Пс 18
1 Кіраўніку хору. Слугі ГОСПАДАВА Давіда, які выказаў ГОСПАДУ словы сьпеву гэтага ў дзень, калі ГОСПАД вызваліў яго з рук усіх ворагаў ягоных і з рукі Саўла. І ён казаў:
2 Буду любіць Цябе, ГОСПАДЗЕ, сіла мая! ГОСПАД — скала мая, замчышча маё, мой Збаўца!
3 Мой Бог — апора мая, у Ім я маю надзею; Ён — шчыт мой, рог збаўленьня майго і ўмацаваны замак мой!
4 Паклічу я ГОСПАДА, Які годны хвалы, і ад ворагаў маіх збаўлены буду.
5 Ахапілі мяне путы сьмерці, і віры Бэліяла стурбавалі мяне;
6 путы пякельныя агарнулі мяне, і пасткі сьмерці схапілі мяне.
7 У прыгнечаньні маім клікаў я ГОСПАДА і галасіў да Бога майго. Ён пачуў са сьвятыні Сваёй голас мой, і лямант мой перад абліччам Ягоным дайшоў да вушэй Ягоных.
8 І, дрыжучы, задрыжэла зямля, і падваліны гор затрэсьліся і захісталіся, бо ўгнявіўся Ён.
9 Узьняўся дым ад гневу Ягонага, і з вуснаў Ягоных — агонь палючы, вугольле распальваецца ад Яго.
10 Нахіліў Ён неба і зыйшоў, і імгла пад нагамі Ягонымі.
11 Ён сеў на херувіма і паляцеў, і ўзьнёсься на крылах ветру.
12 Ён зрабіў цемру заслонай Сваёй, вакол Яго — намёт Ягоны з цёмных водаў, з густых хмараў.
13 Ад бляску перад Ім разыйшліся хмары Ягоныя, град і вугольле вогненнае.
14 І загрымеў у небе ГОСПАД, і Найвышэйшы падаў голас Свой, град і вугольле вогненнае.
15 І Ён пусьціў стрэлы Свае, і расьцярушыў іх, а мноствам маланак зьбянтэжыў іх.
16 І сталі бачныя рэчышчы водаў, і адкрыліся падваліны сусьвету ад пагрозаў Тваіх, ГОСПАДЗЕ, і ад подыху духу гневу Твайго.
17 Паслаўшы з вышыні, Ён схапіў мяне, выцягнуў мяне з водаў вялікіх,
18 вызваліў мяне ад ворага майго моцнага і ад тых, якія ненавідзяць мяне, бо яны былі дужэйшыя за мяне.
19 Яны схапілі мяне ў дзень няшчасьця майго, але ГОСПАД быў падпорай для мяне.
20 І Ён вывеў мяне на вольны прастор, Ён выратаваў мяне, бо мне спагадае.
21 ГОСПАД даў мне паводле праведнасьці маёй, паводле чысьціні рук маіх мне аднагародзіў,
22 бо я захоўваў шляхі ГОСПАДАВЫ і не адступаў бязбожна ад Бога майго;
23 бо ўсе суды Ягоныя перада мною, і ад пастановаў Ягоных я не ўхіляўся.
24 Я быў беззаганны перад Ім і захоўваў сябе ад беззаконьня.
25 І аднагародзіў мне ГОСПАД паводле праведнасьці маёй, паводле чысьціні рук маіх перад вачыма Ягонымі.
26 З багабойным Ты будзеш багабойным, з чалавекам беззаганным будзеш беззаганны,
27 для чыстага сэрцам Ты чысты сэрцам, і для крывадушнага Ты падступны,
28 бо людзей прыгнечаных Ты збаўляеш, а вочы пыхлівыя паніжаеш.
29 Ты запаліш сьветач мой; ГОСПАД, Бог мой, асьветліць цемру маю.
30 Бо з Табою я атакую войскі і з Богам маім узыйду на муры.
31 Бог, беззаганны шлях Ягоны; слова ГОСПАДА чыстае; Ён — шчыт для ўсіх, хто ў Ім мае надзею.
32 Бо хто Бог, апрача ГОСПАДА, і хто скала, акрамя Бога нашага?
33 Бог, Які падпярэзвае мяне сілай і дае беззаганнасьць шляху майму;
34 Ён робіць ногі мае як у аленя і на высачыні ставіць мяне,
35 навучае рукі мае для бітвы, і рамёны мае напінаюць мядзяны лук.
36 І Ты даў мне шчыт збаўленьня Твайго, і правіца Твая ўмацоўвала мяне, і ласкавасьць Твая памнажала мяне.
37 Ты даў прастору для кроку майго, і не хісталіся ногі мае.
38 Я перасьледаваў ворагаў маіх і даганяў іх, і не варочаўся назад, пакуль ня зьнішчыў іх.
39 Я гэтак скрышыў іх, што не маглі ўстаць; яны падалі пад ногі мае.
40 Ты падперазаў мяне сілай дзеля бітвы, Ты паваліў перада мною тых, што паўсталі супраць мяне.
41 Ты даў мне [бачыць] карак ворагаў маіх, і тых, што мяне ненавідзілі, я вынішчыў.
42 Яны галасілі, і не было таго, хто іх збавіць; яны да ГОСПАДА, але Ён не адказаў ім.
43 Я стоўк іх, як той пыл пад ветрам, як балота на вуліцы, я стаптаў іх.
44 Ты выратаваў мяне ад звадак людзей, паставіў мяне за галаву народам. Людзі, якіх я ня ведаў, будуць служыць мне.
45 На вестку [пра мяне], чуюць мяне; сыны чужынцаў падпарадкаваліся мне.
46 Сыны чужынцаў млеюць і трымцяць у агароджах сваіх.
47 Жыве ГОСПАД, дабраслаўлёная скала мая; і няхай ўзвысіцца Бог збаўленьня майго,
48 Бог, Які адпомсьціў за мяне і схіліў народы перада мною,
49 выратаваў мяне ад ворагаў маіх і ўзвысіў мяне па-над тымі, што паўсталі супраць мяне; ад чалавека злачыннага вызваліў мяне.
50 Дзеля гэтага буду славіць Цябе, ГОСПАДЗЕ, сярод народаў і імя Тваё выслаўляць.
51 Ты ўзьвялічыў збаўленьнем валадара Твайго і зьяўляеш міласэрнасьць памазанцу Твайму, Давіду, і насеньню ягонаму на вякі.