1 Sipisipi Dawade ro iana kimakoko nakomu aise gesebea. Iedi kesebea ro na-gesebea, iedi tau ro nato Adiri sabowa ato auna gasio aise gereredea, ata diamo ata ororosioidiro pua. 2 Iedi diamo tato tau ro egea mere se ta-gadomaidiro, taie mo ro nato niwia iedi 7 sowake urio ro Godi sosoro gabo ato na-irowotoititi. Neio humuko erere se nou ro iato gimio, neio se girobidiro-rimo.

3 Ina iato ata sowake urio ro gou-ro, nou ro a-gorobidiro-ro gorodi nuku meamea nibonibo nakomu beda moro ato iamotiti, nou imese gou-ro Godi komidiro nakomu sosoro gabo to, gorodi nadi kitomuti bato gowamo. Taie nedi sowake urio ro auna ia mea nibo nakomu Godi ubi ato gomia-rimo, nou ro nou giedea gorodi nadi kitomuti ohu ato, era iato ibose to giriware, taie nou ro iato aise gimusubua. 4 Iedi mea ia nibo ro ina Godi edi tarena urubia ro neio edi kararatoro owera ro, neitiro na-garadabuai-rido, neio ro gioro-rimo sowake urio aboudo Godi aboto. 5 Iedi atu sowake urio ro nadi kitomuti rido era nou ro ioudo na-gimade-ro, nou ro edi mea nibo nuku ro neito iato giaremo, taie iedi nuku ro nou ro sopu duriomoro to aise geherai-ro. Nou neito na-gorowateai sopu duriomoro to, iato penenio ro gerememiouti-rimo, gururu moromoro rido aise geremohumo-rimo, ibose auna sopu momuruwo aise gororosioidiro nedi duriomoro gebari ro nato.

6 Taie iedi 7 sowake urio ro 7 humuko nato gimododiai-rimo iouria ri. 7 Keba sowake urio ro humuko nato guria, koko daroho nadi iopu sosoro, era karima mutu, na-geremadabuti-rimo, binio to aise giretuti-ro. Ina noudo ie sopu duriomoro netewa didi patu peteibi to kiapeputi-bi ato, ata patu beda mutu ota ro gorowotoi iato, ibose beda mutu sugamuso ro gorowotoi goto ato, goto ia mutu, era ro imese aise gipisiamuti, ata nakomu ata emeserai pua.

8 Kaupoti sowake urio ro humuko keba se ta-guria, iato ata sowake urio ro ata humuko nato guria-ro. Tuturu to pua, auna ia podo sosoro era ro giriware, buru oromo to Godi ro nato geherai. Buru oromo netewa didi patu peteibi to kiasiouti-bi ato, ata patu edi obo ro gomidiro urubia karima to aise gararapoi. 9 Ina beda mutu keremiro nakomu ro goroho-rimo iedi oromo ipi ro nato neio imese aise gorowaburai-rimo, ibose beda mutu sawa pe ro goroho-rimo iedi oromo ipi ro nato neio imese giwarumia.

10 Netewa teibo sowake urio teibo humuko keba se ta-giouria-rido, ina iato ata sowake urio ro humuko nato guria-ro. Iato auna kiboni turupina sosoro toboro rido nato garaubai-ro, oromo sirio sapuwo nou ro aise girobai, obo gabibiri sirio mutu. 11 Iedi kiboni ro geretei-ro neito nu masiro owamo ibo Miwahodo, nou ro beda oromo turi girobai, ibose beda gowo kainakaina girobai, neio obo imese karakara ia aise giwai. Urubia sirio ro na-gidio-rimo edi karakara obo ro, neio aise gorowaburo-rimo.

12 Netewa didi humuko peteibi sowake urio peteibi ro ta-giouria-birimo, ina ata sowake urio ro ata humuko iato guria. Saiki kimewia sapuwo kere benenio aise giaseperai, sagana ibose beneniobenenio kimewiti sapuwo kere aise giaseperai. Ibose kiboni sapuwo kere neio edi woroworo ro aise giaseperai-rimo. Ina noudo ie neio sapuwo kere duwoduwo ro aise girobai. Saiki tau sapuwo kere duwoduwo se gowamo. Duwo tau sapuwo kere woroworo ta-giaseperai, imese duwoduwo ia se gowamo.

13 Mo ina na-nirarowea giriai gebari se nowea ohu ato na-giarubiauti. Nou ro auna se iato giaia, ibo ‘Iau o! Iau o! Auna mibo tau tou-die duriomoro urubia aboto! Mabu saro humuko peteibi sowake urio peteibi ro beda tau ato namabimi-iourio-ri, awawo ubauba tanaro sirio ro amadimo-ororosioidiro-ri.’