1 Iesu nou kowasoro rubi mutu na-giabu-rimo Gerasa urubia iato gorowomidiro obo paruo sapuwo ato, 2 neio na-gorowateai-rimo Iesu nou keba se gerepeduai pe rido. Nou edi tau ato na-gerepeduai ata dubu pamo rubi edi na moro ato na-irobuti ioudo gosuruo-ro, 3-4 nou iato imidirotiti sirio tau to. Nedi dubu ro ibo pua nakara se koroho nou ubauba urio sirio ro woworohuti-mo. Urubia ro nagi-irimohiai-ri egea se gi-irimemotohiti-ri seni to nou ro aise gi-asiouti-ri idaibo tanaro nou isioidirotiti. Ina neio ro modobo pua nou ina kemotohiti aboto. 5 Nou dorogora se irohotiti podo gawagogo ato pamo rubi bobo abato iamo mutu susura nadi nou durupi neito irototoutititi.

6 Iesu muso ato gou-ro iedi dubu nou ro iato gowea taie nou aise girario-ro Iesu aboto kauhio to kirimusubua 7-8 taie Iesu ro nato gutura nou aboto, ‘Oro edi ubauba urio ro na-womidiro iato oro dosuruwo-ro edi dubu nou aboudo!’

Nedi dubu ro auna ia iamo owera nou gutura, nou ro ibo, ‘Godi ohu ato na-omidiro-die Iesu oro nou mere ie! Oro etou tanaro amadi-osioidiro-ri mo aboto? Oro Godi masiro dapoi iato ba-deremowotouti mo oro ro ubauba owai-ri pua!’

9 Ina Iesu ro ibo, ‘Oro masiro etu ra?’

‘Sirio ie. Mabu mo kaupoti pua, nimo sirio ie.’

10 Nedi dubu ro ina ina Iesu aise gemediawado, ‘Nimo imeriai ate nedi duriomoro ro neido!’

11 Taie edi duriomoro nato podo gawagogo ato giro sirio ohona iato geremosora-rimo. 12 Edi ubauba urio sirio ro neio ro ibo, ‘Nimo ito dimeriai-ro edi giro sirio ro neio aboto iato nama-irowomidiro-ri.’

13 Taie Iesu ro na-girowai neio beda owera garo-rimo nou aise garadodorai.

Edi ubauba urio sirio ro neido na-gou-rimo edi dubu ro aise gemeserai-rimo, giro niro turi to aise gorowateauti-rimo, taie edi giro sirio ro neio iato kawakawa ro aise girobai, neio podo gawagogo rido atu se gorowodori-rimo obo to iato neio obo ro aise giopia.

14 Giro kimowotoi urubia ta-gorowotoi kaupoti neio a-gorowadau awawo sabowa to taie urubia neio ro iato gimowauti-rimo etou tanaro gororosioidiro-rimo giro sapuwo to. Taie urubia ro na-girorowai-rimo edi owera ro neio imese goroho-rimo simara idomari to iauri ri. 15 Ina edi dubu ro ubauba urio sirio na-gemeserai-rimo urubia sirio ro giauri-rimo nedi dubu ro nou a-gomidiro Iesu abato nou obotama ta-giroiti nou mea se gomidiro. Urubia ibose neio tere ro giwati.

16 Ina Iesu iedi tanaro ro na-gisioidiro arua urubia ta-gorowomidiro iato neio ro ta-giauri-rimo. Taie iedi urubia ro neio ro arua urubia iato gimowauti-rimo iedi tanaro na-gororosioidiro-rimo iedi dubu ro nou sapuwo to ina ibose giro sapuwo to.

17 Taie urubia ro Iesu iato gemowapotai-rimo, ‘Oro modobo ie nimo edi duriomoro ro kemeserai aboto.’

18 Iesu ro na-girowai edi owera ro nou pe to gorora iato nedi dubu ro ubauba urio sirio ro na-gemeserai-rimo nou ro girario-ro nou aboto. Nou ubi ie aradabuai ri nou mutu ou ri. 19 Kaupoti Iesu ro a-gutura ibo, ‘Oro ba-dorowameai simara urubia aboto, oro ro ba-dimowauti Abera Naramu ro beda tanaro osioidiro oro aboto ibose nou ro nirimagare ta-waiwai oro aboto.’ Iedi owera nou mutu gemeiriai edi dubu ro.

20 Taie edi dubu ro iato aise goroho 10 sabowa to atu moro ato na-giamo, urubia sirio nou ro iato gimowauti Iesu ro beda tanaro gosioidiro nou sapuwo to. Taie urubia ro na-girowidiro-rimo nedi owera ro neio imese auna ia kimaragoidiro ro giopia.

21 Iesu obo paruo sapuwo rido na-gorowameai-ro edi tau ato na-gorowateai-ro obo paruo bara to, nou auna ia topira ro nato gemosopa-rimo, nou gomo ato urubia se gorowotoi. 22 Taie edi tau ro nato Iu urubia karadabu moto kiauri dubu masiro Iairo imese gou-ro iedi moro ro neito. Iairo ro Iesu na-gowea nou aise girosiriti nou sairo mabu ato taie 23 nou ro Iesu iato gemagege ou ri nou besere meana owai ri. Nou ro inaina aise garowado ibo, ‘Mo besere buro aupise karaburai, nou auna besere ie, 12 kisimisi ie. Oro modobo ie hio to kou meana owai ri. Oro ro ba-dowasomai mo ubi ie nou temeteme ro kemeserai.’

24 Iesu ro edi owera na-girowai taie nou imese gou Iairo mutu, urubia sirio ro ibose to gorobodoro-rimo saro rido. Iedi urubia sirio ro imese dubu patu ia ie, neio sapuwo to a-gororohoiouti-rimo Iesu gomo ato. 25 Nedi dubu patu maumo ro nato ata temeteme orobo ta-garadabuai nou durupi rido auna ia karima ro wororuwotiti 12 kisimisi to. Nou auna ia temeteme ro owatititi. 26 Nou dokota sirio neio ro meana kowai sapuwo to ta-wisioidirotiti-mo woko nou durupi ato, kaupoti modobo pua neio ro meana kowai, ibose auna ia mani wiheretiti temeteme wisa sapuwo to na-iaiwotiti womu tato mani ti-giporeai. Kaupoti nou meana owai pua neio ro odio temeteme ro nou durupi ato auna aise goi.

27-28 Iedi orobo ro nou ro na-girowai ibo Iesu ro temeteme urubia meana tiwaititi, taie nou neio dubu patu maumo to aise godoro atu se imese gou-rimo Iairo edi moto ro neito. Kaupoti edi orobo ro neido na-gou nou kimaragoidiro to ibo, ‘Mo ro Iesu obotama nama-owasomai-ri mo umoro ie mo karima kororuwo ama-eremasiai-ri.’ Iedi orobo ro neido na-gou nou ro nato gowasomai Iesu edi obotama ro 29 nou iato a-geremasibai ibo, ‘Karima mo aboudo ta-waradibiai.’

30 Iedi tau ato meana na-goi Iesu nou ibose ta-geremasibai nou pupuwo korosa na-gosuruwo-ro nou aboudo taie nou iato aise gotobowa na-giraroweauti urubia iato gimodowa, ‘Mo beda mere ro nowasomai-die?’

31 Ina nou kowasoro urubia ro ibo, ‘Urubia sirio ia ie aise ororohoiouti-dumo. Nimo etou ri nimodowa-die?’

32 Iesu inaina aise giraroweauti urubia na-giauri nou ubi ie umoro koi etu ro owasomai. 33 Iedi orobo ro gowasomai nou umoro ta-goi beda tanaro gororosioidiro nou abato. Taie nou komuguguro komuguguro gou-ro, Iesu sairo mabu ato iato aise gorodiriti, taie Iesu nou ro owera iato gemowauti beda sosoro tanaro gororosioidiro nou abato.

34 Ina Iesu ro ibo iedi orobo ro nou aboto, ‘Nirimagare oro abora meana ta-woi mabu oro kimibiria auna ie, oro mea kamade maumo ato ama-omidiro-ri sabowa ato.’

35 Iesu ro iedi owera ro nou garo iedi orobo nou aboto iato Iairo moto rido arua dubu na-gorowarario-rimo Iairo aboto. Neio ro iato gutura-rimo, ‘Iairo oro besere buro eremiro pua, pamo ie. Iedi kitamudiro dubu ro oro ro aise owou ate, mabu oro ro nama-owou-ri nou ama-orowagumaidiro-ri, momidiro nou.’

36 Kaupoti Iesu ro na-girowai edi dubu peteibi ro beda owera garo-birimo nou ro imaragoidiro pua neibi owera. Taie nou iato gutura Iairo aboto ‘Oro tere na ie kimibiria kaupoti se doworohuti.’

37 Taie Iesu ro iato giaubai-bi Pita ie, naramu ra neama ra Iemisi ra Ioane ra Iairo ia mutu ou ri nou moto to. 38 Neibi moto goro to na-godoro-birimo urubia sirio se giwia-birimo neio idobi diamo ro garo.

39 Taie Iesu ro ibo, ‘Nio etou na mabu ato iroto-dumo idobi auna diamo na-isioidiro-dumo? Iedi besere ro pamo pua nou norou orobu.’

40 Ina edi urubia na-gorowotoi neio ro gaga to gemasio-rimo.

Iesu ro ibo, ‘Nio na-orowomidiro nedi moto ro nato abora demeserai-rimo dosuruwo-mo!’

Taie iedi urubia ro na-gosuruwo-rimo Iesu iato godoro iedi pamo besere bato gorobu, taie nou ro ibo, ‘Pita, Iemisi, Ioane nibi dou-birimo nou mamu ra abera ra mutu nibi nakara se dodoro-birimo.’

Taie neibi na-godoro-birimo besere bato gorobu 41 Iesu ro nou tu rido iato gorobai, nou ro ibo iedi besere ro nou aboto ‘Tarita kouma!’ (Ibo owamo ‘Besere kainai deribua-ro!’)

42 Taie iedi tau ato Iesu owera na-geremasiai iedi besere ro aise geribua-ro taie imese goroho iedi ibi gugu ro nato. Taie iedi na peteibi ro Pita, Iemisi, Ioane, Iairo orobo mutu neibi iato kimaragoidiro ro giopia-ibi.

43 Iesu iato gerewesegerai neibi aboto neibi koko owera iato gimia-ibi, ‘Nedi owera ro nibi ro orowauti ate ba-dorobidiro-bimo nakara se. Mamu ra abera ra nitiro besere kainai ohona domia-do.’