1 Nedi tanaro ro nou saro gabo ato mo ro netewa netewa sowake urio peteibi se niwia-ibi. Neibi kebase ta-goroburutai-birimo sie, nigori, surama, gawia, beda sapuwo rido iadudurotiti-dioumo, neibi ro aise girobai-birimo, duriomoro kihuduti aboudo iwasiai ri, duriomoro, buru oromo, ota kihuduti modobo pua. 2 Godi ro neibi pupuwo korosa ta-gimiai-ibi, neibi ro duriomoro ra buru oromo ra ubauba iwai-ma ri.

Taie iato ata sowake urio mo ro nato nowea saiki kidiawado moro aboudo ioudo gioro-ro. Nou ro keremiro mabu dubu Godi, nou edi isabuna kimamo nakomu ro nou se gorobidiro-ro. Nedi sowake urio ro nou ro auna kaunene iato gutura-ro iedi netewa netewa sowake urio peteibi ro neibi aboto. 3 Nou ro ibo, ‘Nibi ro duriomoro, buru oromo, ota, tau se ubauba iwai ate, womu tato neibi ro Godi edi sowake urubia ro neio isabuna kimamo witoro ato, paease kiwapotai aboto ibo neio Godi do ie.’

Taie, neibi ro Godi edi sowake urubia ro witoro ato isabuna iato gimamo-rimo.

4-8 Ina iato mo ro owera ta-nirorowai isabuna beda mutu urubia ro gimade-rimo. Isiraere imese gu sirio aboudo 144,000 urubia isabuna neio witoro ato sowake urio peteibi ro gimamo-birimo. Nu gu gabogabo neio ie: Iuda gu aboudo 12,000 ie, Rubeni gu aboudo 12,000 ie, Gadi gu aboudo 12,000 ie, Asere gu aboudo 12,000 ie, Napatari gu aboudo 12,000 ie, Manase gu aboudo 12,000 ie, Simioni gu aboudo 12,000 ie, Riwai gu aboudo 12,000 ie, Isaka gu aboudo 12,000 ie, Seburuni gu aboudo 12,000 ie, Iosepa gu aboudo 12,000 ie, ina Beniamini gu aboudo 12,000 ie.

Neio atu se kidabuai ato 144,000 urubia ie, Godi edi isabuna ro sowake urio aboudo neio ro gimade-rimo.

9 Nedi tanaro na-goroporeai-rimo nou saro gabo ato iau!, mo sosoro gabo ato auna ia dubu patu ota puara mororobiritai-rimo idaibo sosoro ie, modobo pua kioputi imese sirio ia ie. Nedi urubia sirio ro erere duriomoro rido goroho-rimo, erere gu urubia ie, erere tanaro urubia ie, daro erere owera urubia ie. Neio eputa dubu komidiro nakomu nou sosoro gabo ato gorowotoi, ibose Sipisipi Dawade sosoro gabo ato gorowotoi. Nedi urubia ro keakea tututu sedo ta-giroiti-rimo, neio ro wakau girobidiro-rimo. 10 Neio ro auna ia kodu to ibo garo-rimo, ‘Godi oro etu ro imidirotiti nedi komidiro nakomu ro nato, ibose Sipisipi Dawade na-imidirotiti, nitiro urubia simara ubauba aboudo nitiro ro kiapopo ie.’

11 Iato iedi komidiro nakomu ro, 24 eputa urubia, ina 4 keremiro nakomu peteibi, neibi imese sirio sowake urio ro ta-gimowaperai-birimo. Iedi komidiro nakomu ro nou sosoro gabo ato, neio imese atu se eputa aise giwaposowa-rimo, taie Godi iato gemowabu-rimo. 12 Neio ro ibo, ‘Nou ibose ba-mororosioidiro-rimo! Oro modobo ia ie nimo ro auna se kemowabu, ina oro auna ia dubu to kasoro, ina auna muro dubu to kasoro. Oro modobo ia ie nimo ro eso owera karo oro aboto, ibose oro masiro ohu to kowoubua, oro auna pupuwo korosa dubu to kasoro, ina auna pupuwo dubu to kasoro. Imese sirio tau nimo ro nedi owera ro oro nouto memowabu-rimo womu tato womu tato. Ibose ba-mororosioidiro-mo!’

13 Taie iato 24 eputa urubia mo neibi ata ro nemodowa-ro, ‘Iedi urubia ro na-orowomidiro-die keakea obotama mutu, neio etio ra? Ina boido ra neio?’

14 Ina mo ro ibo, ‘Auna dubu, oro umoro ie.’

Taie, nou ro ibo, ‘Iedi urubia ro neio auna koko tau aboudo gou-dioumo, neio obotama Sipisipi Dawade edi karima ro garawiriti neio ro neito ta-giwiouti-rimo, keakea neito giwai-rimo. 15 Ina noudo ie iedi urubia ro neio Godi komidiro nakomu nou sosoro gabo ato nou ri irowotoititi. Neio ro nu duwo saiki sirio tau Godi ubi tanaro nou ri isioidirotiti-dumo nou edi Tarena Moto ro nato. Ibose etu ro imidirotiti komidiro nakomu ato neio nou ro asesepu maumo ito ama-iatopea-ri, iato ama-irowomidirotiti-ri. 16 Neio ohona sogoi ro ina iwati-ri pua, obo sogoi ro ina iwati-ri pua, ina auna saiki korosa ro iauri-ri pua. 17 Mabu sipisipi dawade edi na imidirotiti eputa dubu komidiro nakomu ato, sipisipi kimowotoi dubu ro sipisipi beda sosoro kimowotoi ra, neio nou ro ibo ama-imowotoi-ri, ibose ama-iwaboidiro-ri keremiro kimio obo gabibiri aboto idio ri. Keba se neio edi mibo mutu na-irowomidirotiti, iedi mibo ro Godi ro ama-iwatateai-ri neio aboudo, ido mibo tato ama-irowomidirotiti-ri.’