1 Keremaro, karado nedi tanaro teibo ro nio ro na-isioidirotiti-madumo neitiro boido ororomadetiti-dioudo? Nio ubauba ubi na-iamotiti boso ioudo iratamudirotiti-dumo, a? Iedi ubauba ubi ro na-iamotiti nio niro turi ato, boso neio ro iworohotiti-dumo. 2 Nio ubi mutu e, kaupoti nio abato iamo pua, ina noudo ie nio ro arua urubia kiopiauti. Nio ibose auna ubi ie arua urubia nakomu kimade, kaupoti nio ro kimade modobo pua. Ina noudo ie nio keremaro karado. Etou mabu rido ra nio ro iauri tato? Mabu nio Godi aboto kararatoro pua. 3 Nio Godi aboto namabu ri kararatoro ato, nio ubi ie nio simara na to kiasoro. Nio ro Godi ubauba kimaragoidiro mutu kararatoro ie, nou rie nio kararatoro owera kimade tato.

4 Arua mamio ro uramio mau beda sosoro kisebo ra, nio idaibo sosoro urubia ie Godi sapuwo to! Nio umoro ra sopu duriomoro tanaro mutu kidabuti ato, idaibo sosoro ie Godi nio ro ohoiotiti-dumo. Nio etio ra sopu duriomoro tanaro mutu na-idabutiti-dumo, nio Godi ro nasa urubia to imese iasouti. 5 Ina Tarena Buka ato edi owera ro owamotiti kowamo kawa a-owamotiti ra, ibo Tarena Urio Godi ro na-gapoi-ro nimo niro turi ato omidiro ri, nou auna ia ubi ro owamotiti ibo nimo ro Godi ubi tanaro se kisioidiro.

6 Kaupoti Godi edi wisa tato nirimagare ro auna ia se owamotiti nimo abato. Ina Tarena Buka ato owera nou mabu ato gowapotai-ro ibo, Godi ro keremowabu urubia gabo imoputi-die, kaupoti nou ro keremowabu tato urubia aboto wisa tato nirimagare auna ia se iaiwotiti-die.

7 Ina noudo ie nio durupi momuo se diaiwai-mo Godi aboto. Satani demotobowa-mo ina nou nio aboudo hio to ama-odau-ri. 8 Godi aboto aise dosiomai-rimo, ina nou nio aboto amadi-osiomai-ri. Nio imese ubauba tanaro kisioidiro urubia ie, ina noudo ie nio etio ra ubauba aise na-isioidiro-dumo, tu marea aise diwiouti-mo, ubauba to ina orowame mamo. Nio etio ra kimaragoidiro teibo mutu na-orowomidiro Godi kowasoro aboto ina ibose sopu duriomoro ubi tanaro na-ibodoro-dumo, nio giropu marea tato diwai-mo. 9 Nio pape urubia sosoro ba-dorowomidiro, idobi auna se ba-deremerete-mo. Nio etio ra kamade mutu duriomoro ubi tanaro na-isioidiro-dumo, idaibo korowomidiro keremiro aise dimeserai-mo. Gaga kirorouti idobi to diapoi-mo. Kamadekamade tanaro dimeserai-mo, nitonito se dorowomidiro. 10 Nio modobo ie nakara se sopu to korowororuwoidiro Abera Naramu sosoro gabo ato, ina nio nou ro ohu to nato ama-iwioidiro-ri.

11 Niramio, arua kimibiria borubi ubauba iwaititi mamo, iasoro mamo ibo, ‘Neio ro ubauba tanaro gisioidiro-rimo.’ Ibose oro ro ata kimibiria neama odoromai mamo ubauba tanaro kosioidiro sapuwo to. Oro ro idaibo tanaro na-osioidiro, Godi edi sabi patu ro oro ro ubauba to iasoro, ibose Godi edi sabi patu ro neio koto kiauri dubu to oro ia ro ararapoi rie. Oro ro Godi edi sabi patu ro na-imeiouti, oro ro ibose nakara se tisebo. Ina sabi patu koto kiauri dubu to oro ro ararapoi rie. 12 Nedi duriomoro gebari ro nato, Godi nakara se nou se ie sabi nou ro giaiwai-ro ibose nu koto kiauri dubu kaupoti nou se ie. Nou abato se pupuwo towamo nimo iapopo ri, ibose nimo ubauba iwai ri. Ina oro ro kimibiria neama aboto ibo na-utura, ‘Oro ro ubauba ta-wosioidiro,’ oro etu ra.

13 Namabu keremahudirio urubia, abora owera neito ma-dirowidiro-rimo! Nio ibo etio ro iaro-dumo, ‘Abora adimo o ata saiki iedi moro ro ito anamadimo-ou-ri, kaupoti kisimisi to anama-orowomidiro-ri iato, namabu mani to iato anamadimo-orowamade-ri mani anamadimi-idabuti-ri.’

14 Mea se! Nio umoro pua ata kowaroho ato beda tanaro ra nio aboto namadimo-ororosioidiro-ri. Nio edi keremiro ro kowaroho gebobo sosoro ie, papamo egea mere se kiamo ie, saiki kimewia ato aise koroporeai ie. 15 Nio ibo karo modobo ie, ‘Abera Naramu ubi ato, nimo anama-irowomidiro-ri, ina nedi tanaro ro nimo ro nou namadimi-isioidiro-ri.’

16 Kaupoti idaibo kimaragoidiro nio ro abora nou iworohuti pua, nio keremiro sapuwo to eremowabu-dumo, ina keremowabu imese ubauba ia tanaro ie.

17 Ina noudo ie nio etio ra umoro na-iamo meamea tanaro kisioidiro sapuwo to, kaupoti kisioidiro tato, nio ro Godi sabi isebo-dumo.