1 Ya꞉su e ha꞉na꞉ga꞉ ha꞉nakiyo꞉, kalu nowo꞉ anowa꞉yo꞉ e siyo꞉ ko꞉n sa꞉la꞉li ko꞉lo꞉ a꞉na elena ba꞉ba꞉. 2 Ese 18.20,Luk 13.2,4Ya꞉suwa꞉ enedo꞉ tili wida꞉sen kalu iliyo꞉ emo꞉wo꞉ a꞉la꞉dabu ba꞉ba꞉, “Widan kalu, kalu siyo꞉ ko꞉n ko꞉lo꞉ sa꞉la꞉li we wangabiki go꞉wa꞉le? Mogago꞉wo꞉ abe dimido꞉wo꞉? Ene dimido꞉wa꞉le, mo꞉ iya o꞉lia꞉ anolia꞉ma꞉ dimido꞉wa꞉le?” 3 Yo꞉n 11.4Ya꞉su eyo꞉ a꞉ma꞉la꞉bo꞉ a꞉la꞉sio꞉, “Kalu wema꞉ ene mogago꞉ dimido꞉ a꞉namima. A꞉la꞉ta꞉ga꞉ iyalia꞉ anolia꞉ma꞉lo꞉ mogago꞉ dimido꞉ a꞉namima. Ko꞉sega Godeya꞉ ene nanog halaido꞉ a꞉no꞉ eya a꞉la꞉ta꞉ga꞉yo꞉ kalaba walama꞉kiyo꞉, kalu we siyo꞉ ko꞉n sa꞉la꞉li. 4 Ho꞉leno꞉ o꞉lab wenamio꞉, niliyo꞉ nelo꞉ iliga꞉fo꞉ kalu a꞉ma꞉ ene nanogo꞉ a꞉na dimidama꞉niki. Sololiyo꞉ fa꞉la꞉doma꞉nigab ko꞉lo꞉ kalu imilig noma꞉yo꞉ nanogo꞉ a꞉namio꞉ mo꞉dimidama꞉ib. 5 Madi 5.14,Yo꞉n 8.12Ne henfelo꞉ wenamilo꞉ o꞉a꞉lab a꞉namio꞉, henfelo꞉ wema꞉ ho꞉leno꞉ ne.”

6 Mak 8.23Eyo꞉ to a꞉no꞉ sa꞉la꞉sa꞉ga꞉yo꞉, hena kodofela꞉sa꞉ga꞉, hen o꞉lia꞉ wo꞉gela꞉sa꞉ga꞉, isigo꞉ fa꞉la꞉dowab a꞉no꞉ kalu a꞉ma꞉ siya halifa꞉. 7 A꞉la꞉ta꞉ga꞉ kalu emo꞉ sa꞉laki, “Ge ha꞉na꞉sa꞉ga꞉ Siloam ho꞉n golo꞉ a꞉na siyo꞉ hama꞉ni hamana.” Siloam a꞉la꞉do꞉ sa꞉lab a꞉ma꞉ ha꞉go꞉ we, iliga꞉fo꞉. A꞉la꞉fo꞉ko꞉lo꞉ kalu a꞉no꞉ ha꞉na꞉sa꞉ga꞉yo꞉, isigo꞉wo꞉ hala꞉sa꞉ga꞉ a꞉ma꞉la꞉ yakiyo꞉ o꞉li ba꞉da꞉i mio꞉.

8 Kalu a꞉ma꞉ ene iasi kaluka꞉isale o꞉lia꞉ elo꞉ tamin amilo꞉ molelo꞉ ha꞉iya꞉labikilo꞉ ba꞉da꞉sen i o꞉lia꞉ma꞉yo꞉ sasandeakiyo꞉ a꞉la꞉sio꞉, “Tamin wena silikilo꞉ molelo꞉ ha꞉iya꞉seno꞉, kalu weya꞉le?” 9 Kalu nolba꞉yo꞉ “Welo꞉ka꞉.” Nolba꞉yo꞉ “Ema. Misido꞉wo꞉ e o꞉ngo꞉ ba꞉ba꞉.” Ko꞉sega kalu a꞉ma꞉ eneno꞉ halale sa꞉laki, “Ko neka꞉” a꞉la꞉sio꞉.

10 A꞉la꞉fo꞉ko꞉lo꞉ iliyo꞉ emo꞉wo꞉ a꞉la꞉dabu ba꞉ba꞉, “Ge wa꞉kabilo꞉ ba꞉dako꞉ waigo꞉wo꞉?” 11 Eyo꞉ a꞉la꞉sio꞉, “Kalu Ya꞉su a꞉la꞉do꞉ sa꞉la꞉sen a꞉ma꞉yo꞉ isigo꞉wo꞉ dia꞉sa꞉ga꞉, ni siya halita꞉sa꞉ga꞉yo꞉, nemo꞉ sa꞉lakiyo꞉, ‘Ge ha꞉na꞉sa꞉ga꞉ Siloam ho꞉n a꞉namio꞉ siyo꞉ hama꞉ni hamana’ a꞉la꞉sio꞉. A꞉la꞉fo꞉ko꞉lo꞉ ne ha꞉na꞉ga꞉ a꞉na hala꞉sa꞉ga꞉yo꞉, niyo꞉ o꞉li ba꞉ba꞉.” 12 A꞉la꞉sa꞉labiki iliyo꞉ emo꞉wo꞉ a꞉la꞉dabu ba꞉ba꞉, “Kalu a꞉no꞉ o꞉ba saba?” A꞉la꞉sa꞉labiki, “Ne babalab” a꞉la꞉sio꞉.

13 Kaluka꞉isale iliyo꞉ kalu siyo꞉ ko꞉n elen ko꞉lo꞉ wa꞉kabilo꞉ ba꞉dab a꞉no꞉ Fa꞉lisi kalu ilo꞉wa tililia꞉gane. 14 Ya꞉suwa꞉lo꞉ isigo꞉wo꞉ dimida꞉sa꞉ga꞉lo꞉ siyo꞉ ko꞉n kalulo꞉ falele alifa꞉ a꞉no꞉, Ha꞉fo꞉lo꞉ Dowan ho꞉len a꞉na dimido꞉. 15 A꞉la꞉fo꞉ko꞉lo꞉ Fa꞉lisi kalu iliyo꞉lo꞉ kalu siyo꞉ ko꞉n elen emo꞉wo꞉, “Ge ba꞉dako꞉ waga falelo꞉wo꞉?” A꞉la꞉dabu ba꞉dabiki, eyo꞉ a꞉la꞉sio꞉, “Eyo꞉ isigo꞉wo꞉ ni siya halifa꞉ ko꞉lo꞉, niyo꞉ ho꞉na hala꞉sa꞉ga꞉yo꞉, o꞉go꞉ ne o꞉li bo꞉do꞉l.” 16 Fa꞉lisi kalu nolba꞉yo꞉ a꞉la꞉sio꞉, “Kalu ko Ha꞉fo꞉lo꞉ Dowan ho꞉len amilo꞉ ele difa꞉ a꞉no꞉ e o꞉go꞉so꞉ ko꞉lo꞉, e Godelo꞉wa a꞉la꞉ta꞉ga꞉ mio꞉malo꞉b.” Ko꞉sega nolba꞉yo꞉ a꞉la꞉sio꞉, “Mogago꞉lo꞉ dimida꞉sen kalu eyo꞉ molo ha꞉na꞉no꞉ o꞉leo꞉ngo꞉wo꞉ mada mo꞉dimidama꞉ib.” A꞉la꞉ nenelakiyo꞉, iyo꞉ usa alobo꞉no꞉. 17 Yo꞉n 4.19Iliyo꞉ a꞉la꞉nenela꞉sa꞉ga꞉yo꞉, kalu siyo꞉ ko꞉n tamin amilo꞉ elen emo꞉wo꞉ a꞉la꞉dabu ba꞉ba꞉, “Kalu gi silo꞉ falele alifa꞉ ko, giyo꞉ e o꞉b a꞉la꞉asulaya?” A꞉la꞉dabu ba꞉dabiki, eyo꞉ imo꞉wo꞉ a꞉ma꞉la꞉ sa꞉laki, “E dinali sa꞉lan kalu” a꞉la꞉sio꞉.

18 Ko꞉sega Yu misa꞉ kalu iliyo꞉, kalu a꞉no꞉ siyo꞉ ko꞉n elen ko꞉lo꞉ wa꞉kabiyo꞉ o꞉li ba꞉dab a꞉la꞉bo꞉ mo꞉tili asulabiki, iliyo꞉ iya o꞉lia꞉ anolia꞉mo꞉wo꞉ dabu ba꞉ba꞉niki, towo꞉ saga꞉fo꞉. 19 A꞉la꞉yo꞉ a꞉na fa꞉la꞉dowabikiyo꞉, Yu kalu iliyo꞉ a꞉la꞉mo꞉wo꞉ a꞉la꞉dabu ba꞉ba꞉, “Gaindo꞉ sa꞉lakilo꞉ so꞉wa we siyo꞉ ko꞉n ko꞉lo꞉ sa꞉la꞉lika꞉ a꞉la꞉do꞉ sio꞉wo꞉, kalu weyo꞉? E o꞉go꞉ o꞉lilo꞉ a꞉ba꞉dab we waga go꞉wa꞉le?” 20 A꞉la꞉ma꞉yo꞉ a꞉ma꞉la꞉ sa꞉laki, “Kalu we hendele nani so꞉wale ko꞉lo꞉ a꞉lab. A꞉la꞉ta꞉ga꞉ e siyo꞉ ko꞉n ko꞉ngo꞉ sa꞉la꞉li a꞉la꞉bo꞉ na꞉no꞉ asulo꞉l. 21 Ko꞉sega e siyo꞉ ko꞉n elendo꞉ falele alifa꞉ a꞉no꞉ waga go꞉wa꞉le na꞉no꞉ babalab. A꞉la꞉ta꞉ga꞉ kalu abeya꞉le elo꞉ falele alifa꞉ a꞉no꞉lo꞉ na꞉no꞉ babalab. E kalu alan dowo꞉ ko꞉lo꞉ eneno꞉ o꞉li fanda sa꞉ma꞉ib. Giliyo꞉ enebo꞉ dabu bo꞉ba” a꞉la꞉sio꞉. 22 Tamin amio꞉ Yu misa꞉ kalu ili sa꞉lakiyo꞉, “Kaluka꞉isale abeyo꞉ Ya꞉su e Godeya꞉lo꞉ Da꞉feyo꞉ kaluwo꞉ o꞉m a꞉la꞉sa꞉lalega, niliyo꞉ kalu a꞉no꞉ gulugululan ayamio꞉ ha꞉la꞉ya ta꞉fa꞉no꞉” a꞉la꞉saefa꞉. A꞉la꞉go꞉ko꞉lo꞉ Yu kaluwa꞉ to saefa꞉ a꞉no꞉ tagilaki, a꞉la꞉ma꞉yo꞉ to a꞉no꞉ a꞉na sio꞉. 23 A꞉la꞉fo꞉ko꞉lo꞉ a꞉la꞉yo꞉ tagio꞉ alan dowabiki, a꞉la꞉ma꞉ sa꞉laki “E kalu alan dowo꞉ ko꞉lo꞉ enebo꞉ dabu bo꞉ba,” a꞉la꞉sio꞉. 24 A꞉la꞉go꞉ko꞉lo꞉ Yu kalu iliyo꞉ kalu siyo꞉ ko꞉n elen a꞉no꞉ wa꞉ka mena꞉ki saga꞉ta꞉sa꞉ga꞉ fa꞉la꞉dowabikiyo꞉, emo꞉wo꞉ a꞉la꞉sio꞉, “Giyo꞉ to hendele sa꞉ma꞉no꞉ a꞉lakiyo꞉, Godeya꞉ siwa꞉l amio꞉ dinali sama. Kalu gilo꞉ sa꞉lab ko, e mogago꞉lo꞉ dimida꞉sen kalu a꞉la꞉bo꞉ niliyo꞉ asulufo꞉lo꞉l.” 25 A꞉la꞉sa꞉labiki kalu a꞉ma꞉yo꞉ a꞉ma꞉la꞉bo꞉ a꞉la꞉sio꞉, “E kalu mogago꞉lo꞉ dimida꞉sen o꞉ma꞉le mo꞉ o꞉mbala꞉le, ne mo꞉fanda asulo꞉. Ko꞉sega kelego꞉ imilise nilo꞉ fanda asulab a꞉no꞉ we. Tamin amio꞉ ne sio꞉ ko꞉n elen ko꞉sega, o꞉go꞉ ne o꞉li bo꞉do꞉l.”

26 Iliyo꞉ emo꞉wo꞉ a꞉la꞉dabu ba꞉ba꞉, “Eyo꞉ gemo꞉wo꞉ waga dimidabeyo꞉? Gi si ko waga falele alitabeyo꞉?” 27 A꞉la꞉dabu ba꞉dabiki, kalu a꞉ma꞉yo꞉ a꞉la꞉sio꞉, “Niyo꞉ tamin amio꞉ gimo꞉wo꞉ sio꞉ ko꞉sega giliyo꞉ mo꞉dinafa dabulo꞉b. Gio꞉ wa꞉kabiyo꞉ waga da꞉ba꞉nigaya? Gio꞉lo꞉ enedo꞉ tiliwida꞉sen kalu doma꞉no꞉ asulaya?” 28 A꞉la꞉sa꞉labiki iliyo꞉ e dio꞉ge sa꞉laki a꞉la꞉sio꞉, “Ge kalu koma꞉lo꞉ tiliwido꞉ kaluwo꞉ ge. Ko꞉sega nio꞉ Mo꞉sa꞉s elo꞉ tiliwida꞉sen kaluwo꞉ ni ko꞉lo꞉ o꞉lo꞉l. 29 Niliyo꞉ Gode eyo꞉ towo꞉ Mo꞉sa꞉sbo꞉ sio꞉ a꞉la꞉asulo꞉. Ko꞉sega kalu we, e o꞉ba a꞉la꞉ta꞉ga꞉ mio꞉wa꞉le nio꞉ babalab.” 30 A꞉la꞉sa꞉labiki kalu a꞉ma꞉yo꞉ a꞉la꞉sio꞉, “Wai, gililo꞉ babale dowab ko, ne molo asulo꞉l. Kalu koma꞉yo꞉ ni siyo꞉ falele alifa꞉ ko꞉sega, giliyo꞉ e o꞉ba a꞉la꞉ta꞉ga꞉ mio꞉wa꞉le a꞉la꞉bo꞉ mo꞉fanda asulab. 31 Song 34.15Nio꞉ tambowa꞉yo꞉ a꞉la꞉asulab. Gode eyo꞉ mogago꞉lo꞉ dimida꞉sen kaluwa꞉lo꞉ to sa꞉lab a꞉no꞉ mo꞉da꞉da꞉sen. Ko꞉sega kalu abeyo꞉ Godeyo꞉ wabudaki, elo꞉ asulab aundo꞉ kudu ha꞉na꞉lab a꞉no꞉, Gode eyo꞉ kalu a꞉ma꞉lo꞉ to sa꞉lab a꞉no꞉ ko꞉lo꞉ da꞉da꞉sen. 32 Henfelo꞉ welo꞉ mo꞉mo꞉da fa꞉la꞉dowo꞉ a꞉na a꞉la꞉ta꞉ga꞉lo꞉ mio꞉wo꞉, o꞉g wenamio꞉lo꞉ kalu sio꞉ ko꞉n ko꞉lo꞉ sa꞉la꞉li a꞉no꞉, kalu noma꞉lo꞉ falele alifa꞉ malolo꞉wo꞉ mada mo꞉dabu. 33 Kalu we Godelo꞉wa a꞉la꞉ta꞉ga꞉ mio꞉ma kibo꞉bowo꞉, eyo꞉ nanog imilig nowo꞉ mada mo꞉dimidamabe.”

34 Song 51.5A꞉la꞉sa꞉labiki Yu misa꞉ kalu iliyo꞉ a꞉la꞉sio꞉, “Ge go꞉wa꞉lo꞉ sa꞉la꞉li ho꞉len a꞉na a꞉la꞉ta꞉ga꞉ mio꞉wo꞉, ge mogago꞉wo꞉ mada dimida꞉len ko꞉lo꞉lab. Kalu ge o꞉ngo꞉ma꞉yo꞉ nimo꞉wo꞉ ka widano꞉?” A꞉la꞉sa꞉lakiyo꞉ iliyo꞉ inido꞉ wida꞉sen a a꞉namio꞉ mo꞉doma꞉ki, e ha꞉la꞉ya o꞉luga꞉fo꞉.

35 Yu misa꞉ kalu ililo꞉ kalu a꞉no꞉ ko꞉lo꞉ o꞉lusanaga꞉fo꞉ malolo꞉ a꞉no꞉ Ya꞉su e dabu ko꞉lo꞉, e ha꞉na꞉sa꞉ga꞉ kalu a꞉no꞉ galiliakiyo꞉ emo꞉wo꞉ a꞉la꞉sio꞉, “Ge Kalule Dowo꞉ a꞉namio꞉ tilidabuwo꞉?” 36 A꞉la꞉dabu ba꞉dabiki, eyo꞉ a꞉ma꞉la꞉bo꞉ a꞉la꞉sio꞉, “Ne e amio꞉ tili da꞉ba꞉niki, giyo꞉ nemo꞉wo꞉ kalu weka꞉ a꞉la꞉bo꞉ walama.” 37 Ya꞉su eyo꞉ kalu o꞉mo꞉ sa꞉laki, “Ge kalu a꞉no꞉ o꞉ma ba꞉ba꞉ ko꞉lo꞉lab. A꞉la꞉ta꞉ga꞉ kalu ge o꞉lia꞉lo꞉ to꞉la꞉labo꞉ o꞉m” a꞉la꞉sio꞉. 38 Kalu a꞉ma꞉yo꞉ a꞉la꞉sio꞉, “Alan, ne mada tili do꞉do꞉l” a꞉la꞉sa꞉lakiyo꞉ e gulalu misa꞉fu asifo꞉liki, Ya꞉suwa꞉ wiyo꞉ wabudaki dulugu sio꞉.

39 Ya꞉su eyo꞉ a꞉la꞉sio꞉, “Ne henfelo꞉ wenamilo꞉ mio꞉wo꞉ mo꞉wo꞉ we. Niyo꞉ kaluka꞉isaleyo꞉ aloba꞉dakiyo꞉, siyo꞉ ko꞉n elen a꞉no꞉ o꞉li a꞉bo꞉ba꞉ki, a꞉la꞉ta꞉ga꞉ kaluka꞉isale ba꞉da꞉likilo꞉ elen a꞉no꞉ siyo꞉ ko꞉n doma꞉ki, ne a꞉na mio꞉.” 40 Madi 15.14Fa꞉lisi kalu Ya꞉suwa꞉ anib amilo꞉ kagafo꞉len iliyo꞉ to a꞉no꞉ da꞉da꞉sa꞉ga꞉yo꞉, emo꞉wo꞉ a꞉la꞉sio꞉, “Giyo꞉ nio꞉lo꞉ sio꞉ ko꞉n ko꞉lo꞉ a꞉lab a꞉la꞉li sa꞉laya?” 41 A꞉la꞉dabu ba꞉dabiki, Ya꞉su eyo꞉ a꞉la꞉sio꞉, “Gio꞉ siyo꞉ ko꞉n dowo꞉ kibo꞉bowo꞉, gili mogago꞉ dimida꞉len a꞉no꞉ aundo꞉ma domabe. Ko꞉sega gili sa꞉lakiyo꞉, ‘nio꞉ o꞉li bo꞉do꞉l’ a꞉la꞉sa꞉lab ko꞉lo꞉, mogago꞉ ginido꞉wo꞉ o꞉da꞉lab.”