti Iesu Keriso nio niro turi ato aise omidiro ri nio kimibiria maumo ato. Ibose mo ro Godi a-nararatoro nio ro nirimagare tanaro aise isioidiro ri, nio koko se nato amadimi-iwotoi-ri, tumu obo ro iwaruria-ri pua. 18 Mo ro Godi ibose a-nararatoro nio ie, Godi edi tarena urubia sirio ro neio mutu, nio abato pupuwo korosa aise ama-owamotiti-ri nio keremasibawado aboto, ibo Iesu Keriso edi nirimagare ro imese boroboro ia ie, ibose womu tato ie. 19 Nedi nirimagare ro, urubia ro simara umoro to modobo ia pua momuo se kowea aboto. Kaupoti mo ro Godi a-nararatoro nou edi nirimagare ro nio umoro mea ia se amadimo-oi-ri. Idaibo tanaro namadimo-ororosioidiro-ri, nio Godi sosoro morobise to nato ama-irowomidiro-ri.

20 Godi edi pupuwo korosa ro nou simara urubia abato pupuwo tanaro tororosioidiro-dumo. Ina noudo ie nou aboudo modobo ie imese sirio tanaro kisioidiro aboto. Nimo ro idaibo tanaro sapuwo to kimaragoidiro ata gabo ata owamo pua. Ibose nou sapuwo to kararatoro ata gabo ata owamo pua. 21 Urubia sirio ro Godi urubia na-iauri-dumo, neio ro Godi edi auna pupuwo ro nou ba-miauri-mo. Ibose urubia ro Iesu na-iauri-dumo, neio ro Godi edi auna pupuwo ro nou ba-miauri-mo. Ina noudo ie neio ro modobo ie Godi womu tato womu tato aise kemowabu. Ibose ba-mororosioidiro-mo.