1 Madi 7.1-2,Yo꞉n 8.7A꞉la꞉fo꞉ko꞉lo꞉ gio꞉ kalu nolba꞉ man ko꞉lo꞉ aloba꞉da꞉lab a꞉no꞉, go꞉no꞉n ge ko꞉lo꞉ a꞉sili alifa꞉no꞉wo꞉ togo꞉ aundo꞉ma ko꞉lo꞉lab. Gio꞉ kalu nolo꞉ mogago꞉ dimido꞉ ko꞉lo꞉ falasilo꞉wo꞉ dima꞉ki a꞉la꞉sa꞉lalega, go꞉no꞉ndo꞉ falasilo꞉ dia꞉no꞉ a꞉no꞉ ko꞉lo꞉ da꞉feaki gab. Mo꞉wo꞉ man ililo꞉ dimido꞉ a꞉no꞉ giliyo꞉lo꞉ dimida꞉sen ko꞉lo꞉lab. 2 Gode eyo꞉ kaluka꞉isale man o꞉ngo꞉lo꞉ dimida꞉lab a꞉no꞉ mo꞉walilab amio꞉, niliyo꞉ eyo꞉ man digalo꞉ kudu ha꞉naki mo꞉walilab a꞉la꞉asulo꞉. 3 Ge kaluka꞉isale nolo꞉ aloba꞉dab a꞉namio꞉, go꞉no꞉n gelo꞉ man o꞉leo꞉ngo꞉wo꞉ dimida꞉lab ko꞉lo꞉, Godeya꞉lo꞉ wa꞉deab a꞉namio꞉ ge sili alifa꞉nigab a꞉la꞉bo꞉ ge asulaya? Wa꞉deabdo꞉ ho꞉len a꞉namio꞉ ge mo꞉sili alifa꞉ib. 4 A꞉fe 1.7,2Bid 3.15Gode eyo꞉ kaluka꞉isaleyo꞉ ha꞉fo꞉ disa꞉lakiyo꞉, ha꞉sa iliki yasila꞉lab ko꞉sega, giyo꞉ man nafa elo꞉ a꞉no꞉ gola ba꞉daya? Gode eyo꞉ ge asulo꞉wo꞉ nodoma꞉kiyo꞉ gemo꞉wo꞉ ha꞉fo꞉wo꞉ disa꞉fo꞉ko꞉lab. A꞉la꞉bo꞉ ge mo꞉asulaya?

5 Ko꞉sega gi asulo꞉wo꞉ halaido꞉le dowaki, Gode amio꞉ mo꞉nodoma꞉no꞉ a꞉lab ko꞉lo꞉, a꞉la꞉do꞉ gab a꞉namio꞉ gililo꞉ wa꞉l dia꞉no꞉wo꞉ modo꞉ dibida꞉i fa꞉la꞉ndab. Godeya꞉lo꞉ digalelo꞉ mo꞉walilab ho꞉len a꞉namio꞉, gadio꞉ elo꞉wo꞉ kalaba fa꞉la꞉dowakiyo꞉, ge a꞉na fanda bo꞉ba꞉kiyo꞉, wa꞉lo꞉ mogago꞉ dimia꞉ib. 6 Song 62.12,Sndn 24.12, Madi 16.27, 2Kol 5.10Gode eyo꞉ kaluka꞉isaleyo꞉ mo꞉walila꞉sa꞉ga꞉ wa꞉l dimiakiyo꞉, man inido꞉ dimida꞉len o꞉leau dimia꞉ib. 7 Kaluka꞉isale abeyo꞉ nanogo꞉ nafa halale dimida꞉i ha꞉na꞉lalikiyo꞉, wi alan dia꞉no꞉ o꞉lia꞉ ko꞉ngo꞉ mela꞉no꞉ a꞉no꞉lia꞉yo꞉ keda꞉ikilo꞉ ha꞉nab o꞉mo꞉wo꞉, Gode eyo꞉ ko꞉ngo꞉ mela꞉no꞉wo꞉ dimia꞉ib. 8 2Tes 1.8Ko꞉sega kaluka꞉isale abeyo꞉ enedo꞉ asulab au kudu ha꞉nakiyo꞉, to hendele a꞉no꞉ gola ba꞉daki, man mogago꞉lo꞉ kudu ha꞉nab a꞉no꞉, Gode eyo꞉ iyo꞉ wa꞉deakiyo꞉, ene kulufa꞉yo꞉ o꞉lia꞉ gadio꞉ o꞉lia꞉yo꞉ imo꞉ dimia꞉ib.

9 Hida꞉yo꞉ alan o꞉lia꞉ nagalo꞉ alan o꞉lia꞉yo꞉ kaluka꞉isale tambo man mogago꞉lo꞉ dimida꞉lab ilo꞉wa fa꞉la꞉doma꞉ib. Hida꞉yo꞉ a꞉no꞉ Yu kaluka꞉isalelo꞉ amio꞉ tamina fa꞉la꞉doma꞉ib, a꞉la꞉ta꞉ga꞉ a꞉ma꞉ fa꞉s amio꞉ Yu kaluka꞉isalema ilo꞉ amio꞉lo꞉ fa꞉la꞉doma꞉ib. 10 Ko꞉sega Gode eyo꞉ kaluka꞉isale tambo man nafalo꞉ dimida꞉lab a꞉no꞉ wabulu sa꞉lakiyo꞉ iwalu dulugu alita꞉ga꞉, iyo꞉ ha꞉sa mesea꞉ki ta꞉fa꞉ib. Godeya꞉lo꞉ man dimidama꞉no꞉ a꞉no꞉, Yu kaluka꞉isalelo꞉ amio꞉ tamina fa꞉la꞉doma꞉ib, a꞉la꞉ta꞉ga꞉ a꞉ma꞉ fa꞉s amio꞉ Yu kaluka꞉isalema ilo꞉ amio꞉lo꞉ fa꞉la꞉doma꞉ib. 11 Mo꞉wo꞉ Gode eyo꞉ kaluka꞉isaleyo꞉ mo꞉walilakiyo꞉, man imilig a꞉naka iliki, tambo imilo꞉ aloba꞉ma꞉ib.

12 Yu kaluka꞉isalema iyo꞉ Godeya꞉ ele saefa꞉ a꞉no꞉ mo꞉asulo꞉ elen ko꞉sega, iyo꞉ mogago꞉ dimidab a꞉namio꞉, Gode eyo꞉ iyo꞉lo꞉ falasila꞉ma꞉ib. Ko꞉sega ele difa꞉ a꞉ma꞉ aloba꞉dakiyo꞉ mo꞉falasila꞉ma꞉ib. A꞉la꞉ta꞉ga꞉ Yu kaluka꞉isale iliyo꞉ Godeya꞉ ele saefa꞉ a꞉no꞉ dia꞉ga꞉ asululi ko꞉lo꞉, iliyo꞉ man mogago꞉ dimidab a꞉namio꞉, Godeya꞉ ene ele saefa꞉ a꞉na ilikiyo꞉, iyo꞉lo꞉ aloba꞉daki falasila꞉ma꞉ib. 13 Kaluka꞉isale abeyo꞉ ele saefa꞉lo꞉ mo da꞉da꞉lab a꞉no꞉, Godeya꞉ siwa꞉l amio꞉ digalo꞉wo꞉ mo꞉fa꞉la꞉doma꞉ib. Ko꞉sega kaluka꞉isale abeyo꞉ ele saefa꞉yo꞉ tilida꞉dakilo꞉ kudu ha꞉na꞉lab a꞉no꞉, Gode eyo꞉ iyo꞉ digalo꞉ kaluka꞉isale a꞉la꞉sa꞉ma꞉ib. 14 Ilig 10.35Yu kaluka꞉isalema iyo꞉ Godeya꞉ ele saefa꞉ a꞉no꞉ mo꞉dabu elen. Ko꞉sega man ililo꞉ kudu ha꞉nakilo꞉ dimidan a꞉no꞉ eleyo꞉ o꞉ngo꞉ dowaki, Godeya꞉ ele saefa꞉ a꞉no꞉lia꞉yo꞉ imilo꞉ dowab ko꞉lo꞉, iliyo꞉ man mogago꞉ o꞉lia꞉ man digalo꞉ o꞉lia꞉yo꞉ o꞉li aloba꞉ma꞉no꞉ a꞉la꞉widakigab. 15 Iliyo꞉ a꞉la꞉dimidab amio꞉, Godeya꞉ ele saefa꞉ a꞉no꞉ ili asulo꞉ usamio꞉ o꞉ma elen a꞉la꞉widakigab. Iliyo꞉ man mogago꞉ dimidakiyo꞉, iyo꞉ sendelowa꞉sen. A꞉la꞉ta꞉ga꞉ man digalo꞉ dimidakiyo꞉, iyo꞉ sagala꞉sen ko꞉lo꞉, man a꞉la꞉ a꞉ma꞉yo꞉lo꞉ Godeya꞉ towo꞉ ili asulo꞉ amio꞉ delen a꞉la꞉widakigab. 16 Ya꞉su Keliso eyo꞉ Godeya꞉ halaido꞉wa iliki, kaluka꞉isaleya꞉ asulo꞉ usamilo꞉ wo꞉no꞉lelo꞉ delen a꞉no꞉ kalaba mo꞉walilima꞉ib ko꞉lo꞉, o꞉g ho꞉len a꞉namio꞉, man a꞉no꞉ kalaba fa꞉la꞉doma꞉ib. To nafa nilo꞉ wida꞉sen a꞉ma꞉yo꞉ a꞉la꞉sio꞉.

17 Gi us amio꞉ kaluka꞉isale nolba꞉yo꞉ ginina꞉ma꞉la꞉ kailakiyo꞉ a꞉la꞉sio꞉, “Ne Yu kalu ko꞉lo꞉, Godeya꞉ ele saefa꞉ a꞉na halale kagafo꞉liki, ne Gode o꞉lia꞉ mada ege dofo꞉lo꞉l” a꞉la꞉sio꞉. 18 Giliyo꞉ ele saefa꞉ a꞉no꞉ agela꞉sa꞉ga꞉ asululi ko꞉lo꞉, Godeya꞉lo꞉ gimo꞉lo꞉ dimidama꞉kilo꞉ sio꞉ a꞉no꞉ fanda asululiakiyo꞉, man we digalo꞉lo꞉b a꞉la꞉bo꞉ alobana asulab. 19-20 2Tim 3.5Gi sa꞉lakiyo꞉, “Niyo꞉ Godeya꞉ ele saefa꞉ a꞉no꞉ di ko꞉lo꞉, ne to hendeyo꞉ tambo asululi” a꞉la꞉sio꞉. Giyo꞉ a꞉la꞉asulakiyo꞉, siyo꞉ ko꞉ndo꞉ tililia꞉ ha꞉na꞉no꞉wo꞉ ge, a꞉la꞉ta꞉ga꞉ kaluka꞉isale sololi amilo꞉ sab a꞉ma꞉ ho꞉leno꞉ ge, a꞉la꞉bo꞉ asulab. Man digalo꞉lo꞉ mo꞉asulo꞉ o꞉lo꞉ fanda walama꞉no꞉wo꞉ ge, a꞉la꞉ta꞉ga꞉ babale dowo꞉ kaluka꞉isalelo꞉ tili walama꞉no꞉wo꞉ ge, a꞉la꞉asulab. 21 Madi 23.3-4A꞉la꞉fo꞉ko꞉lo꞉ a꞉la꞉bo꞉ go꞉no꞉no꞉ asulakiyo꞉, kaluka꞉isale nolo꞉ wido꞉lalega, go꞉no꞉na꞉ma꞉la꞉yo꞉ mo꞉widako mo꞉wo꞉ ha꞉? Giliyo꞉ “kelego꞉wo꞉ afalebo꞉ dia꞉so꞉bo!” a꞉la꞉bo꞉ wida꞉likiyo꞉, go꞉no꞉no꞉lo꞉ afayo꞉ dia꞉leya? 22 Giliyo꞉ “uwo꞉ dia꞉so꞉bo” a꞉la꞉bo꞉ wida꞉likiyo꞉, go꞉no꞉n gelo꞉ uwo꞉ dia꞉leya? Giyo꞉ widakiyo꞉, madali gode dagiya꞉lo꞉ dimido꞉ a꞉no꞉ mada mogago꞉ a꞉la꞉widab, ko꞉sega ge madali godemo꞉lo꞉ gulugululan aya ha꞉na꞉ga꞉yo꞉, kelego꞉ a꞉namilo꞉ a꞉no꞉ gi afale dia꞉ga꞉ a gilo꞉wa dia꞉fo꞉leya? 23 Ge Godeya꞉ ele saefa꞉ya dowakiyo꞉, go꞉no꞉na꞉ma꞉la꞉yo꞉ kailab ko꞉sega, ge ele a꞉no꞉ o꞉go꞉saki, Godeya꞉ wiyo꞉ wa꞉la sa꞉nda꞉leya? 24 Ais 52.5Bugo꞉ amio꞉ Godeya꞉ towo꞉ a꞉la꞉sa꞉sa꞉lo꞉ ko꞉lo꞉lab, “Gililo꞉ man dimidan a꞉na ilikiyo꞉, Yu kaluka꞉isalema iliyo꞉ Godeya꞉ wiyo꞉ dio꞉ge sa꞉la꞉sen.”

25 Godeya꞉ eleyo꞉ gio꞉ tilida꞉daki kudu ha꞉na꞉labo꞉lalega, do꞉go꞉fo꞉ hege gedeo꞉ man a꞉no꞉ hendeleyo꞉ o꞉m a꞉la꞉widakigab. Ko꞉sega gio꞉ eleyo꞉ mo꞉kudu ha꞉naki o꞉go꞉sa꞉labo꞉lalega, gio꞉ do꞉go꞉fo꞉ mo꞉hege gedeo꞉ kalu o꞉ngo꞉ dowab. 26 Gala 5.6A꞉la꞉go꞉ko꞉lo꞉ kalu do꞉go꞉fo꞉ mo꞉hege gedeo꞉ a꞉ma꞉yo꞉ eleyo꞉ tilida꞉da꞉sa꞉ga꞉ dinafa kudu ha꞉na꞉lalega, kalu a꞉no꞉ Godeya꞉ siwa꞉l amio꞉ do꞉go꞉fo꞉ hege gedeo꞉ kalu o꞉leo꞉ngo꞉le dowab. 27 Yu kalu gio꞉, ele a꞉no꞉ dia꞉ga꞉yo꞉, do꞉go꞉fo꞉ hege gedeo꞉ ko꞉lo꞉lab ko꞉sega, eleyo꞉ mo꞉kudu ha꞉naki dio꞉ge sa꞉lab. A꞉la꞉galikiyo꞉, kalu abeyo꞉ do꞉go꞉fo꞉ mo꞉hege gedeo꞉ iliki elelo꞉ kudu ha꞉na꞉lab a꞉ma꞉yo꞉, ge sendelo alitaki sa hilima꞉ib.

28 Kalu nolo꞉ Yu kalu hendele doma꞉nikiyo꞉, Yuwa꞉ man kudu ha꞉na꞉no꞉ a꞉no꞉ ko꞉mba. A꞉la꞉ta꞉ga꞉ do꞉go꞉fo꞉ hege gedema꞉no꞉ man hendele a꞉no꞉, do꞉mo꞉le amilo꞉ gedeo꞉ o꞉mba. 29 Lo 30.6,Kolo 2.11Ko꞉sega Yu kalu hendele doma꞉nikiyo꞉, gi asulo꞉wo꞉ Gode o꞉lia꞉ mada ege dowab a꞉no꞉, Yu kalu hendele dowabo꞉ o꞉m. Ele kudu ha꞉nab a꞉namio꞉ mo꞉fa꞉la꞉do alifa꞉ib. A꞉la꞉ta꞉ga꞉ do꞉go꞉fo꞉ hege gedean man hendele a꞉no꞉, Godeya꞉ Mamaya꞉lo꞉ gi asulo꞉ ko꞉lo꞉ nodo alita꞉lab a꞉no꞉ hendeleyo꞉ o꞉m. Kalu o꞉ngo꞉ dowab a꞉no꞉, henfelo꞉ kaluwa꞉yo꞉ ene wiyo꞉ mo꞉dulugu alifa꞉ib ko꞉sega, Gode eyo꞉ dulugu alifa꞉ib.