1 Aisaki ro iato gemeiriai nou sowake koroho dubu Iakobo aboto orobai-ri owou ri nou aboto owera emowauti ri. Taie Iakobo na-gorowateai nou aboto, Aisaki ro korosa iato gaiwai. Taie nou ro owera iato gemowapotai ibo, ‘Oro ata besere ata neido Keineni duriomoro rido edea ate, idaibo Hiti busere. 2 Oro ba-dou simara aramunegere bato omidiro Betuere, Mesopotamia duriomoro ato, oro mamu medera ie Rebeni iato tomidiro, oro ro nou besere ata ba-dedea! Nou nimo tanaro ie. 3 Godi imese pupuwo ia dubu e oro nou ro korosa ba-maiwai. Sirio aramio merebusere ba-momio oro neio abera to ba-mararapoi, urubia dubu patu sirio neio aboudo amadimo-osuruwo-ri. 4 Ibose iedi korosa ro Iawe ro Aberaham na-gomio iedi atu korosa ro oro aboto nou ba-miaiwo-ro. Iato iedi duriomoro ro oro aboto aise ba-miaiwai-ro ibose oro abora edi duriomoro ato na-omidiro, Godi ro iedi duriomoro ro keba se ta-gapoi Aberaham aboto.’

5 Iato Aisaki ro Iakobo imese gemeiriai ito gou oromo teibo turituri to, iedi muso duriomoro ro tararasoro Mesopotamia. Nou a-gou-ro Rebeka medera Rebeni bato gomidiro. Rebeka ra Rebeni ra neitiro abera ie Betuere, nou Arama dubu e. Rebeka mere teibo ie Iso ra Iakobo ra.

6 Iso umoro ta-goi Aisaki ro korosa na-gaiwai Iakobo aboto nou ro iato gemeiriai oromo teibo turituri to, duriomoro masiro Mesopotamia, nou orobo kedea aboto. Nou umoro idaibo ta-goi nou abera ro ta-gutura ibo, ‘Oro ro edea ate ata besere ata Keineni duriomoro rido.’ 7 Iso ibose umoro ta-goi Iakobo mamu ra abera ra iedi owera ro na-garo-rido nou ro aise gisioidiro, iato gaimai nedi duriomoro ro neito Mesopotamia to.

8 Idaro nou ro ibose ta-geremasibai neitiro abera ubi tato ie nou orobo teibo Keineni busere teibo ie. 9 Nou ri nou ata orobo iato gedea, Keineni orobo pua, Aberaham ata mere Isimere iedi besere ro nou gedea Iso ro, iedi besere ro nou masiro Maharata, Nebaioti medera ie.

10 Iakobo Besiba imese gemeserai taie nou imese gaimai-ro Mesopotamia duriomoro to iato ata sabowa towamo masiro Harani neito gou-ro. 11 Ipi ato duwo ro aise gematimuti. Nou na-giraroweauti nadi nato giwia iato giwou-ro, taie aise giaremuti gomogomo ato eputa neito gorowasiai, nou iato aise gutuwa norou.

12 Iedi duwo ro iato na-gorobu nou ro a-giauri hiwo to auna negere totorowa Adiri rido ioudo gororuwo-ro womu tato goto ato ti-gotobowa. Iedi totorowa ro nato Godi sowake koroho urio arua a-giourio-rimo arua a-giroruwoidiro-ro iedi tanaro ro neio ro nou gosioidiro-rumo. 13 Totorowa ohu to na-girarowea nou ro Iawe se gowea na-gotoi-ro totorowa ohu ato.

Taie nou ro ibo, ‘Mo Iawe ie. Mo oro aramunegere ro ta-wisioidirotiti mo ubi tanaro, Aisaki ibose to tisioidirotiti mo ubi tanaro. Oro edi moro ato na-worobu norou iedi duriomoro ro mo ro nou nama-omia-ri oro. 14 Mo ro ibose iedi duriomoro oro aramio merebusere iato ama-irowomidirotiti-ri atu se oro edio moro ato na-worobu norou. Oro aramio merebusere kioputi modobo pua imese sirio amadimo-oi-ri beda sosoro ra momoso, neio ro amadimo-orobodorai-ri moro moro, imese neio ro se ama-irowomidirotiti-ri. Taie sirio urubia patu neio aboudo korosa nato ama-orobodorai-ri. 15 Mo oro mutu e. Oro beda moro to ou, oro mo ro anama-owairiwado-ri, keba to mo ro nama-oroho-ri oro mo wapo rudo kou e. Oro anamadi-owameai-ri nedi duriomoro ro neito, oro mo ro emeserai-ri pua. Mo oro aboto beda owera naro, mo ro anama-isioidiro-ri iedi tanaro ro. Taie nou se ie.’

16-17 Iakobo nedi tau nato norou aboudo aise geribidiro-ro, tere ro gorobai. Nou ro ibo, ‘Morobise ie nedi moro ro nato Iawe tomidiro, mo umoro keba se oi pua. Nodi moro ro mo ro na-niauri aborabora se niauri. Nou morobise ia ie nedi moro ro nou Godi komidiro moto ie, ibose Adiri magere damo ie.’

18 Taie ata kowaroho nou na-gerebua nou eputa edi nadi to na-gorowasiai nou ro komidai mea mino to iato gowotobowa taie nou ro Godi aboto aiwai ri dehoro to iato gemaseduti ohu rudo.

19 Taie iedi moro ato na-gorobu, nou masiro Rusi. Iakobo ro ina dese orio masiro to giduti Betere, ibo owamo ‘Godi komidiro moto ie’.

20 Taie iato nou hodo a-gemakakaubiai-ro Godi aboudo, nou ro ibo, ‘Godi mo mutu nama-imidirotiti-ri, mo nou ro namadi-iaurititi-ri nedi kou ro nato, mo nou ro ohona namadi-omiotiti-ri kiroidiro namabu namadi-omiotiti-ri, mo nou ro mea se nama-owaboi-ri 21 ioudo namadi-owameai-ri mea se mo abera moto to, iato nou ubi tanaro anama-isioidirotiti-ri, 22 iato iedi nadi ro mo ro mea mino to na-nowotobowa nedi duriomoro nou anama-arapoi-ri Iawe nato namadime-emewabutiti-ri. Ina mo nou ro 10 namabu komio ato nou mo ro kaupoti kemowameai ie.’