1 Taie Iesu Iairo sabowa rido na-gou-ro simara sabowa to imese gorowameai. Nou nakara se ou pua iedi tau ro nato nou simara kowasoro rubi mutu gou. 2 Neio edi tau ato na-gorowateai-rimo iato komidiro saiki ro nato giwia Iesu iato gitamudiro neio edi karadabu moto ro nato. Urubia sirio ro nou owera na-gemewidiro-rimo neio kimaragoidiro ro giopia nou kitamudiro owera mino beda sosoro ra. Neio ro ibo, ‘Iedi dubu ro nou idaibo sosoro korosa kitamudiro boido gowai? Nou muro boido gowai? Nou pupuwo korosa tanaro kisioidiro boido gowai? 3 Nou beda gebari pere ra, moto keremari woko isioidirotiti. Nou Maria ro goroto ina nou niramio ie Iemisi Iosepa Iudasi daro Saimoni, ibose nou medamio mutu e torowomidiro nato.’

Iedi urubia ro neio ro nou emaidodorowadotiti pua nou neio ro aise ohoiotiti-mo.

4 Taie Iesu nato gutura ibo ‘Godi ipusu owera dubu nou arua moro to koroho ato iato neio ro nou mea se koworohuti ie, kaupoti nou simara moro to korowameai ato neio ro mea se oworohuti-ri pua.’

5 Ina Iesu simara sabowa ato awawo korosa tanaro isioidirotiti pua, modobo pua nou ro iato kisioidiro. Nou ro sipu tato temeteme urubia nou ro meana neio giwai. 6 Iedi urubia ro kimibiria tato na-giauri nou kimaragoidiro ro gopia.

Taie nou imese gou arua sabowa to nou ro urubia iato gitamudiro. 7-8 Iedi tau ro nato nou 12 kowasoro urubia neio mutu atu se goroho-rimo. Taie nou ro ubauba urio kimabodoidiro urubia aboudo pupuwo korosa owera iato gimia, ‘Nio mo ro anama-itioduti-ri netewa netewa se duriomoro gabogabo to. Nio kou ato ata nakomu ata iwou ate nio ibose ba-doroho-mo tu kawakawa. Nio gonopu se ba-dirobidiro-mo, dokou, mani, keta popo iwou ate, 9 tamaka ba-diroiti-mo, nio ro beda obotama iroidiro-dumo nou mutu se ba-dou-mo senisi namabu iwou ate. 10 Ata sabowa to korowateai ato beda moto rido imaidodorai-diomo nio iato se gi-orowomidiro-ri iedi moto ro nato. Modobo pua iedi moto ro nio ro kemeserai ina ata moto to kerepeduai ohona iosora ri, modobo ie iedi moto kaupoti ro nio nato se korowomidiro. 11 Ina nio ata sabowa rido na-ibeiouti-diomo kiramairiai tato, ibose nio owera aboto gare iedea tato iedi urubia ro neio ro, iedi sabowa ro nio ro aise gidime-emeserai-ri. Iedi sabowa ro nio ro kemeserai ato sairo panese aise gidi-imahuditi-ri neio umoro koi sapuwo to ibo neio abato towamo ubauba.’

12 Taie nou kowasoro urubia iato imese gororoburutai-rimo duriomoro gabogabo iedi mea owera ro nou obodorouti ri. Taie beda moro to goroho-rimo neio ro iato gimowauti-rimo ‘Ubauba rido ba-derewesegerai-mo Godi aboto.’

13 Ibose nou edi kowasoro urubia ro neio iedi pupuwo korosa mutu na-gitiodorai neio ro ubauba urio urubia bato na-gorowomidiro aise gimabodoidiro-rimo. Neio ro ibose kimibiria mutu mea isi to temeteme urubia neito gimaseduti-rimo taie temeteme neio aboudo aise goroporewado-rimo.

14-29 Herodi nou eputa dubu e iato imidirotiti Gariri duriomoro nou ro iaurititi. Herodi Piripi naramu e, ata orobo masiro Herodiasi nou keba se Piripi ro gedea ina nou simara naramu ro gowasiri. Taie obo to kiwarumiauti dubu Ioane Herodi nou ro paea mata se emowapotaidirotiti ibo, ‘Oro ubauba tanaro gosioidiro neama dubu orobo na-gowasiri, oro ro sabi gesebea.’

Iedi owera ro Herodiasi ro na-girowai nou ubauba to gereredea, Ioane nou ro ubauba masawe neito iaurititi. Herodiasi gabo ibo iosoratiti Ioane kopia aboto, kaupoti gabo owea pua mabu nou Herodi ro owasioutititi.

Ata tau Herodi owera iato gemeiriai nou boso urubia aboto Ioane orobai ri dibura to edea ri. Taie boso rubi ro edi owera ro na-girowai-rimo neio ro Ioane aise gemou-rimo taie korobai iato dibura to aise gibiria-rimo. Herodi ro nedi tanaro ro nou ri gosioidiro mabu nou ubi ie Herodiasi kamade kowai.

Herodi ro Ioane tere ta-ematititi, nou ubi tato ie nou kopia mabu nou umoro ie Ioane nou kerewaikerewai tanaro tato ie, nou tarena dubu e ina Ioane nou ro mea mino to oworohuti. Herodi ubi ie Ioane owera kemewidiro aboto kaupoti nou ro na-emewidirotiti siriosirio kimaragoidiro iaurititi.

Taie ibo imidirotiti-bimo ata tau Herodiasi ro mea tau nato gowea Herodi koroto tau ro gowamo taie nou ro urubia sirio iato gidabuti-ro kaupoti moro to nou duriomoro edi na urubia na-emeaurititi-mo, nou boso eputa urubia arua awawo rubi mutu. Taie nou ro iato gimowapotai ibo, ‘Abora mo koroto saiki ie, mo soriomu namadime-emesioidiro-ri.’

Taie urubia kaupoti moro to ta-gorowoiriamuti-rimo ohona iato giho-rimo, taie iedi tau ro nato Herodiasi edi besere ro nato gou-ro omaro ri. Iedi dubu sirio ro na-gorowomdiro Herodi mutu neio ro ta-giauri-rimo nou komaro ginere beda sosoro gimesioidiro neio nou ro kamade aise giwai.

Taie iedi besere ro nou komaro na-goporeai Herodi ro nou aboto iato gutura ibo, ‘Oro etou nakomu ro orowapotai-die mo ro aise anama-omia-ri. Mo ro edi duriomoro na-niauri oro ubi ato oro sapuwo anama-emapepea-ri mo ro.’

Taie iedi besere ro nou ro edi owera ro na-girowai nou imese girario mamu aboto, nou ro ibo, ‘Aiau mo ro etou nakomu ri nama-utura-ri eputa dubu aboto?’

Nou mamu ro ibo, ‘Oro ibo ba-dutura “Ioane eputa.” ’

Nou ro edi owera ro na-girowai taie nou imese girario hio to eputa dubu aboto nou emowapotai ri. Nou na-gorowateai-ro nou ro ibo, ‘Mo ubi ie oro ro Ioane eputa komia abora ba-demowia-ro kipura to neito ba-demowou-ro.’

Eputa dubu ro edi owera ro na-girowai nou eputa se geweisorowado nou kamade tato ta-goi, kaupoti nou ro beda owera gutura iedi besere ro nou aboto edi dubu sirio ro na-gorowomidiro soriomu abato neio ro ta-gemorowai-rimo ina nou modobo pua ubi tato koi, taie iedi besere ro nou owera gabo modobo eputa dubu aise garaidodorai, taie nou ro ata boso dubu imese gemeiriai dibura moto to, Ioane nou ro iato na-gowea komidiro moro ato iato giri se gomia wagoha aise garia. Taie edi eputa ro nou ro na-gowia kipura to imese gowameai-ro iato gaiwai iedi besere ro nou aboto ina nou ro gowarario mamu aboto.

Taie Ioane kowasoro rubi ro na-girowai-rimo ibo Ioane ta-waria-mo nou ududu durupi torobu, taie neio iato gou-rimo nou ududu durupi bato gorobu neito, na-goumai-rimo taie imese gedea-rimo bobo to.

Herodi owera ta-girowai Iesu sapuwo to mabu nedi duriomoro nato Iesu masiro imese ta-gorobodorouti. Arua urubia ro nato gutura-rimo ibo, ‘Iesu nou Ioane ie obo to edi dubu ro na-iwarumiautiti nou bobo rido ta-geribua-die io nou se ie nou.’

Ina arua urubia ro ibo, ‘Iesu nou Eraia ie, Godi ata ipusu owera dubu e tagara tau ato na-imidirotiti.’

Ina arua urubia ro ibo, ‘Nou Godi ipusu owera dubu e ipusu owera urubia beda sosoro gorowomidiro tagara tau ato.’

Herodi nou gare se iedeatiti neio edi owera to na-iremowagomeatiti-mo Iesu sapuwo to iato nou ro a-gutura ibo, ‘Iedi obo to kiwarumiauti dubu ro Ioane nou mo owera to ta-garia-rimo ina nou bobo rido ta-geribua-die io nou se ie.’

30 Iesu kowasoro urubia na-gitiodorai neio ina ioudo na-gorowame-rimo nou aboto, nou owera iato gemowauti-rimo neio ro etou tanaro gisioidiro-rimo. Iedi owera ro neibi nouto na-geremowauti-birimo 31 iato urubia dubu patu nato garadabuti-rimo neibi aboto. Urubia arua kou korowameai neito gorowati-rimo kou korowameai mabu urubia imese sirio ia ie. Ina iedi urubia sirio ro na-giwia-birimo neibi ro mea tau owea pua ohona kiho aboto.

Taie Iesu nato gerewesegerai neibi aboto nou ro nato gimowapotai-bi, ‘Dou-birimo, mo mutu atu se mou-birimo urubia tato moro to sipere iato namabo-omidiro-ri.’

32 Taie neibi pe keremamodorai kiora imese giabu-birimo nakara moro to. 33 Urubia sirio umoro ta-goi-rimo ibo neibi iedi moro ro neito ou-bimo. Taie neibi na-gasiriai-birimo urubia ibose sairo to ata gabo rido gou-rimo, taie neibi ido gorowateai-birimo iedi moro ro neito keba se iedi urubia ro neio ro gorowateai-rimo. 34 Neibi iato na-gairio-birimo iedi urubia sirio ro Iesu nou kowasoro urubia mutu neibi gimasebidiro-ibirimo. Iedi urubia sirio ro sabowa gabogabo rido goroho-rimo.

Iesu na-giraroweauti nou auna ia nirimagare goi neio aboto mabu neio nou ro na-giwia idaibo ie sipisipi kimowotoi dubu tato ie dorogora se irohotiti-mo iedi urubia ro idaibo mino to goroho-rimo. Taie nou ro auna se iato gitamudiro.

35 Iesu iedi kowasoro urubia ro iedi tau ro nato saiki egea mere se ta-gororumaidiro neio ro nato gutura-rimo nou aboto, ‘Nedi moro ro neito na-nou-diebirimo nato urubia orowomidiro pua, sabowa tato moro ie. Saiki oriodoi 36 nedi urubia ro modobo ie kitiodorai aboto neio modobo ie aupi sabowa na-irobu-die neito kitioduti ohona iato ba-mimade-mo mani to.’

37 Taie Iesu ro neibi nato gimowameai-bi ibo, ‘Nibi ro modobo ie nedi urubia ro ohona kimia.’

Ina kowasoro urubia ro ibo, ‘Neio ohona kimemidai ato neibi ro idaibo auna mani keherai ie! Neibi idaibo sosoro mani potoro ie neio ohona imemede na!’

38 Taie Iesu ro ina iato gimodowa-ibi, ‘Nibi beda mutu dokou iwou-diebirimo? Dou-bimo iosora ri.’

Taie neibi imese gou-birimo na-giosora-birimo Iesu nato gemowapotai-birimo ibo, ‘Neibi abato tiamo 5 dokou nakere teibo mutu.’

39 Taie Iesu ro iato gimowameai-bi, ‘Urubia dimowapotai-bimo gabogabo ato marapeputi-mo sugamoso ato morowomititi.’ 40 Taie, neio imese gorowomititi simara topira to, arua 50, arua 100.

41 Taie Iesu ro dokou ioudo na-gimidai-ro nakere teibo mutu taie nou toboro ohu to se gawota taie nou eso owera imese garo iedi dokou ra nakere ra neitiro sapuwo to. Dokou nou ro aise gisebuti ipiipi nakere ibose ti-gisebuti taie urubia ihona nou ro imese giaiwo nou kowasoro urubia aboto. Taie neio ro na-gimade-rimo iato gimoworoho-rimo, 42 urubia sirio ro imese giho-rimo, neio na-giho-rimo womu tato ti-giamidimai.

43 Taie neio kiho na-giporeai-rimo iedi mapapati ro na-gimesere-rimo kowasoro urubia ro 12 gatere to gimodiawado-rimo womu tato gatere sirio imese ti-giritomuti-rimo.

44 Iedi urubia ro iato na-giho-rimo ohona auna topira gebari ie. Dubu se gioputi-rimo 5,000. Mamio merebusere mutu ioputi pua.

45 Iesu ro nou kowasoro urubia iato gimowapotai pe to iabu ri ata sapuwo to sabowa masiro tararasoro Betesaida to. Iedi tau ro ohona kimio ta-goroporeai Iesu ro nato gimowapotai-bi ibo ‘Nibi dasiriai-bimo keba se, mo saro rido tinama-ou-ri.’

Taie Iesu iato aise geremeserai, urubia iato gitioduti neio simara sabowa to orowame ri taie 46 iato nou imese gidiai podo duriomoro to, Godi mutu iato geremowauti-rido.

47-48 Adimo duwoduwo ato nou umoro ta-goi nedi na peteibi ro na-gasiriai-birimo ipi ato auna ia woko tosioidiro-diebirimo pe egea se gabiti-birimo gawia ro aise giwame-biro neibi modobo pua.

Omona pawa owera ato Iesu ro nato giwasoro-ibiro saro rido nou wisa na obo ato gou-ro neibi ro aupise nato gowea-birimo pe gomo ato na-gapere-ro 49 nou neibi ro eibimai pua a-giwagogorai-birimo. Tere iamo iato giaiauti-birimo ibo, ‘E, Obodai dubu tou-die!’

Neibi ro obodai dubu to gasoro-birimo eibimai pua, 50 kaupoti nou owera to gorowapotai-ro neibi aboto ibo, ‘Nibi tere na ie, nou mo ie, mo ata dubu pua.’

51 Nou pe to imese gorora neibi turituri ato imese gomi. Iedi korora na-gorora pe to iedi gawia gebari ro boito hato gou aise garadibiai. Neibi ro na-gowea-birimo etou tanaro ro gororosioidiro neibi auna kimaragoidiro ro giopia-ibi imese gerereauri-birimo. 52 Keba se neibi ro iedi atu saiki ro nato ta-giauri-birimo 5 dokou nou ro beda sosoro mino to gisebuti ina beda sosoro to gorowatuti-rimo inaina. Nou ro etou tanaro gisioidiro neibi ro maumo mea mino to owea pua ina neibi auna se gimaragoidiro-birimo gawia beda sosoro to garadibiai. Neibi kimaragoidiro patu imese timotimo ia se giamo modobo pua maumo mea se kowea.

53 Neibi na-giabu-birimo Betesaida orobai pua aise giairio-birimo ata duriomoro muba towamo Genesareti to, iato neibi kererepeduti, pe neibi ro na-gemasaubo-birimo mea mino to, 54 taie urubia ioudo na-gou-rimo neio ro nato gowea-rimo ‘O nou Iesu e. A Iesu ta-wou-ro.’

55 Neio perepere se gorowararioidiro-rimo erere sabowa to urubia imowapotaidiro ri ibo Iesu ta-wou-ro. Taie iedi korowararioidiro ro na-gorowararioidiro-rimo ina ioudo egeaegea temeteme rubi mutu gorowame-rimo iato giworoho-rimo taratara mutu Iesu aboto nou ro meana iwaititi ri. 56 Duriomoro gabogabo Iesu na-goroho temeteme urubia ibose ti-giworoho-rimo goto didiri to nou ro meana iwaititi ri ina arua urubia ro auna ia se gemagege-rimo ibo, ‘Iesu modobo buro ra nimo namuturubi temeteme ro na-iwati oro obotama gare kawakawa kemowaseidiro?’

Iedi temeteme urubia ro neio ro obotama iato gemowaseidiro-rimo, temeteme dubu ro obotama nagi-emowasomai-ri nou temeteme aise gi-iroporeai-ri, neio ibo gorowati-rimo.