1 Iakobo Betere rudo na-gaimai-ro nou a-gou-ro saiki boido idiawado-die, urubia torowomidiro iedi muso duriomoro iato nou neito gou-ro. Edi muso duriomoro ro neito na-gorowateai-ro 2 nou ro nato gowea ata obo bobo iato na-gomidiro-ro mea moro ato.

Taie nou na-giraroweauti nou ro a-giwia netewa didi sipisipi soirio peteibi iato girobu-ro obo bobo gomo ato, neio kimowotoi urubia ro a-giwou-rimo obo imio ri. Auna nadi obo bobo nou ro gemopaidiro. 3 Imese sirio sipisipi kimowotoi urubia atu se wirowarebaititi-mo nadi kowawodorowado obo bobo rudo taie sipisipi neio ro obo iato kimiaputi ie imese kimio ie, ina neio ro atu se nadi iato kowameai ie kowawodorowado obo bobo ohu to.

4 Taie Iakobo ro sipisipi kimowotoi urubia iato na-gorowomidiro neio aboto ibo, ‘Namuturubi, nio boido ra?’

Ina neio ro ibo, ‘Nimo Harani urubia ie.’

5 Taie nou ro ina iato gimodowa, ‘Nio umoro ra ata dubu na-wimidiro nato Rebeni? Nou Nahoro aramu e.’

Ina neio ro ibo, ‘Nimo umoro ie.’

6 Taie ina Iakobo ro ibo, ‘Nou bida buro ra modobo ato a-womidiro ra?’

Neio ro ibo, ‘Nou modobo ato omidiro. Ito dirarowea daio nou besere, Rasere, sipisipi tiwou-die.’

7 Taie Iakobo ro ibo neio aboto, ‘Dirowidiro-rimo. Saiki turi ie, duwo pua. Abora sipisipi obo dimio-mo ba-diwameai-mo sugamoso iho moro to.’

8 Ina neio ro ibo, ‘A! Nimo ro idaibo tanaro kisioidiro pua, nimo aise keremoto ie womu tato arua sipisipi kimowotoi urubia korowateai ato, nedi tau ro nato nimo ro atu se obo bobo rudo nadi nato kowagare rie kowawodorowado taie sipisipi obo atu se nato kimio ie.’

9 Nou ibo geremowauti iedi sipisipi kimowotoi urubia neio mutu, tuturu to pua iato Rasere ro gou-ro neito nou abera dubu iedi sipisipi neio mutu, neio nou ro imowotoititi. 10 Iato Iakobo ro na-gowea Rebeni besere nou sipisipi mutu, nou imese gou iedi obo bobo ro neito taie nou ro edi nadi ro na-gemopaidiro-ro kowatateai taie nou ro Rebeni iedi sipisipi sirio ro obo iato gimio. (Rebeni Rebeka medera ie ina Rebeka Iakobo mamu e.)

11-12 Iato tuturu to pua Iakobo imese gou-ro, iato gemowapotai Rasere, ‘Rebeka mo mamu e. Nou neido gou oro abera urubia aboudo neitiro atu se ibo ie.’ Nou ro kohiai iato gosomeai ina nou idobi iato gemerete.

Rasere ro na-girorowai iedi owera ro nou imese girario moto to, abera dubu iato gemowapotai. 13 Taie Rebeni ro na-girorowai nedi owera ro nou medera mere sapuwo to, nou imese girario-ro Iakobo owea ri. Nou ro na-gowea kotoi moro ato nato aise gohiai iato kosomeai taie neitiro atu se imese gidiai-rido moto to, iato Iakobo ro edi owera ro imese gorowauti nou beda sosoro gou-ro etou tanaro gororosioidiro-rimo. 14 Rebeni ro ibo, ‘Oro soro mo soro ie, oro mo mutu kaupoti karima ie.’ Taie.

Iakobo iato na-gomidiro kaupoti sogomi to 15 Rebeni ro a-gutura ibo nou ato, ‘Oro mo aruai boina na mere ie, modobo pua oro ro mo woko kemowati dorogora se wisa tato se. Oro etona ubi ro owamo mo ba-demowapotaidiro-ro.’

16 Rebeni ro netewa teibo besere teibo wiworohuti-ma. Keba besere Ria, saro besere Rasere. 17 Ria nou idomari kirarowo ubauba ie. Rasere nou imese sagaru ia ie 18 Iakobo ro na-iaurititi Rasere sagaru ia se wiroho nou auna ubi nou aboto giamo.

Ina Iakobo nou ri gutura Rebeni aboto ibo, ‘Mo ubi ie oro edi saro besere ro nou kedea aboto. Oro ubi nama-owamo-ri mo ro kedea aboto oro woko anama-emowatiti-ri 7 kisimisi to.’

19 Ina Rebeni ro ibo, ‘Modobo ie oro ro kedea nou. Ata dubu ata ro edea-ri pua. Oro nato ba-dimidirotiti mo abato.’

20 Taie Iakobo ro Rebeni woko 7 kisimisi to wemowatititi Rasere kedea sapuwo to. Iakobo ro na-imaragoidirotiti edi kisimisi sirio ro 7 saiki sosoro ie, samo to giporeai mabu nou auna ubi ie Rasere kedea aboto.

21 7 kisimisi na-giporeai Iakobo iato gutura Rebeni aboto, ‘Nodi tau ro nato mo orobo domia-ro abora mo ro anama-edea-ri. Mo ro hodo na-nasaubiai oro woko kemowati aboto 7 kisimisi ta-niporeai.’

22 Taie Rebeni ro auna soriomu iato gosioidiro, urubia sirio iato garadabuti-rimo edi soriomu ro nou aboto. 23 Saiki ta-goriodoi duwo na-gereredea Rebeni ro Rasere owosuruo pua, Ria gowosuruwo-ro ioudo Iakobo moto to, taie iedi duwo ro neitiro iato aise girobu-ma atu moro ato. 24 Rebeni ro ibose ta-gowosuruwo-ro nou ata sowake besere, masiro Siripa, Ria aboto iato gaiwai nou woko kemesioidiro sapuwo to.

25 Ata kowaroho ato Iakobo na-gerebua, nou a-godaudiro nato Ria se gowea. Iakobo masawemasawe imese gou Rebeni aboto, nou ro ibo, ‘Oro otou tanaro osioidiro-die mo aboto? Oro awawo woko ta-nemowatiti 7 kisimisi to mabu mo ubi owamotiti Rasere kedea aboto. Ina mo oro ro etou ri nasaubuti?’

26 Rebeni ro ibo, ‘Nimo duriomoro ato tanaro ibo iamo pua edina ro koroto ato saro rudo nou kedea ie keba se. 27 Nedi tau ro nato kararemo tanaro ba-doporeai 7 saiki to ama-owamo-ri, mabira orobo mutu ba-domidiro keba se, taie iato neama orobo oro aboto nato nama-iwai-ri, ina ibose 7 kisimisi to mo woko ba-demowatiti-ro!’

28 Rebeni beda owera garo Iakobo ro aise gosioidiro. Iato 7 saiki ta-giporeai kararemo tanaro ro giamo mabira orobo mutu gomidiro-rido. Taie Rebeni ro iato gaiwai nou ata besere Rasere Iakobo aboto. 29 Ibose nou sowake koroho besere Biriha ibose ti-gaiwai Rasere aboto nou woko kemesioidiro sapuwo to. 30 Iato Iakobo Rasere mutu imese girobu-ma iedi duwo ro nato. Nou auna ubi ie Rasere aboto, nou egea mere ubi ro iamotiti Ria aboto. Taie Iakobo imese gomidiro Rebeni woko iato emowatititi 7 kisimisi to. Taie.

31 Iakobo ubi auna se iamotiti pua Ria aboto, ina nou do ie Iawe ro Ria natonato gemati. Taie Iawe ro gabo nato gemosioidiro Ria nou merebusere kirotuti aboto kaupoti Rasere nou merebusere tato wimidirotiti.

32 Ata tau Ria nou niro iato gowea. Taie nou keba mere iato goroto. Nou ro ibo, ‘Iawe ro mo iedi mibo ro nou ro ta-gowea-die mo umoro ie ibo mo uramu ubi amadi-oi-ri mo aboto.’ Ria ro nou ri giduti masiro Rubeni to, ibo owamo Hiburu owera to ‘Mo iedi mibo ro nou ro ta-gowea-die’.

33 Iato tuturu to pua Ria ina niro gowea, taie nou ro ata mere iato goroto. Nou ro ibo, ‘Mo Iawe ro ta-nemerewidiro-ro mo giropu tato orobo ie ina mo noudo nomia-die nedi mere ro.’ Ria ro nou ri giduti masiro Simioni to, ibo owamo Hiburu owera to ‘Ta-nemerewidiro-ro’.

34 Iato tuturu to pua Ria ina niro gowea. Taie nou ro ina ata mere iato goroto. Nou ro iato gutura, ‘Abora mo umoro ie nedi tau ro nato mo uramu kimaragoidiro patu amadi-iwosiomai-ri mo aupiaupi to. Mo ro netewa didi dubu mere peteibi ta-niroto-ibi.’ Nou ro nou ri giduti masiro Riwai to, ibo owamo Hiburu owera to ‘Aupiaupi to’.

35 Iato tuturu to pua ina ata mere nou ro iato goroto. Nou ro ibo, ‘Abora mo ro Iawe anama-emowabutiti-ri.’ Nou ri giduti masiro Iuda to, ibo owamo Hiburu owera to ‘Kemowabuti’.

Taie nou iato mere kirotuti gabo rido aise garaubai.