Mo꞉fo꞉s Agel We Fo꞉l Eyo꞉
Kolin
Kaluka꞉isalemo꞉ Sa꞉sa꞉liga꞉fo꞉
Asuluma꞉no꞉ towo꞉ we
Fo꞉ldo꞉ elen ho꞉len a꞉namio꞉, Kolin amisa꞉n alan a꞉no꞉ Akaya hen, Gilig doba꞉da꞉ elen. Fo꞉l eyo꞉ Kolin amisa꞉n alan a꞉namio꞉, Ya꞉suwa꞉ towo꞉ a꞉na mo꞉mo꞉da widaki, sa꞉so꞉ a꞉na mo꞉mo꞉do꞉. Ko꞉sega Fo꞉l e Kolin sa꞉so꞉ ta꞉ta꞉sa꞉ga꞉, nanogo꞉ A꞉fesa꞉s a꞉na dia꞉ni ho꞉no꞉go꞉lab amio꞉, hida꞉yo꞉ nowo꞉ Kolin sa꞉s us a꞉na fa꞉la꞉dowo꞉. A꞉la꞉gabiki Fo꞉l eyo꞉ imo꞉wo꞉ asulo꞉ nafa dimiaki a꞉la꞉ta꞉ga꞉, hida꞉yo꞉ ililo꞉ diab a꞉no꞉ ko꞉lo꞉ digalakiyo꞉, mo꞉fo꞉s we a꞉na sa꞉sa꞉liga꞉fo꞉.
Fo꞉l eyo꞉ to we sa꞉sa꞉lakiyo꞉, Keliso kaluka꞉isale ko꞉lo꞉ Kolin sa꞉s a꞉namilo꞉ sab a꞉no꞉ tilidabu ililo꞉ a꞉no꞉ mogagabiki, e kele asulaki sa꞉sa꞉lo꞉. Ili sa꞉s us a꞉namio꞉ hida꞉yo꞉ da꞉lab. Kaluka꞉isale nolo꞉ aloba꞉dab, nolo꞉ uwo꞉ dian man dimidab, nolo꞉ Ya꞉su Asulo꞉ ma꞉no꞉lo꞉ nab amio꞉ hala dimidab, a꞉la꞉ta꞉ga꞉ Keliso kalu egelebo꞉ mo꞉walila꞉lab. Hida꞉yo꞉ a꞉no꞉ sa꞉s usamio꞉ alan fa꞉la꞉dowo꞉. A꞉la꞉fo꞉ko꞉lo꞉ Fo꞉l eyo꞉ iyo꞉ digalema꞉ki towo꞉ wido꞉. Eyo꞉ ga dian man tog digalo꞉ a꞉no꞉ wido꞉, a꞉la꞉ta꞉ga꞉ hida꞉yo꞉ ko꞉lo꞉ kalu Godeya꞉ Mamaya꞉lo꞉ mo꞉tililia꞉ ha꞉na꞉lab ilo꞉ amilo꞉ fa꞉la꞉doma꞉nigab a꞉no꞉lo꞉ wido꞉. Gulugululan man nafa a꞉no꞉lo꞉, Mama Malilo꞉wa꞉ boba nafa ko꞉lo꞉ Keliso kaluka꞉isalemo꞉lo꞉ dimian a꞉no꞉lo꞉ wido꞉. A꞉la꞉ta꞉ga꞉ sowo꞉ kaluwo꞉ tambo a꞉ma꞉la꞉ dasima꞉ika꞉ a꞉la꞉likiyo꞉ wido꞉.
Fo꞉l elo꞉ to ko꞉lo꞉ Kolin kaluka꞉isalemo꞉lo꞉ wido꞉ a꞉namio꞉ imo꞉wo꞉ hida꞉yo꞉ dimiaki go꞉lo꞉b a꞉la꞉asulo꞉. Fo꞉l eyo꞉ Godeya꞉lo꞉ asulab au asuwa꞉takiyo꞉, kaluka꞉isalemo꞉wo꞉ mada dinafa fanda sio꞉. A꞉la꞉ta꞉ga꞉ heb 13 a꞉namio꞉ Fo꞉l eyo꞉ towo꞉ a꞉la꞉sio꞉, nowo꞉mbo꞉lo꞉ ha꞉fo꞉ disa꞉lan man a꞉no꞉ boba wa꞉la꞉b ko꞉lo꞉, Godeya꞉ ene kaluka꞉isalemo꞉ dimia꞉sen.
1
1-2 Ne Fo꞉l, Godeya꞉ ene asulo꞉wa꞉ ilikiyo꞉, ne da꞉feyo꞉ ko꞉lo꞉, ne Ya꞉su Kelisowa꞉lo꞉ iliga꞉felo꞉ kalu nowo꞉ ne. Nili nao Sostenes naino꞉ mo꞉fo꞉s we sa꞉sa꞉la꞉sa꞉ga꞉, Gode amilo꞉ tilidabu kaluka꞉isale Kolin amisa꞉n usamilo꞉ sab gimo꞉ a꞉na iliga꞉to꞉l. Gio꞉ Godeya꞉ eno꞉le dowa꞉sa꞉ga꞉, Ya꞉suwa dowakiyo꞉ malilo꞉le doma꞉ki, Godeya꞉ gio꞉lo꞉ da꞉feyo꞉. A꞉la꞉ta꞉ga꞉ kaluka꞉isale heno꞉ tambo amilo꞉ sab abeyo꞉ ni Alan Ya꞉su Kelisowa꞉ wi amilo꞉ tilida꞉dab i a꞉no꞉, Gode eyo꞉ iyo꞉ malilo꞉ ta꞉fo꞉. Ya꞉su e, ili Alano꞉lo꞉, a꞉la꞉ta꞉ga꞉ nili Alano꞉lo꞉ e. 3 A꞉la꞉fo꞉ko꞉lo꞉ ha꞉fo꞉ disa꞉ma꞉no꞉ man o꞉lia꞉ ha꞉sa dowan man o꞉lia꞉yo꞉, nili Do Gode o꞉lia꞉ Alan Ya꞉su Keliso o꞉lia꞉ma꞉yo꞉ gimo꞉ dimina꞉ki dulugu so꞉lo꞉l.
Godemo꞉ mada o꞉m a꞉la꞉sio꞉
4 Ya꞉su Keliso eya a꞉la꞉ta꞉ga꞉yo꞉ Gode eyo꞉ gi o꞉lia꞉yo꞉ ha꞉fo꞉ disa꞉ ko꞉lo꞉, niyo꞉ ho꞉leno꞉ tambo gi asulakiyo꞉ Godemo꞉wo꞉ mada o꞉m a꞉la꞉ sa꞉la꞉lo꞉l. 5 Gio꞉ Ya꞉su Keliso eya dowab amio꞉, kelego꞉ nafaleyo꞉ gimo꞉ dimi ko꞉lo꞉, gio꞉ asulo꞉ nafale o꞉lia꞉, Godeya꞉ to walama꞉no꞉ asulo꞉ a꞉no꞉lo꞉ di ko꞉lo꞉lab. 6 Nililo꞉ Keliso ko꞉lo꞉ gimo꞉lo꞉ wido꞉ a꞉no꞉, gi amio꞉ hendele ege alilaki, halaido꞉ a꞉lab. 7 A꞉la꞉fo꞉ko꞉lo꞉ gio꞉ Alan Ya꞉su Keliso kalab amilo꞉ fa꞉la꞉doma꞉nigab a꞉no꞉ ko꞉lo꞉ yasila꞉lab amio꞉, Godeya꞉ Mama eyo꞉ bobayo꞉ gimo꞉wo꞉ tambo dimia꞉lab ko꞉lo꞉, gi amio꞉ mo꞉kele doma꞉ib.
8 1Tes 3.13,5.23Ya꞉su eyo꞉ gio꞉ halale alita꞉i ha꞉na꞉la꞉ga꞉, henfelo꞉ welo꞉ edaba ta꞉fa꞉ib. A꞉la꞉dimida꞉li ha꞉na꞉la꞉ga꞉yo꞉, Alan Ya꞉su Kelisowa꞉ ho꞉len a꞉namio꞉ gi amio꞉ hala dimido꞉wo꞉ mo꞉ba꞉ba꞉ib. 9 1Tes 5.24,1Yo꞉n 1.3Gode eyo꞉ hendele dimida꞉sen ko꞉lo꞉, elo꞉ sio꞉ a꞉no꞉ tambo ilili alifa꞉ib. A꞉la꞉ta꞉ga꞉ Gode imilise a꞉ma꞉yo꞉ gio꞉ ene so꞉wa Alan Ya꞉su Keliso o꞉lia꞉ doma꞉ki ho꞉ido꞉.
Tilidabu kaluka꞉isaleyo꞉ ko꞉lilo꞉ alobo꞉no꞉
10 Fili 2.2Ni nao nado i, Alan Ya꞉su Kelisowa꞉ wiya ilikiyo꞉, niyo꞉ towo꞉ halaido꞉ gimo꞉ sa꞉ma꞉nigo꞉l. Keliso kaluka꞉isale nol o꞉lia꞉yo꞉ asulo꞉ imilig dowaki, gi usamio꞉ aloba꞉da꞉so꞉bo. Gio꞉ ua dowaki asulo꞉wo꞉ imilise dowa꞉bi. 11 Ni nao i, Koloeya꞉ ayamilo꞉ sa꞉sen nolba꞉yo꞉ nemo꞉wo꞉ gio꞉ gegelebo꞉ towa꞉yo꞉ kega꞉laka꞉ a꞉la꞉sio꞉. 12 Ilig 18.24-28,1Kol 3.4Niyo꞉ gililo꞉ to weaundo꞉ kegakilo꞉ sa꞉lab a꞉no꞉ ko꞉lo꞉ so꞉lo꞉l. Kalu nolba꞉ sa꞉lakiyo꞉, “Ne Fo꞉l kudu ho꞉no꞉l.” Nolba꞉yo꞉, “Ne Abolos kudu ho꞉no꞉l.” Nolba꞉yo꞉, “Ne Bida kudu ho꞉no꞉l.” A꞉la꞉ta꞉ga꞉ nolba꞉yo꞉, “Ne Ya꞉su Keliso kudu ho꞉no꞉l” a꞉la꞉sa꞉la꞉lab. 13 A꞉la꞉do꞉ alobana sa꞉labko, Ya꞉su Kelisowo꞉ usa aloba꞉daki auma꞉ib. Folo꞉ gi asuwa꞉taki i malana aluwa꞉le? A꞉la꞉ta꞉ga꞉ gio꞉ Fo꞉la꞉ wiya ho꞉na to꞉lolo꞉ ko꞉lo꞉ gaida꞉le? A꞉la꞉ba! 14 Ilig 18.8,Lom 16.23Gi us a꞉namio꞉ niyo꞉ kalu a꞉la꞉, Kilisbus o꞉lia꞉ Gaius o꞉lia꞉ a꞉no꞉ko꞉ ho꞉na to꞉lolo꞉. Kaluka꞉isale nolo꞉ niyo꞉ ho꞉n amio꞉ mo꞉to꞉lolo꞉ ko꞉lo꞉, Godemo꞉wo꞉ mada o꞉m a꞉la꞉so꞉lo꞉l. 15 A꞉la꞉go꞉ko꞉lo꞉ kalu noma꞉yo꞉ ne Fo꞉la꞉ wiya ho꞉n amio꞉ a꞉na to꞉lolo꞉ a꞉la꞉bo꞉ mo꞉sa꞉ma꞉ib. 16 1Kol 16.15A, hendele niyo꞉ Stefanasa꞉ eso꞉lo꞉ a꞉no꞉lo꞉ ho꞉na to꞉lolo꞉. Ko꞉sega kalu nolo꞉ niyo꞉ ho꞉na to꞉lolo꞉ a꞉la꞉bo꞉ mo꞉asulo꞉. 17 Mo꞉wo꞉ kaluka꞉isale nolo꞉ niyo꞉ ho꞉na to꞉lola꞉melea꞉ki, Ya꞉su Keliso eyo꞉ ne a꞉na iliga꞉foma. Ko꞉sega eyo꞉ ne ene to nafa a꞉no꞉ ko꞉lo꞉ fanda wida꞉melea꞉ki iliga꞉fo꞉. Niyo꞉ to nafayo꞉ widakiyo꞉, asugdo꞉ di o꞉ngo꞉ dowakiyo꞉ towo꞉ mo꞉wido꞉. Niyo꞉ a꞉la꞉wida꞉li kibo꞉bowo꞉ Ya꞉su Keliso ko꞉lo꞉ i malan amilo꞉ sowo꞉ a꞉ma꞉ halaido꞉wo꞉ o꞉ngo꞉malo꞉ngo꞉ domabe. 18 Lom 1.16Kaluka꞉isale nolo꞉ Ya꞉su e i malana sowo꞉ a꞉la꞉bo꞉ da꞉dakiyo꞉, no꞉nolo꞉ to sa꞉lab a꞉la꞉asulab. Kaluka꞉isale i a꞉no꞉ de hena sulufa꞉ ha꞉nakigab. Ko꞉sega Godeya꞉lo꞉ asuwa꞉takilo꞉ gasilia꞉lab kaluka꞉isale niliyo꞉, Ya꞉su i malan amilo꞉ sowo꞉ a꞉no꞉ Godeya꞉ ene halaido꞉ a꞉ma꞉ go꞉. 19 Ais 29.14Godeya꞉ ene to sa꞉sa꞉lo꞉ amio꞉ a꞉la꞉sio꞉,
“Kaluka꞉isale abeyo꞉ e kailaki asulo꞉ nafaleyo꞉ ne dilo꞉b a꞉la꞉asulalega, Gode eyo꞉ iyo꞉ asulo꞉wo꞉ malo꞉ngo꞉ ta꞉felema꞉ib.
Kaluka꞉isale abeyo꞉ e asugdo꞉ di a꞉la꞉asulalega, ililo꞉ dimidama꞉no꞉ asulab a꞉no꞉ Gode eyo꞉ ka꞉ma꞉ib.”
20 Job 12.17,Ais 19.12, 33.18, 44.25A꞉la꞉fo꞉ko꞉lo꞉ asugdo꞉ di kaluka꞉isale i a꞉no꞉ wagama꞉iba? Mo꞉sa꞉sa꞉ elelo꞉ asulo꞉ kalu i o꞉mo꞉wo꞉lo꞉ waga fa꞉la꞉doma꞉iba? A꞉la꞉ta꞉ga꞉ henfelo꞉ wenamilo꞉ asulo꞉wo꞉ nafa dia꞉sa꞉ga꞉lo꞉ nenelakilo꞉ saeta꞉lowan kalu i a꞉no꞉lo꞉ wagama꞉nigaba꞉le? Asulo꞉ nafayo꞉ henfelo꞉ amilo꞉ di a꞉no꞉ Gode eyo꞉ no꞉nolo꞉ alitaki o꞉ngo꞉malo꞉ngo꞉ ta꞉felo꞉ ko꞉lo꞉lab 21 Madi 11.25Godeya꞉ ene asulo꞉ nafale a꞉ma꞉ togo꞉ we a꞉na dimidalia꞉ difa꞉. Henfelo꞉ kaluka꞉isaleya꞉ ene asulo꞉ a꞉na ilikiyo꞉, Godeyo꞉ mada mo꞉fanda asululia꞉ib. Ko꞉sega kaluka꞉isale abeyo꞉ nililo꞉ to widab a꞉no꞉ tilida꞉dalega, Gode eyo꞉ i a꞉no꞉ asuwa꞉taki gasilia꞉ib. To nililo꞉ widab a꞉no꞉ henfelo꞉ kaluka꞉isaleya꞉yo꞉ o꞉ngo꞉mal a꞉la꞉asulab. 22 Yu kaluka꞉isale iliyo꞉ molo ha꞉na꞉no꞉ ko꞉li ko꞉lilo꞉ a꞉no꞉ ba꞉ba꞉no꞉ asulo꞉, a꞉la꞉ta꞉ga꞉ Gilig kalu iliyo꞉ asulo꞉ nafa o꞉lia꞉ asug nafa o꞉lia꞉yo꞉ ko꞉lo꞉ dia꞉no꞉ kedo꞉. 23 Lom 9.32,1Kol 2.14Ko꞉sega niliyo꞉ Ya꞉su Keliso ko꞉lo꞉ i malan amilo꞉ sowo꞉ a꞉no꞉ wida꞉lo꞉l ko꞉lo꞉, Yu kaluka꞉isale iliyo꞉ to a꞉no꞉ mo꞉beaki mo꞉tilida꞉dab, a꞉la꞉ta꞉ga꞉ Yu kaluka꞉isalema iliyo꞉ a꞉no꞉ madali to sa꞉lab a꞉la꞉asulo꞉. 24 Kolo 2.3Godeya꞉lo꞉ da꞉fea꞉sa꞉ga꞉lo꞉ ho꞉leli kaluka꞉isale nio꞉, nolo꞉ Yu kaluka꞉isale, nolo꞉ Yu kaluka꞉isalema. Ko꞉sega nio꞉ tambo to wido꞉ we tilida꞉da꞉sa꞉ga꞉yo꞉ a꞉la꞉asulo꞉, Keliso e Godeya꞉ ene halaido꞉wo꞉ o꞉m, a꞉la꞉ta꞉ga꞉ asug nafaleyo꞉ mo꞉wo꞉ E. 25 2Kol 13.4Henfelo꞉ kaluwa꞉yo꞉ Godeya꞉ ene asulo꞉ a꞉no꞉ o꞉ngo꞉ma a꞉la꞉asula꞉sen. Ko꞉sega Godeya꞉ ene asulo꞉ a꞉ma꞉yo꞉ henfelo꞉ amilo꞉ asugdo꞉ di fa꞉la꞉dowab a꞉no꞉ tininila꞉ ko꞉lo꞉lab. A꞉la꞉ta꞉ga꞉ henfelo꞉ kaluwa꞉yo꞉ Godeya꞉lo꞉ dimido꞉ a꞉no꞉ halaido꞉lo꞉ma a꞉la꞉asula꞉sen ko꞉sega, Godeya꞉lo꞉ dimido꞉ a꞉ma꞉yo꞉ henfelo꞉ kaluwa꞉ halaido꞉ a꞉no꞉ tininila꞉ ko꞉lo꞉lab.
26 Madi 11.25,Ya꞉m 2.5Ni nao nado i, Gode eyo꞉ gio꞉ o꞉ho꞉lema꞉no꞉ amio꞉, gio꞉ tamin amio꞉ kalu o꞉bo꞉ngo꞉ elena꞉le asuluma. Henfelo꞉ kaluwa꞉ siwa꞉l amio꞉, gio꞉ asulo꞉lo꞉ di kaluwo꞉ modo꞉lo꞉ mo꞉elen. Gio꞉ halaido꞉lo꞉ bo꞉fo꞉lowan kaluwo꞉ modo꞉lo꞉ mo꞉dowo꞉. A꞉la꞉ta꞉ga꞉ gio꞉ wilo꞉ di kaluwo꞉ modo꞉lo꞉ mo꞉fa꞉la꞉dowo꞉. 27 Ko꞉sega Gode eyo꞉ henfelo꞉ wenamilo꞉ asulo꞉lo꞉ di kalu a꞉no꞉ ko꞉lo꞉ sendeloma꞉kiyo꞉, henfelo꞉ kaluwa꞉ siwa꞉l amilo꞉ asulo꞉lo꞉ mo꞉di kalu a꞉lab a꞉no꞉ ko꞉lo꞉ da꞉fe alita꞉sen. Gode eyo꞉ henfelo꞉ wenamilo꞉ halaido꞉lo꞉ bo꞉fo꞉lowan kalu a꞉no꞉ sendeloma꞉kiyo꞉, halaido꞉lo꞉ma kalu a꞉no꞉ ko꞉lo꞉ da꞉fe alita꞉sen. 28 Gode eyo꞉ henfelo꞉ wenamilo꞉ wilo꞉ma kaluka꞉isale o꞉lia꞉, wa꞉feyo꞉ kaluka꞉isale o꞉lia꞉, kaluka꞉isale o꞉ngo꞉malo꞉ o꞉ngo꞉ ba꞉dab a꞉no꞉ ko꞉lo꞉ dia꞉sen. Kaluka꞉isale i a꞉na a꞉la꞉ta꞉ga꞉yo꞉, Gode eyo꞉ wilo꞉ kalu a꞉no꞉ sana to꞉lolaki, o꞉ngo꞉malo꞉ngo꞉ ta꞉ta꞉sen. 29 A꞉fe 2.9A꞉la꞉go꞉ko꞉lo꞉ kaluka꞉isale imilig noma꞉yo꞉ Godeya꞉ siwa꞉l amio꞉ enen wiyo꞉ mo꞉wabulu sa꞉ma꞉ib. 30 Jer 23.5-6Gio꞉ Ya꞉su Keliso amilo꞉ dowab a꞉no꞉, Gode enen go꞉. Gode eyo꞉ Ya꞉su Keliso e nili asulo꞉ nafale mo꞉wo꞉ e ta꞉fo꞉. Ya꞉su Keliso eyo꞉ nio꞉ Godeya꞉ siwa꞉l amio꞉ digalo꞉ kalu doma꞉ki ta꞉fo꞉. Eyo꞉ nio꞉ Godeya꞉ ene malilo꞉ kaluka꞉isale doma꞉ki ta꞉fo꞉. A꞉la꞉ta꞉ga꞉ nio꞉ man mogago꞉ usamilo꞉ eleno꞉, Ya꞉su Keliso e sili alifa꞉. 31 Jer 9.24A꞉la꞉fo꞉ko꞉lo꞉ Godeya꞉ to amio꞉ a꞉la꞉sa꞉sa꞉lo꞉, “Kalu abeyo꞉ sagala꞉liki to sa꞉ma꞉no꞉ asulab a꞉no꞉, Kalu Alana꞉ wiyo꞉ ko꞉lo꞉ duludakiyo꞉, towo꞉ sagala꞉liki sa꞉la꞉bi.”