Mo꞉fo꞉s Agel We Fo꞉l Eyo꞉
Tesalonaika
Kaluka꞉isalemo꞉ Sa꞉sa꞉liga꞉fo꞉
Asuluma꞉no꞉ towo꞉ we
Fo꞉l eyo꞉ mo꞉fo꞉s we tilidabu kaluka꞉isale Tesalonaika amisa꞉n a꞉namilo꞉ sab o꞉mo꞉ sa꞉sa꞉liga꞉fo꞉. Tesalonaika amisa꞉n a꞉no꞉ Masedonia hen us a꞉na a꞉lab. Ho꞉len Fo꞉l eyo꞉ Filibai amisa꞉no꞉ ta꞉ta꞉sa꞉ga꞉, Tesalonaika ha꞉na꞉ga꞉yo꞉, sa꞉so꞉ a꞉na mo꞉mo꞉do꞉. (Iliga꞉felo꞉ 17.1-9) Fo꞉l eyo꞉ to nafa a꞉no꞉ Tesalonaika kaluka꞉isalemo꞉ widabikiyo꞉, iliyo꞉ Fo꞉l elo꞉ sa꞉lab a꞉no꞉ kudu ha꞉nabiki, Yu kaluwo꞉ ba꞉da꞉sa꞉ga꞉ gadiaki, Folo꞉ Tesalonaika heno꞉ ta꞉ta꞉ga꞉ ane.
Tif amio꞉ Folo꞉ Kolin amisa꞉n a꞉na ha꞉na꞉ga꞉ sabikiyo꞉, egeledo꞉ nanogdo꞉ dian kalu Timoti a꞉no꞉ Fo꞉ldo꞉wa ha꞉na꞉ga꞉ fa꞉la꞉dowaki, hida꞉yo꞉ Tesalonaika sa꞉s a꞉namilo꞉ fa꞉la꞉dowab a꞉no꞉ ko꞉lo꞉ sio꞉.
Fo꞉l eyo꞉ Timoti elo꞉ to sa꞉lab a꞉no꞉ da꞉da꞉sa꞉ga꞉yo꞉, Folo꞉ Sales Timotiyo꞉ iliyo꞉ tilidabu kaluka꞉isale Tesalonaika sa꞉s a꞉namilo꞉ sab a꞉no꞉ halale alitaki, mo꞉fo꞉s we a꞉na sa꞉sa꞉liga꞉fo꞉.
Tesalonaika tilidabu kaluka꞉isaleyo꞉ man nafa kudu ha꞉nab a꞉no꞉ da꞉da꞉sa꞉ga꞉, Fo꞉l e sagalo꞉wo꞉ alan dowa꞉sa꞉ga꞉, a꞉na sa꞉sa꞉liga꞉fo꞉.
To nowo꞉ we. Tesalonaika tilidabu kaluka꞉isale a꞉no꞉ Ya꞉su Keliso a꞉ma꞉la꞉lo꞉ mia꞉nigab a꞉no꞉ dinafa fanda asuluma꞉ki, Fo꞉l eyo꞉ mo꞉fo꞉s we imo꞉wo꞉ a꞉na sa꞉sa꞉liga꞉fo꞉.
A꞉la꞉ta꞉ga꞉ Tesalonaika kaluka꞉isaleya꞉lo꞉ dabu ba꞉ba꞉ dowo꞉ a꞉no꞉ nowo꞉ we. Ya꞉suwo꞉ a꞉ma꞉la꞉yo꞉ semo꞉ yalikiyo꞉, tilidabu kalu sowo꞉ a꞉no꞉ e a꞉ma꞉la꞉ dasilia꞉ga꞉ mela꞉no꞉wo꞉ doma꞉iba꞉le? Nowo꞉ we, Ya꞉su Kelisowo꞉ ho꞉leno꞉ iga꞉sa mia꞉iba? Ililo꞉ dabu ba꞉ba꞉ a꞉no꞉ eyo꞉ a꞉ma꞉la꞉ fanda sa꞉laki, Ya꞉su e mia꞉no꞉ yasi silikiyo꞉ iyo꞉ ha꞉sa siliki, tilidabuwa halale dofo꞉melea꞉ki, mo꞉fo꞉s we a꞉na sa꞉sa꞉liga꞉fo꞉.
1
1 Ilig 17.1-9Fo꞉l ne, Saleso꞉, Timotiyo꞉ niliyo꞉ to we sa꞉sa꞉lakiyo꞉, Do Gode o꞉lia꞉ Alan Ya꞉su Keliso o꞉lia꞉ma꞉ kaluka꞉isale, Tesalonaika sa꞉s usamilo꞉ sab o꞉mo꞉ sa꞉sa꞉liga꞉to꞉l. Godeya꞉ ene ha꞉fo꞉ disa꞉lan man o꞉lia꞉ ha꞉sa mesa꞉no꞉ man a꞉no꞉lia꞉yo꞉ gi o꞉lia꞉ dofo꞉melea꞉ki, Godemo꞉ dulugu so꞉lo꞉l.
2 Ho꞉leno꞉ tambo niliyo꞉ gio꞉ ko꞉lo꞉ Godemo꞉ dulugu sa꞉lakiyo꞉, mada o꞉m a꞉la꞉sa꞉la꞉sen. 3 1Kol 13.13,Kolo 1.4-6Giliyo꞉ tilida꞉da꞉ga꞉ man nafale dimida꞉sen, a꞉la꞉ta꞉ga꞉ nol o꞉lia꞉yo꞉ ha꞉fo꞉ disa꞉laki iyo꞉ asuwa꞉ta꞉sen, a꞉la꞉ta꞉ga꞉ Ya꞉su Kelisowo꞉ hendele a꞉ma꞉la꞉ mia꞉nigab a꞉la꞉bo꞉ giliyo꞉ tilida꞉da꞉sa꞉ga꞉ yasila꞉lab ko꞉lo꞉ halale kagaya꞉sen. Niliyo꞉ gililo꞉ dimido꞉ a꞉no꞉ asula꞉liki, Do Godemo꞉ mada o꞉m a꞉la꞉sa꞉la꞉sen.
4-6 Ilig 17.5-9,1Kol 2.4-5Godeya꞉ to nafayo꞉ gilo꞉wa fa꞉la꞉dowabikiyo꞉, to ina꞉li fa꞉la꞉dowo꞉ma. To a꞉no꞉ niliyo꞉ hendele tilida꞉da꞉sa꞉ga꞉ halale widakiyo꞉, Godeya꞉ ene halaido꞉ o꞉lia꞉ Mama Malilo꞉ enedo꞉ o꞉lia꞉yo꞉ mio꞉. A꞉la꞉ta꞉ga꞉ nio꞉ gi o꞉lia꞉ silikilo꞉, nililo꞉ man nafale dimido꞉ a꞉no꞉ giliyo꞉ asulufo꞉lab. Alan Ya꞉su o꞉lia꞉ nililo꞉ man nafale dimido꞉ a꞉no꞉lia꞉yo꞉ giliyo꞉ kudu ane. Giliyo꞉ hida꞉yo꞉wo꞉ alan di ko꞉sega, Mama Malilo꞉ a꞉ma꞉ sagalo꞉wa ilikiyo꞉, ene to nafa a꞉no꞉ sagala꞉liki dabu. Ni nao i, Gode eyo꞉ gio꞉ mada alan asula꞉sa꞉ga꞉, gio꞉ eno꞉le doma꞉ki da꞉feyo꞉ niliyo꞉ a꞉la꞉asulo꞉. A꞉la꞉fo꞉ko꞉lo꞉ niliyo꞉ Godemo꞉wo꞉ mada o꞉m a꞉la꞉sa꞉la꞉sen. 7 O꞉go꞉ tilidabu kaluka꞉isale tambo Masedonia hen o꞉lia꞉ Akaya hen a꞉namilo꞉ sab a꞉ma꞉yo꞉ gililo꞉ man nafale dimido꞉ a꞉no꞉ asula꞉liki, iliyo꞉lo꞉ kudu ha꞉nab. 8 A꞉la꞉dimida꞉i ha꞉nab ko꞉lo꞉ Alana꞉ towo꞉ ge amilo꞉ handalowab a꞉no꞉ Masedonia hen o꞉lia꞉ Akaya hen o꞉lia꞉ya ane ko꞉mba. Ko꞉sega gililo꞉ Gode amilo꞉ tilidabuka꞉ a꞉la꞉do꞉ sio꞉ to a꞉no꞉ hen nolo꞉lo꞉ da꞉da꞉li ha꞉nab ko꞉lo꞉, niliyo꞉ gililo꞉ tilidabu a꞉no꞉ ko꞉lo꞉ a꞉sa꞉ma꞉no꞉wo꞉ mo꞉ililo꞉. 9 Mo꞉wo꞉ gililo꞉ dimido꞉ a꞉no꞉ ko꞉lo꞉ ililo꞉ nemo꞉lo꞉ malolo meo꞉ we. Nio꞉ gelo꞉wa fa꞉la꞉dowo꞉ amio꞉ tililiale. A꞉la꞉ta꞉ga꞉ giliyo꞉ madali godeyo꞉ ta꞉ta꞉ga꞉, Gode mela꞉no꞉lelo꞉ a꞉lab a꞉no꞉ tilida꞉da꞉sa꞉ga꞉, ene nanogo꞉ dimidale. 10 A꞉la꞉ta꞉ga꞉ Godeya꞉ ene So꞉wa ko꞉lo꞉ a꞉ma꞉la꞉ mia꞉no꞉ a꞉no꞉ giliyo꞉ yasila꞉labeka꞉ a꞉la꞉bo꞉, iliyo꞉ nemo꞉wo꞉ malolome ko꞉lo꞉ so꞉lo꞉l. Godeya꞉ ene So꞉wa Ya꞉su e sowa꞉sa꞉ga꞉yo꞉, a꞉ma꞉la꞉ a꞉dasilia꞉ga꞉ Hebene sab. A꞉la꞉ta꞉ga꞉ nio꞉ Godeya꞉lo꞉ gadia꞉sa꞉ga꞉lo꞉ wa꞉ldo꞉ dimiab a꞉no꞉ diabena꞉ki, Ya꞉suwa꞉yo꞉ nio꞉ a꞉ma꞉la꞉ gasilia꞉sen.