1 Ina namabu sirio urubia, nio ata owera neito ma-dirowidiro-rimo! Idobi auna se deremerete-mo, mabu nio aboto auna ubauba tau tou-die, nio ro amadimo-owea-ri. 2 Nio edi namabu sirio ro neio ipusiti-dumo. Ibose nio edi meamea kiroidiro namabu sirio ro kipiri ro itotoutiti-dumo. 3 Nio edi sosopeni sirio ro barugu sirio arua namabu mutu, neio esepaesepa ro irobowado. Godi edi koto saiki ro nato, iedi esepa ro na-iamo nio neio ro paease amadimi-iwapotaidiro-ri ibo nio ubauba tanaro urubia ie. Ina nio edi namabu esepa ro era beda sosoro ra nio durupi neio ro amadimi-ihotiti-ri. Nio umoro a-iamo ra ibo nedi sopu duriomoro ro womu tau emou-die, ina nio meamea namabu inaina aise eremowoiriamuti-dumo? 4 Ma-dowea-mo! Nio pari namabu edi woko urubia ro imadabutiti-dumo, neio edi woko mani ro nio ro imowopiro-dumo. Mani abora Godi aboto tiaiauti-dioumo. Mabu neio edi woko mani ro nio ro imowopiro-dumo. Nedi woko urubia ro, abora imese pupuwo ia Abera Naramu Godi nou ro iamo timewidirotiti-die.

5 Nio keremiro mea se giwaboi-rimo nedi duriomoro ro nato ubi nakomu nio abato modobomodobo ato giamo nio ro mea tau giauri-rimo. Nio mea se ta-giamidimai simara durupi ubi tanaro na-gisioidiro-rimo. Nio nakara se kiwoubua nakomu sosoro ie awawo ta-gorowai-rimo, Godi ro tiwaguwo-die kiopiauti aboto. 6 Nio mea tuputupu urubia ro imotoburio pua, nio ro mabu tato moro ato bagea koto aboto aise iworohotiti-mo iato kiopiauti ie.

7 Ina noudo ie niramio, deremasebidiro-mo, serawo samo to oi mamo, koko se dorowotoi, womu tato Abera Naramu namadi-orowameai-ri. Ina pari kisioidiro urubia nio ro ma-diauri-mo, neio beda mino to iremasebidirotiti-dumo pari ohona mea se kisuwoduti aboto. Ina ibose surama daroho na-emasebidirotiti-dumo pari nou ro mea mino to kimaudurai aboto, neio masawe samo to oi ri pua. Ina gawia saiki nato na-otobowa, iopu mea mino to kisuwoduti ie. 8 Kimibiria urubia nio ibose masawe samo to oititi mamo, koko se ba-dorowotoi, mabu Abera Naramu korowameai tau aupise ie.

9 Niramio, kimibiria naminiramio sapuwo to mouro owera aro mamo, nio etio ra idaibo tanaro namadimi-isioidiro-ri, mea se, nio Godi ro koto aboto ama-iwou-ri. Koto kiauri dubu aupise ie amadi-orowameai-ri.

10 Niramio, Godi ipusu owera urubia neio ba-dimaragoidiro-mo. Neio ro Abera Naramu ipusu owera na-gimowauti-rimo, temeteme urubia aboudo ta-giauri-rimo, kaupoti neio masawe hio to oititi pua, koko se ta-gorowotoi. Neio ba-dimatiouti-mo. 11 Nio umoro ie nedi urubia ro koko se na-gorowotoi neio nimo ro ti-nimaragoidiro-dumo neio ro meana Godi aboudo ta-giwia-rimo.

Nio ro keba se umoro ta-goi-rimo Iobu totomu, nou sirio mibo na-iaurititi koko se beda sosoro gotoi. Nou edi mibo tanaro sirio ro na-goroporeai-rimo, Abera Naramu ro meamea tanaro nou aboto nato gisioidiro. Mabu Abera Naramu imese auna nirimagare dubu e urubia aboto.

12 Mo niramio, nedi owera ro na-naro, auna ia owera nou e. Simara hodo kasaubiai owera koko kiwaititi sapuwo to, modobo ia pua Adiri sabowa masiro kapoi, o sopu goto masiro kapoi, ibose ata masiro kapoi, sabi ie. Nio ‘Io’ owera na-emaragoidiro-dumo, ‘Io’ se dutura-mo. ‘E e’ owera na-emaragoidiro-dumo, ‘E e’ se dutura-mo. Nio ro morobise to gidimu-utura-ri nato aise gidimi-isioidiro-ri. Nio idaibo tanaro kisioidiro tato, nio ro ubauba wisa amadimi-imade-ri.

13 Nio abato a-womidiro ra ata dubu ata mibo maumo ato? Nu modobo ie Godi aboto kararatoro. Ina nio abato a-womidiro ra ata dubu ata kamade mutu? Nedi dubu ro modobo ie Godi kamade ohare to kemaboduti.

14 Ina ibose nio abato ata dubu ata a-womidiro ra temeteme mutu? Nedi dubu ro modobo ie Iesu urubia kiwaboi urubia neio kirumai. Taie neibi ata ro temeteme sapuwo to nato kararatoro ie, Abera Naramu edi pupuwo ro neito mea isi eputa to na-emasia, 15 taie morobise kimibiria mutu kararatoro ato, temeteme dubu meana aise koi ie, nou Abera Naramu ro aise kowotobowa ie imese koroho ie. Ina temeteme dubu ro beda ubauba gisioidiro keba se Godi ro kimatopeamuti ie.

16 Ina noudo ie keba se nio simara ubauba kimibiria naminiramio aboto kiwapotaidiro modobo ie, ibose Godi ba-dararatoro-mo neio sapuwo to, nio meana kiwai aboto.

Ina ma-dowea-mo, mea tuputupu dubu nu edi kararatoro owera ro imese pupuwo ia ie, nou ro beda sapuwo to kararatoro ra, tanaro morobise to aise kororosioidiro ie.

17 Eraia urubia dubu e nimo beda sosoro ra, kaupoti nou abato idaibo tanaro ta-gororosioidiro. Nou edi kararatoro owera ro pupuwo mutu garo Godi aboto, daroho kou tato sapuwo to. Ina nou rie Isiraere duriomoro ato daroho iarotiti pua, 3 kisimisi 6 sogomi daroho tato irowomidirotiti. 18 Eraia ina Godi aboto iato gararatoro daroho emeiriai ri, taie Godi ro daroho aise gemeiriai-ro, imese pari namabu daroho ro na-gimaudurai, imese meana ia se gisuwoduti-rimo.

19 Mo niramio, etu umoro ra nio abato ata dubu ata na-wararaseperai Godi edi morobise gabo ro nou aboudo, nio ata ro nou kowameai modobo ie. 20 Nedi kowarebai dubu ro umoro ba-moi ibo, nedi gabo kiaseperai dubu ro nou Godi edi gabo ro neito etu ro kowameai ra, nu nou ro pamo aboudo kapopo ie. Ibose nedi dubu ro beda ubauba tanaro sirio na-isioidirotiti, Godi ro imese aise kimatopeamuti ie.