1 1Kol 2.3Kalu nolba꞉yo꞉ towo꞉ nelo꞉ doba꞉da꞉yo꞉ diga꞉li sa꞉lakiyo꞉ a꞉la꞉sio꞉, “Fo꞉l e ni o꞉lia꞉lo꞉ elen ho꞉len a꞉namio꞉, e enena꞉ma꞉la꞉ ha꞉ga dowa꞉sen, ko꞉sega e ko꞉na꞉ dowakiyo꞉, eyo꞉ towo꞉ nimo꞉wo꞉ halaido꞉ sio꞉ ko꞉lo꞉lab.” Iliyo꞉ a꞉la꞉sio꞉ ko꞉sega, Ya꞉su e enena꞉ma꞉la꞉ ha꞉ga dowakilo꞉ ha꞉sa dowan o꞉leaumbo꞉, ne Ya꞉suwa꞉ man a꞉na dowakiyo꞉, to we gimo꞉wo꞉ sa꞉ma꞉nigo꞉l. 2 1Kol 4.21Kalu nolba꞉yo꞉ nio꞉ henfelo꞉ mano꞉ kudu ha꞉naki, nanogo꞉ a꞉na dimida꞉lab a꞉la꞉sa꞉la꞉lab ko꞉lo꞉, niyo꞉ towo꞉ i o꞉mo꞉wo꞉ halaido꞉ sa꞉ma꞉no꞉. Ko꞉sega ne gilo꞉wa yalikiyo꞉, to halaido꞉ o꞉leo꞉ngo꞉wo꞉ gimo꞉wo꞉lo꞉ sa꞉labena꞉ki, dinafa dowa꞉bi. 3 Kalu ne o꞉lia꞉lo꞉ eteab a꞉no꞉ buban aumbo꞉ dimida꞉lab. Nio꞉ hendele henfelo꞉ wena so꞉l, ko꞉sega henfelo꞉ kaluwa꞉lo꞉ kegakilo꞉ buban o꞉leaumbo꞉ nio꞉ a꞉la꞉bo꞉ mo꞉dimidan. 4 A꞉fe 6.13-17Buban kelego꞉ ko꞉lo꞉ nililo꞉ ta꞉lisab we, henfelo꞉ wenamilo꞉ buban kelego꞉ o꞉leo꞉ngo꞉ma. Buban kelego꞉ wenamio꞉, Godeya꞉ ene halaido꞉wo꞉ a꞉lab ko꞉lo꞉, gis kaluwa꞉ halaido꞉ a꞉no꞉ o꞉li bidila꞉ma꞉ib. 5 Kalu nolba꞉yo꞉ towo꞉ madali sa꞉lakiyo꞉, asulo꞉ inido꞉wo꞉ iwalu dia꞉taki kaila꞉sen. A꞉la꞉do꞉ gab a꞉ma꞉yo꞉ kaluka꞉isaleyo꞉ Godeyo꞉ mo꞉fanda asuluma꞉kiyo꞉ togo꞉ ili ka꞉la꞉lab. Ko꞉sega asulo꞉ ililo꞉wo꞉, a꞉la꞉ta꞉ga꞉ to mo꞉lilo꞉ sa꞉lab a꞉no꞉lo꞉ tambo niliyo꞉ sana to꞉lolaki o꞉ngo꞉ma ta꞉ta꞉sen. A꞉la꞉ta꞉ga꞉ gis kalu ko꞉lo꞉ dibolo amilo꞉ to꞉lo alitan aumbo꞉, niliyo꞉ ili hala asulo꞉ a꞉no꞉ kalaba wido꞉ ko꞉lo꞉, ili asulo꞉wo꞉ nodola꞉sa꞉ga꞉, Keliso ko꞉lo꞉ kudu hamana꞉ki ta꞉ta꞉sen. 6 Giliyo꞉ Kelisowa꞉ ene towo꞉ tambo kudu ha꞉nalikiyo꞉, niliyo꞉ kalu abeyo꞉ a꞉la꞉iyaki, tolo꞉ mo꞉kudu ha꞉na꞉lab a꞉no꞉ tambo falasila꞉ma꞉no꞉.

7 Giliyo꞉ kelego꞉ gililo꞉ ba꞉dab a꞉no꞉ mada dinafa aloba꞉da꞉bi. Kalu abeyo꞉ e hendele Ya꞉suwa꞉no꞉le dowo꞉l a꞉la꞉asulalega, e to we dinafa fanda asuluma꞉ib. E Ya꞉suwa꞉no꞉le dowo꞉ o꞉leaumbo꞉, nio꞉lo꞉ Ya꞉suwa꞉no꞉le dowo꞉l. 8 2Kol 13.10Alan eyo꞉ nio꞉ nanog we dima꞉kiyo꞉, da꞉fea꞉sa꞉ga꞉ wiyo꞉ dimi ko꞉lo꞉, tilidabu gililo꞉wo꞉ anama꞉kiyo꞉ nanog a꞉no꞉ nimo꞉ dimi. Tilidabu gililo꞉ a꞉no꞉ mogagila꞉ma꞉ki dimima. A꞉la꞉fo꞉ko꞉lo꞉ Gode elo꞉ nimo꞉lo꞉ wi dimi a꞉na ilikiyo꞉, niyo꞉ mo꞉sendelowaki, sagala꞉liki maloloma꞉no꞉. 9 Ko꞉sega niyo꞉ mo꞉fo꞉s we gio꞉ tagi alitaki sa꞉sa꞉lo꞉ a꞉la꞉bo꞉ asula꞉so꞉bo. 10 Kalu nolba꞉yo꞉ ne ko꞉lo꞉ sa꞉lakiyo꞉ a꞉la꞉sio꞉, “Fo꞉la꞉ mo꞉fo꞉s sa꞉sa꞉lo꞉ a꞉namio꞉, towo꞉ halaido꞉ ko꞉li ko꞉lilo꞉wo꞉ sa꞉sa꞉lifa꞉ ko꞉lo꞉ da꞉lab. Ko꞉sega eneno꞉ nilo꞉wa mio꞉ amio꞉, e halaido꞉lo꞉ma dowaki, to elo꞉ wido꞉ a꞉no꞉ o꞉ngo꞉malo꞉ngo꞉, fa꞉fa꞉selabi dabu.” 11 Kalu abeyo꞉ to o꞉leo꞉ngo꞉lo꞉ sa꞉lab i a꞉no꞉ to we dinafa asuluma. Ne heno꞉ ko꞉na꞉ dowakilo꞉ nilo꞉ mo꞉fo꞉s amilo꞉ gimo꞉lo꞉ to halaido꞉ sa꞉sa꞉liga꞉fo꞉ o꞉leaumbo꞉, ne ya꞉ga꞉ gi o꞉lia꞉ dowakiyo꞉, o꞉leauka halaido꞉ sa꞉ma꞉no꞉. 12 Kalu i a꞉ma꞉yo꞉ inin wiyo꞉ kailaki dulugu sa꞉la꞉lab. Kalu i a꞉ma꞉yo꞉ ne hendele tininila꞉ kibo꞉bowo꞉, ne no꞉no꞉na꞉ma꞉la꞉ kailakiyo꞉, ne i o꞉lia꞉yo꞉ imilo꞉ka꞉ a꞉la꞉bo꞉ mo꞉so꞉mo꞉lo. Ko꞉sega kalu i a꞉ma꞉yo꞉ a꞉la꞉bo꞉ dimida꞉sen. Iliyo꞉ ini mano꞉ imilo꞉wa꞉le a꞉la꞉liki da꞉fe ba꞉da꞉lab. A꞉la꞉ta꞉ga꞉ iliyo꞉ egelebo꞉ aloba꞉dakiyo꞉, mano꞉ abe tiniaba꞉le a꞉la꞉likiyo꞉lo꞉ da꞉fe keda꞉lab. Kalu abeyo꞉ a꞉la꞉do꞉ dimida꞉lab we asugdo꞉ma dowaki gab.

13 Lom 12.3Godeya꞉lo꞉ nanogo꞉ nimo꞉lo꞉ dimidama꞉kilo꞉ difa꞉ a꞉no꞉ko꞉ sagala꞉liki maloloma꞉nigo꞉l. Ko꞉sega kalu nolbo꞉lo꞉ dimidama꞉kilo꞉ dimi a꞉no꞉, niliyo꞉ sagala꞉liki mo꞉maloloma꞉no꞉ dowo꞉. Nanogo꞉ nililo꞉ gi o꞉lia꞉lo꞉ dimida꞉lo꞉l we, Godeya꞉lo꞉ nimo꞉lo꞉ nanog dimiyo꞉ us a꞉na da꞉lab ko꞉lo꞉, a꞉no꞉ malolo꞉ meaki so꞉lo꞉l. 14 Nio꞉ gilo꞉ amio꞉ ya꞉ga꞉yo꞉ towo꞉ mo꞉wido꞉ kibo꞉bowo꞉, nio꞉ sagala꞉likiyo꞉ mo꞉so꞉mo꞉lo. Ko꞉sega tamin amio꞉ nio꞉ gilo꞉ ami ko꞉le ya꞉ga꞉, Kelisowa꞉ to nafa a꞉no꞉ wido꞉. A꞉la꞉fo꞉ko꞉lo꞉ nanog dio꞉l wenamio꞉lo꞉ nio꞉ sagala꞉liki malolo꞉ mea꞉nigo꞉l. 15 Kalu nolba꞉lo꞉ nanog dimido꞉ a꞉namio꞉ ni dimido꞉ a꞉la꞉bo꞉ mo꞉kailaki sa꞉lan. Godeya꞉lo꞉ nanog nimo꞉lo꞉ dimidama꞉kilo꞉ dimi we, niliyo꞉ digale dimidama꞉no꞉ asulo꞉. Ko꞉sega asulo꞉ nililo꞉wo꞉ we. Gili tilidabuwo꞉ alan fa꞉la꞉dowalikiyo꞉, nanog nililo꞉ dio꞉l we gi usamio꞉lo꞉ alan fa꞉la꞉doma꞉ib. 16 A꞉la꞉ta꞉ga꞉ niliyo꞉ to nafayo꞉ gili fa꞉s amilo꞉ amisa꞉n kandayo꞉ a꞉namio꞉lo꞉ walama꞉ni ha꞉na꞉no꞉. Kalu nolo꞉ hen a꞉namio꞉ tamin amio꞉ walama꞉ni ane kibo꞉bowo꞉, nanog a꞉na ilikiyo꞉ nio꞉ sagala꞉likiyo꞉ mo꞉so꞉mo꞉lo. Ko꞉sega kalu nolo꞉ towo꞉ a꞉namio꞉ mo꞉walama꞉ni ane ko꞉lo꞉, nio꞉ a꞉na ha꞉nalega, niyo꞉ nanog a꞉no꞉ o꞉li sagala꞉li sa꞉ma꞉no꞉. 17 Jer 9.24,1Kol 1.31Ko꞉sega Godeya꞉lo꞉ bugo꞉ amilo꞉ sa꞉sa꞉lo꞉ o꞉leaumbo꞉, niliyo꞉ a꞉la꞉dimidama꞉niki. Bugo꞉ amio꞉ a꞉la꞉sio꞉ ko꞉lo꞉ da꞉lab, “Kalu abeyo꞉ ene wiyo꞉ duludakilo꞉ ka꞉ila꞉ma꞉no꞉ asulab a꞉no꞉, Kalu Alana꞉ wiyo꞉ ko꞉lo꞉ duludaki, nanog elo꞉ dimido꞉ a꞉no꞉ nafale a꞉la꞉sama,” a꞉la꞉sa꞉sa꞉lo꞉. 18 1Kol 4.4Nio꞉ asulo꞉. Kalu abeyo꞉ enena꞉ma꞉la꞉ sagalakilo꞉ ene wilo꞉ duludab a꞉no꞉, Godeya꞉ siwa꞉l amio꞉ kalu a꞉no꞉ wilo꞉ma doma꞉ib. Ko꞉sega kalu o꞉ba꞉le Alan eyo꞉ emo꞉lo꞉ sagalakilo꞉ e wilo꞉ duludab a꞉no꞉, e hendele wiyo꞉ doma꞉ib.