1 Rasere ibose ta-geremasibai simara mere kirotuti gabo rido ta-garaubai, masawemasawe imidirotiti nou mabira orobo na-iaurititi. Nou ro ibo Iakobo aboto, ‘Mo teri gabo rido oro ro iedi mibo ro ba-demowagare-ro. Oro ro kosioidiro tato, mo anama-araburai-ri.’

2 Iakobo nou auna serawo ro gorobai, nou ro ibo, ‘Mo ro kosioidiro modobo ra idaibo sosoro tanaro? Godi ro gowagare oro mere kirotuti gabo rido.’

3 Taie Rasere iato gutura Iakobo aboto, ‘Mo sowake koroho orobo nou e Biriha oro nou mutu ba-dirobuti-ma. Nou ro beda merebusere irotuti io mo do ie. Taie mo merebusere ioudo nama-iwia-ri mo neio nama-iwoubua-ri.’

4 Taie nou ro Biriha sowake koroho orobo iato gaiwai Iakobo aboto, ina neitiro iato irobutiti-ma, 5 taie niro iato gowea. Iedi sowake koroho besere ro nou ro a-gemowahau Iakobo dubu mere. 6 Taie Rasere iato gutura, ‘Godi ta-garo ibo, “Mo ata ubauba tato ie”. Godi ro mo iedi kararatoro owera ro ta-girowidiro, mo mere ta-nomia-die.’ Nou ri giduti masiro Dani to, ibo owamo Hiburu owera to ‘Godi umoro ie mo ata ubauba tato ie’.

7 Biriha ina niro iato gowea, nou ro ata mere iato goroto. 8 Rasere ro ibo, ‘Neitiro auna se nerematuti-do mo mabira orobo mutu, abora mo keba to imese neresia.’ Nou ri giduti masiro Napatari to, ibo owamo Hiburu owera to ‘Nerematuti-do’.

9 Ria nou na-geremasibai nou modobo pua mere kirotuti aboto sowake koroho orobo Siripa ibose nou ro iato gaiwai Iakobo aboto. Neitiro ibo irobuti-ma, 10 iato tuturu to pua Siripa niro ie, nou ro dubu mere goroto. 11 Ria ro ibo, ‘Imona.’ Nou ro nou ri giduti masiro Gadi to, ibo owamo Hiburu owera to ‘Imona’.

12 Taie Siripa ata dubu mere ina iato goroto. 13 Ria ro iato gutura ibo, ‘Mo auna kamade ie, mo mamio sirio ro amadima-asoro-ri kamade to.’ Nou ri giduti masiro Asere to, ibo owamo Hiburu owera to ‘Kamade’.

14 Iedi tau ro nato urubia pari namabu kidabuti tau ro gowamo. Rubeni imese gamedei tumu to iato arua petoko sosoro menedereki iopu iato giwia taie imese giwosuruwo-ro nou mamu Ria aboto. (Urubia ro a-wimaragoidirotiti-mo menedereki iopu kiho ato mamio mere gabo ato ina aise kotobowa ie.)

Taie iedi tau ro nato Rasere ro iato gutura Ria aboto, ‘Modobo ra mo komia aboto oro mere edi menedereki ro?’

15 Ina Ria ro ibo gemowameai, ‘Mo uramu oro ro ta-nowasiri ina oro ubi ra mo mere menedereki oro ro owasiri-ri?’

Ina Rasere ro ibo, ‘Mo oro ro namadi-omia-ri oro mere edi menedereki ro, oro mutu ama-irobu-mari Iakobo nedi duwo ro nato.’

16 Iato adimo duwoduwo ro na-goi-ro Iakobo na-gohau-ro tumu rido ina iedi tau ro nato Ria imese gou Iakobo owea ri ina nou ro ibo Iakobo ato, ‘Oro mutu anama-irobu-mari nedi duwo ro nato mabu oro sapuwo to mo mere edi menedereki ro wisa ta-niaiwai Rasere aboto.’

Taie iedi duwo ro nato Ria Iakobo mutu aise girobu-ma, 17 ina Godi ro nou kararatoro owera aise gemowameai-ro. Tuturu to pua Ria niro na-gowea, nou ro ata dubu mere iato goroto. 18 Nou ro iato gutura, ‘Mo nedi mere ro Godi ro nomia-die mabu mo ro wisa ta-naiwai nou sapuwo to. Mo ro keba se ta-naiwai mo iedi sowake koroho besere ro mo uramu aboto.’ Nou ri giduti masiro Isaka to, ibo owamo Hiburu owera to ‘Wisa ta-naiwai’.

19 Ina iato Ria niro ro owea-die, nou ata dubu mere goroto. 20 Nou ro iedi mere ro na-goroto, nou ro ibo, ‘Godi ro ina ta-nomia-ro mo ata mea mere, nou ro nirimagare mutu gaiwai-ro wisa tato se. Mo uramu ro masiro ohu to ama-owoubua-ri mabu mo ro 6 dubu mere ta-nirotuti nou sapuwo to.’ Nou ri giduti masiro Seburuni to, ibo owamo Hiburu owera to ‘Masiro ohu to kowoubua’.

21 Ina besere iato goroto Ria ro, masiro a-giduti Daina.

22 Taie Godi ro Rasere woki emati pua ta-gemaragoidiro-ro ibose ina nou kararatoro owera ta-gemewidiro-ro. Nou ro gabo ta-gemodobura-ro nou merebusere kirotuti sapuwo to 23-24 iato nou niro na-gowea nou ro dubu mere goroto. Taie nou ro iato gutura, ‘Keba se siripo mutu nimidirotiti, abora Godi ro siripo ta-nemowatateai-ro. Mo modobo ie Iawe ro ata mere komia aboto.’ Nou ri giduti masiro Iosepa to, ibo owamo Hiburu owera to ‘Ata komia ie’. Taie.

25 Iosepa na-goroto Rasere ro, Iakobo iato gutura nou nogeredubu Rebeni aboto, ‘Mo abora oro ro demapoi-ro, modobo ie mo simara duriomoro to korowameai. 26 Mo upi merebusere oro ro diapoi-ro anama-iwou-ri, oro wisa woko ta-nemowatititi, oro ro imowairiai ate, aise demapoi-ro! Oro umoro ie, oro ta-nowarebaititi mea se.’

27 Taie Rebeni ro iato gutura, ‘Mo oro ro kamade na-nowaititi-ro oro modobo ie komidiro mo abato. Mo umoro ta-noi mo Iawe ro korosa ta-nomiotiti-ro mabu oro mo mutu imidirotiti. 28 Mo abora demowapotai-ro oro mo ro etou wisa nama-omia-ri? Oro namadi-utura-ri mo ro anama-iwai-ri oro aboto.’

29 Iakobo ro iato gutura Rebeni aboto, ‘Oro umoro tiamotiti oro awawo woko ta-nemisioidirotiti mo ro. 30 Abora oro sipisipi sirio ia ie nanigosi sirio ia ie. Taie oro mo ro ta-nemeaurititi, mo iedi tau ato na-norowateai-ro oro sipu tato worohotiti-mo, abora nedi tau ro kainai mere sirio pua oro sipisipi nanigosi. Mo ro beda tanaro nisioidiro oro sapuwo to, Iawe ro korosa ta-gaiwai oro aboto. Ina abora nedi tau ro nato mo simara upi merebusere sapuwo to mo etou tanaro nama-osioidiro-ri? Mo ro beda sosoro nama-iwarebai-ri neio?’

31 Rebeni ro iato garatoro, ‘Ina etou nama-omio-ri oro?’

Iakobo ro iato gemowameai, ‘Mo ata nakomu ubi tato ie oro ro komia, nedi tanaro kaupoti ro oro ro nama-osioidiro-ri, mo anamadi-orowameai-ri oro sipisipi nanigosi anama-emeauri-ri. 32 Abora mo ro sipisipi nanigosi anama-ieributi-ri garegare nanigosi imese sirio se, oro do ie, keakea sipisipi sirio se, oro do ie, dawade sipisipi kainakaina tititi se, sipu tato, mo do ie, tititi nanigosi sipu tato, mo do ie. Ibose sipisipi sipu tato dawade mo do ie kainakaina garegare se. Io mo wisa nou se ie. 33 Oro namadi-orohotiti-ri mo sipisipi nanigosi nama-iraturio-ri, oro ro ata nanigosi titi tato nama-owea-ri, sipisipi garegare tato nama-owea-ri, oro umoro ba-doi mo ro a-niwopirua-ro. Oro umoro nato ama-ai-ri ibo mo morobise ra o bagea ra.’

34 Taie Rebeni ubi aise goi. Nou ro iato gemowameai, ‘Modobo ie ibose ba-mororosioidiro oro ubi tanaro.’

35-36 Iakobo iedi sipisipi nanigosi ro na-girapoi, Rebeni ro aise giwadau nou aboudo ata muso moro to. Nou mere peteibi ta-gimowapotai-ibi neibi ro iato imowotoi ri. Iedi sipisipi sirio nanigosi sirio na-geremeserai-rimo Iakobo ro gimowotoi.

37 Taie Iakobo ro ota atemo imese giasio-ro, iato takamai sapusapuwo se giamotuti, turi ato takamai mutu aise gimesere. 38 Iedi takamai kiamutiti ota ro nou ro aise giwotoburio obo kidio moro ato. Nanigosi obo idio ri na-gou-rimo, 39 ota atemo tititi sosoro gabo ato neio iato gororohi-rimo. Taie iato tititi nanigosi se girotuti-rimo. Iato neio na-girotuti-rimo nou ro imese gihodowa ata sapuwo to.

40 Sipisipi obo idio ri na-gou-rimo, garegare nanigosi nou ro aise giwosioidiro neio sosoro gabo to, iato gororohi-rimo. Taie iato garegare titi mutu sipisipi nou girotuti-rimo. Iato neio na-girotuti-rimo nou ro imese gihodowa ata sapuwo to.

41 Gamogamo nanigosi teibo na-gidororohiai-ri Iakobo ro tititi ota atemo kowosuwo ie neitiro sosoro gabo to. 42 Ina tokatoka nanigosi teibo neitiro na-gidorohiai-ri Iakobo ro tititi ota atemo iaremo-ri pua. Gamogamo tititi mutu kirotuti ato Iakobo do ie, tokatoka tititi tato kirotuti ato, Rebeni do ie.

43 Iakobo idaibo sosoro ibo goi auna. Nou abato sirio sipisipi nanigosi kemoro doniki sowake urubia upi dubu neio giworohuti.